Anu Montre Nu Zel pu Fer Seki Bon!

¹Amezir ki nu pe rant dan lepok Memoryal pu lane 2003, nu ena buku rezon pu montre ki nu “byin devwe pu fer seki bon.” (1 Pyer 3:13) Enn bann pli gran rezon pu nu montre nu zel, se akoz sakrifis Zezi Kris. (Mat. 20:28; Zan 3:16) Konsernan sa sakrifis la, lapot Pyer ti ekrir: “Se pa avek bann kitsoz ki kapav detrir, kuma larzan uswa lor, ki zot finn libere ar kondwit initil. . . . Me se avek disan ki ena valer, parey kuma disan enn lanyo san defo ek san tas, wi avek disan Kris.” (1 Pyer 1:18, 19) Rekonesans pu sa gran manifestasyon lamur la, pus nu pu res okipe pu fer seki bon. Ek li pus nu pu rekonet ki Zezi “finn donn limem pu nu, pu sap nu dan tut sort kalite form dezobeisans lalwa. Ek pirifye pu limem enn pep spesyalman pu li, ki devwe pu bann bon travay.”—Tit 2:14; 2 Kor. 5:14, 15.

² Kan nu fer seki bon devan lizye Bondye, nu ena enn bon relasyon avek Li, ek Li vey lor nu avek lamur. Inpe pli lwin Pyer ti dir: “Sa kikenn ki ule amenn enn bon lavi ek profit bann zur ere la, . . . li bizin elwayn li ar seki pabon ek fer seki bon; ek li bizin rod lape ek kontiyn swiv li. Parski lizye Zeova lor bann ki drwat ek so zorey ekut zot bann siplikasyon.” (1 Pyer 3:10-12) Dan sa lepok difisil la, li vremem enn benediksyon kan nu kone ki Zeova vey lor nu ek ki Li pre pu azir pu nu, “pu protez [nu] parey kuma so lagrin lizye.”—Det. 32:10; 2 Kro. 16:9.

³ Mem si zot ti bizin fer fas ar bann difikilte, bann premye Kretyin ki Pyer ti pe ekrir, ti ranpli avek zel, ek sa ti kuma enn dife andan zot. Zot ti fer tu zot posib pu pres bonn nuvel otan ki zot ti kapav. (1 Pyer 1:6; 4:12) Sa li aplik usi pu bann serviter Bondye zordi. Mem si nu pe viv “bann letan kritik ek difisil pu siporte,” rekonesans pu bonte Zeova pus nu pu fer so volonte avek zel. (2 Tim. 3:1; Psom 145:7) Anu get sertin bon aksyon ki pu ed nu pu res okipe pandan sa lepok Memoryal la.

⁴ Invit Lezot pu Memoryal: Nu prezans pandan selebrasyon lamor Zezi ki fer tulelane, sa li enn fason pu montre ki nu apresye sa don extraodiner ki Bondye finn donn nu la, setadir ranson. Sa lane la, nu pu selebre sa Merkredi le 16 Avril, apre kuse soley. (Lik 22:19, 20) Lane dernyer, dapre rapor mondyal, pu 94,600 kongregasyon finn ena 15,597,746 dimunn ki ti asiste Memoryal! Ti ena plis ki 220,000 dimunn ki lane avan.

⁵ Ki lasistans nu pu gayne sa lane la? Sa pu depann lor zefor ki nu fer pu ankuraz bann dimunn pu rasanble ansam avek nu. Dabor, fer enn lalis bann dimunn ki u ti pu kontan invite. Kumansman sa lalis la, met non u bann pros paran. Si u konzwin pena mem krwayans ki u, fer li kone ki u ti pu byin kontan ki li asiste Memoryal ansam avek u. Enn mari ki pa dan laverite, ti dir ki se parski li ti rann li kont komye sa ti inportan pu so madam, ki li ti asiste Memoryal lane dernyer. Zis apre, lor u lalis, u kapav met non u bann lezot fami, bann vwazin, koleg travay uswa kamarad lekol. Asir u ki u invit u bann etidyan Labib.

