Eski U Kapav Ofer U Lakaz?
1 Dan premye syek, buku Kretyin ti aksepte pu ofer zot lakaz pu fer bann reynion kongregasyon. (1 Kor. 16:19; Kol. 4:15; Filemon 1, 2) Dan sertin kongregasyon zordi, pena ase landrwa kot kapav fer bann Letid Liv ek bann reynion pu predikasyon. Akoz sa, dan sertin Letid Liv ena 30, uswa plis ki 30 asistan. An prinsip bizin ena apepre 15 dimunn dan enn Letid Liv.
2 Enn Gran Privilez: Eski u finn deza panse pu ofer u lakaz pu enn Letid Liv Kongregasyon? Enn lasam ki ase gran, ki prop, kot ena byin lalimyer ek kot gayn byin ler, sa mem ase pu fer enn reynion. Letid Liv, se enn reynion kongregasyon ek li form parti dan dispozisyon ki Zeova finn pran pu anseyn so pep. Donk, u pu gayn enn gran privilez si fer Letid Liv kot u. Buku finn dir ki zot finn gayn buku benediksyon kan zot finn ofer zot lakaz pu fer Letid Liv.
3 Si u panse ki u ena enn lasam ki apropriye, kot kapav fer sa reynion la, silvuple, fer bann ansyin kone. Kitfwa zot deza pe rod bann lezot plas. Me, mem si li pa posib pu fer Letid Liv kot u, eski kapav fer bann reynion pu predikasyon? Kitfwa asterla pena enn gran bezwin pu fer enn Letid Liv kot u. Me, si u fer bann ansyin kone ki u dispoze pu ofer u lakaz, zot pu byin apresye. Ek kitfwa plitar u kapav gayn sa privilez la.
4 Ena Bon Manyer: Tu bann ki reyni dan lakaz enn kikenn, bizin respekte bann kitsoz sa dimunn la. Bann paran bizin veye ki zot zanfan res zis dan landrwa kot fer Letid. Zot bizin pa al dan bann lezot plas dan lakaz la, uswa tus bann kitsoz. Si zame nu ariv boner, fode pa nu fer tapaz. Nu bizin ena usi konsiderasyon pu bann vwazin. Nu bizin fer atansyon pu pa tro deranz zot.—2 Kor. 6:3, 4; 1 Pyer 2:12.
5 Ebre 13:16 ankuraz nu pu pa bliye “fer dibyin ek partaz avek lezot, parski se sa bann kalite sakrifis la ki Bondye apresye.” Kan nu ofer nu lakaz pu enn reynion kongregasyon, se enn bon fason pu partaz seki bon avek lezot, ek pu “donn Zeova loner avek nu bann kitsoz ki ena valer.”—Prov. 3:9.