Nu Bizin Donn Zeova enn Gran Loner
Le 16 Avril, Nu Pu Selebre Repa Diswar Nu Senyer
1 Nu tu pe fite amezir ki le 16 Avril pe koste. Sa swar la nu pu selebre lamor Zezi. Nu pu fer sa ansam avek plizir milyon frer ek ser dan lemond antye, pu donn non Zeova loner. Zeova merite ki nu donn Li loner pu sa gran dispozisyon ki Li finn pran pu nu, setadir ranson. Grasa sa, Li pu donn tu bann dimunn ki obeir Li, bann gran-gran benediksyon. Avek tu nu leker, nu kriye ansam avek sa ekrivin Psom la: “Zeova byin gran ek nu bizin donn Li enn gran loner.”—Psom 145:3.
2 Lepok Memoryal li enn lepok kot nu kapav medit lor bonte ki Bondye finn manifeste anver nu. Nu kapav medit usi lor rekonesans ki nu dwa Zeova parski Li finn avoy “dan lemond so sel Garson ki Li’nn kre direk, pu ki atraver li nu kapav gayn lavi.” (1 Zan 4:9, 10) Kan nu selebre Repa Diswar Nu Senyer kuma bizin, sa tus nu leker. Sa fer nu realize ki “Zeova ena konpasyon ek mizerikord . . . ek so lamur fidel byin gran.” (Psom 145:8) Wi, ranson se pli gran fason ki Zeova finn montre so lamur anver tu bann dimunn. (Zan 3:16) Kan nu reflesi lor lamur Bondye ek nu gete kuma Zezi finn res fidel tutlong so lavi, sa pus nu pu donn Zeova loner. Pu tuletan nu pu donn Li loner pu sa gran lamur ki Li’nn manifeste anver nu kan nu pu gayn posibilite pu viv pu tuletan.—Psom. 145:1, 2.
3 Ed Lezot pu Donn Zeova Loner: Rekonesans pu sa don extraordiner ki Zeova finn fer nu la, setadir ranson, pus nu pu invit lezot pu donn Zeova loner ansam avek nu. Inspire par Bondye, enn ekrivin Psom ti ekrir: “Kan zot pu mansyonn labondans to bonte, zot pu deborde, ek akoz to lazistis zot pu kriye dan lazwa.” (Psom 145:7) Selman lane dernyer, bann Temwin Zeova dan lemond antye finn pas plis ki enn milyar lertan dan predikasyon. Ki rezilta zot finn gayne? Sak semenn, an mwayenn, plis ki 5,100 dimunn ti batize pu montre ki zot finn angaz zot ar Zeova. Antu finn ena 15,597,746 dimunn ki finn asiste Memoryal. Parmi ena plis ki 9 milyon ki pankor kumans donn Zeova loner antan ki bann proklamater. Donk, ena ankor posibilite pu gayn lakrwasman! Antan ki bann proklamater, nu byin kontan privilez ki nu ena pu anons bon nuvel ek ed bann dimunn pu turn zot ver Zeova, so Garson ek so Rwayom.
4 Enn bon mwayin pu ankuraz lezot pu donn Zeova loner, se kan nu invit zot pu selebre Repa Diswar Nu Senyer. Eski u’nn fer enn lalis bann dimunn ki u anvi invite ek bann ki u kapav rapel zot ler ek zur ki pe fer Memoryal? Eski u’nn donn tu bann dimunn ki lor u lalis enn linvitasyon? Si u pankor fer sa, fer enn zefor pu donn zot enn linvitasyon dan letan ki reste avan Memoryal. Ed zot konpran kifer nu fer sa selebrasyon la. Pandan sa selebrasyon la, u bizin pre pu akey bann viziter. Fer zot santi ki zot byinveni, ek fer zot zwenn lezot. Felisit zot pu zot prezans.
5 Kan bann nuvo asiste Memoryal, sa kapav motiv zot pu fer bann progre spirityel. Enn etidyan Labib ti pe sufer stres apre ki li’nn gayn enn gran sok. Akoz sa li ti difisil pu li al dan bann landrwa piblik kot ena enn kantite dimunn otur li. Me li ti vinn asiste Memoryal. Kan finn demann li so lopinyon lor sa reynion la, li finn dir: “Se enn sware pli sakre ki ena, ek mo ti la.” Depi sa, li finn kumans asiste bann reynion.
6 Apre Memoryal: Ki kapav fer pu ed sa bann dimunn interese la pu vinn bann adorater Zeova ki donn Li loner? Bann ansyin pu pran kont bann nuvo ki asiste Memoryal. Zot pu fer bann laranzman pu ki bann proklamater kalifye vizit zot zis apre Memoryal pu reget bann kitsoz interesan ki zot finn aprann uswa obzerve. Kitfwa sertin pu anvi gayn enn letid Labib. Bizin invit zot pu asiste bann reynion kongregasyon ki ena tulesemenn. Se grasa sa ki zot konesans lor Labib pu ogmante.
7 Ena bann laranzman ki finn fer pu ankuraz bann ki pa regilye ek bann ki inaktif dan predikasyon, pu asiste reynion regilyerman. Si bann ansyin demann u pu ed enn kikenn ki inaktif pu rekumans prese, aksepte sa avek tu u leker. Kan nu montre ki nu interes nu avek buku lamur ar nu bann frer, sa li an akor avek lankurazman ki Pol ti done: “Tank ki nu ena lokazyon, anu fer dibyin anver tu dimunn, me sirtu anver nu bann fami dan lafwa.”—Gal. 6:10.
8 Ki nu tu nu fer enn zefor spesyal pu vinn asiste Memoryal le 16 Avril. Nu pa pu anvi rat sa lokazyon ki pli sakre la, pu donn Zeova loner. Wi, asterla, ek pu tuletan, anu donn Zeova loner pu so bann gran travay!—Psom 145:21.