⁶ Apre ki u’nn fini fer enn lalis, rezerv letan pu u kapav al kit enn linvitasyon kot sak dimunn. Servi bann linvitasyon Memoryal. Pu ed bann dimunn rapel kan ek ki kote pu fer sa, ekrir uswa tip ler ek landrwa kot pu fer Memoryal anba lor linvitasyon la. Amezir ki 16 Avril pe koste, fer bann dimunn la rapel. U kapav pas get zot kot zot, uswa telefonn zot. Anu ed maximem dimunn pu vinn asiste sa levennman pli inportan ki kapav ena la.

⁷ Ed Bann Ki Asiste Memoryal: Lanwit Memoryal, se enn lokazyon byin zwaye. Nu gayn lokazyon pu akey bann dimunn ki normalman pa asiste bann reynion. Si u sityasyon permet, fer bann laranzman pu ki u ariv boner ek u res ziska tar. Al ver bann nuvo pu fer zot konesans. Montre ki u akeyan ek fer li avek tu u leker.—Rom. 12:13.

⁸ Eski nu kapav ed sertin ki finn asiste Memoryal, pu fer pli gran progre spirityel grasa enn letid Labib? Fer zefor pu pran bann non ek ladres bann dimunn ki personn pa pe vizite. Kumsa u kapav al vizit zot ek kontiyn ed zot. Si u ed zot avek buku lamur, sertin kapav mem progrese ek vinn bann proklamater avan Memoryal lane prosin. Kan u vizit bann dimunn ki asiste Memoryal, invit zot pu diskur spesyal ki pu fer le 27 Avril.

⁹ Eski U Kapav Fer Pyonye Oxilyer Pandan Mwa Avril Uswa Me? Sak lane nu zel pu Zeova pus nu pu fer ankor plis dan predikasyon pandan sa bann mwa spesyal la. Lane dernyer ti ena 579 pyonye oxilyer pu mwa Mars, ek 234 pyonye pu mwa Avril dan tu bann lil ki anba responsabilite nu filyal. Dan Moris ti ena 157 pyonye oxilyer an Mars ek 70, an Avril. Zefor ki enn kongregasyon an antye fer ansam pu pres bon nuvel avek zel pandan lepok Memoryal kapav donn bann bon rezilta.

¹⁰ Dan enn kongregasyon ti ena 107 proklamater ek 9 pyonye permanan. Zot ti dir ki lane dernyer, mwa Avril ti enn mwa extraordiner pu zot. Ti ena 53 frer ek ser ki ti fer pyonye oxilyer, parmi ti ena tu bann ansyin ek bann serviter ministeryel. Kuma eski bann ansyin finn devlop sa lintere pu servis pyonye oxilyer sa mwa la? Zot finn kumanse depi byin boner. Zot finn ankuraz maximem proklamater pu pran sa servis la. Ti ena bann randevu predikasyon ki apropriye pu tu bann manb dan kongregasyon dan diferan ler pandan lazurne. Zot ti met enn laksan spesyal lor temwaynaz par telefonn, sirtu pu bann frer ser ki pena enn tro bon lasante.

¹¹ Enn ser 86 zan, ki pa ti kapav marse akoz so bann problem lasante, ti ranpli so form pu fer pyonye oxilyer. Li ti kumanse boner gramatin. Pandan detrwa lertan li ti donn temwynaz par telefonn pandan ki li asize devan so latab dan lakwizinn. Apre sa li ti repoz inpe, ek li revinn rann temwaynaz. Li ti zwenn enn madam ki ti perdi so mari ek so de zenn garson dan sa de lane ki finn pase la. Sa madam la pa ti kapav konpran kifer Bondye permet bann move kitsoz. Sa ser la finn donn enn bon temwaynaz, ek li’nn kumans enn letid Labib. Rann temwynaz par telefonn an sware, ek bann lezot moman ankor, se enn bon mwayin pu zwenn bann dimunn ki res dan bann batiman uswa bann landrwa kot difisil pu rantre. Sa ed bann proklamater pu zwenn bann dimunn ki pa kot zot pandan lazurne.

¹² Bann ansyin terminn zot rapor kumsa: “Nu finn pas enn moman extraordiner ek nu apresye bann privilez ki nu ena pu servi Zeova ek bann benediksyon ki Li’nn donn sakenn parmi nu.” Avek enn bon program u kongregasyon usi kapav gayn sa bann benediksyon la.

¹³ Fer Zefor pu ki Ena 100-Pursan Partisipasyon dan Predikasyon: Nu lamur pu Bondye ek pu nu prosin pus nu pu truv letan pu partaz bon nuvel avek lezot, sak mwa. (Mat. 22:37-39) Bann sirveyan Letid Liv ek zot asistan, bizin fer enn zefor pu ed bann ki dan zot Letid Liv pu partisip dan predikasyon sak mwa. Enn bon fason pu fer sa se kan zot fer bann laranzman an avans pu pres avek bann frer ek ser an partikilye. Olye ki u atann lafin dimwa pu fer sa, kumans boner. Kumsa u pu gayn plis lokazyon pu donn zot enn led avek buku lamur.

¹⁴ Eski ena bann proklamater ki malad uswa aze dan u letid liv ek ki gayn difikilte pu partisip dan predikasyon? Si ena sertin ki res dan bann Homes uswa ki res lor lili, nu konpran ki zot pa gayn sa kantite lokazyon la pu prese. Me, mem si zot pa kapav fer buku, zot kapav servi bann lokazyon ki zot gayne pu fer zot lalimyer briye. Sa kapav tus bann dimunn ki truv zot bann bon travay, ek fer zot interese ar laverite. (Mat. 5:16) Bann sirveyan letid liv, bizin asir zot ki sa bann frer ek ser la kone ki zot kapav kont zot ler par bann peryod 15 minit. Kan zot kone ki zot kapav met lor zot rapor letan ki zot finn pase pu prese, sa bann frer ek ser fidel la santi zot ankuraze ek gayn enn gran satisfaksyon. Grasa sa, rapor mondyal lor bann aktivite lepep Bondye pu egzak.

¹⁵ Bann Zenn Ki Byin Okipe pu Fer Seki Bon! Li byin ankurazan kan nu truv bann zenn Kretyin servi zot lafors ek zot lenerzi dan servis Zeova! (Prov. 20:29) Si u ankor zenn, kuma eski u kapav montre u zel pu Zeova pandan sa bann mwa spesyal la?

¹⁶ Si u pankor enn proklamater dan kongregasyon, eski u kapav fer zefor pu gayn sa privilez la? Poz umem sa bann kestyon la: ‘Eski mo ena enn konesans debaz lor laverite ki ena dan Labib? Eski mo anvi partisip dan predikasyon? Eski mo donn legzanp par mo kondwit? Eski mo kapav exprim personelman mo lafwa letan mo koz labonn nuvel ar lezot? Eski mo leker pus mwa pu fer sa?’ Si u kapav reponn wi, alor dir u bann paran ki u anvi vinn enn proklamater. Zot kapav koz avek enn ansyin ki form parti dan komite servis.

¹⁷ Si u deza enn proklamater, eski u kapav profit u vakans pu pas plis letan dan predikasyon? Grasa enn bon program ek led bann paran ek bann lezot, buku zenn ki deza batize finn kapav fer pyonye oxilyer pandan konze lekol. Si sa pa posib, alor u kapav pran desizyon pu ogmant u laktivite dan predikasyon. Fixe enn lobzektif personel. U kapav fixe lobzektif, komye ler u anvi fer dan predikasyon. Me apar sa, u kapav fixe lobzektif pu ogmant kalite u predikasyon. Kitfwa u kapav fer zefor pu montre enn pasaz Labib devan sak laport. U kapav usi amelyor kalite u bann vizit, uswa kumans enn letid Labib. U kapav sey enn lot fason pu prese, kuma par egzanp par telefonn. Ki u panse si u fixe lobzektif pu amenn enn vwazin, enn kamarad lekol uswa enn fami pu vinn asiste Memoryal ansam avek u sa lane la? Si u partisip plin-plin dan sa bann laktivite la, u pu gayn enn kantite benediksyon ek pena dut ki u pu ankuraz lezot dan kongregasyon.—1 Tes. 5:11.

¹⁸ Ed Bann Nuvo pu Progrese: Pandan dernye lane servis, bann proklamater finn diriz apepre 3,197 letid Labib sak mwa dan tu bann lil ki anba responsabilite nu filyal. Bann proklamater dan Moris finn diriz apepre 1,227 letid. Avek letan, sa bann etidyan la pu progrese ziska ki zot angaz zot ar Zeova ek fer zot batize. Me avan zot fer sa, nu bizin ed zot pu ranpli bann kondisyon pu zot vinn bann proklamater. Sa li enn letap byin inportan kan nu pe anseyn zot pu vinn bann disip Zezi Kris. (Mat. 9:9; Lik 6:40) Eski u ena enn etidyan ki pre pu fer sa pa la?

¹⁹ Si u pa tro sir si u letid finn fer ase progre pu fer sa pa la, demann u sirveyan letid liv uswa sirveyan lekol pu ed u. Kitfwa, u kapav invit li pu vinn asiste u letid. Sa bann frer la ena enn gran lexperyans ek zot kapav determine kot etidyan finn arive dan so progre. Zot kapav fer bann sigzesyon ki pu ed etidyan la pu kontiyn progrese.

²⁰ Kan enn etidyan dir ki li ule vinn enn proklamater ek u santi ki li ase kalifye pu sa, koz avek sirveyan prezidan. Li pu fer laranzman pu ki de ansyin koz avek u ek etidyan la pu gete si li kalifye. Zot pu servi bann linformasyon ki truv dan liv Notre ministère paz 98-9. (Get Latur Degard an Franse 15 Novam, 1988, paz 17) Si bann ansyin apruv li kuma enn proklamater, u bizin kumans form li tutswit. Enn fwa ki li remet so rapor, bann ansyin pu fer kongregasyon kone ki sa etidyan la li enn proklamater ki pankor batize. Nu swete ki enn kantite nuvo proklamater, ki zot zenn uswa zot aze, kapav progrese ziska ki zot reysi fer sa pa la pandan sa bann mwa spesyal la.

²¹ Enn Bon Program Kapav Ed Nu pu Gayn Bann Bon Rezilta: Fer enn bon program byin alavans, sa li byin inportan si nu’le reysi nu bann laktivite pandan lepok Memoryal. (Prov. 21:5) Ena buku kitsoz ki bann ansyin bizin pran kont.

²² Pu ed kongregasyon fer maximem dan predikasyon, bann ansyin bizin fer bann laranzman pu ki ena bann randevu predikasyon tutlong lasemenn ek pandan wikenn. Sirveyan servis bizin pran latet pu fer sa bann laranzman la. Eski kapav met bann randevu boner gramatin, dan lapremidi, ek dan lasware? Bizin fer kongregasyon kone ki dispozisyon finn pran dan sa domenn la. Li ti pu bon si met sa program la lor tablo.

²³ Bann ansyin bizin asir zot ki fini fer tu laranzman pu Memoryal byin avan le 16 Avril. Parmi ena program avek bann lezot kongregasyon ki servi mem Lasal DiRwayom, netwayaz lasal, swazir bann ki pu dan servis lakey, bann server, ek asir zot ki divin ek dipin disponib. Bizin fer kongregasyon kone ki ler ek kot sa pe fer Memoryal, ek si ena kit sanzman dan ler bann reynion pu lasemenn. Si bann ansyin pran kont sa bann kitsoz la byin kuma bizin, Memoryal pu “pas byin ek dan lord.”—1 Kor. 14:40.

²⁴ Kitfwa, bann sef fami pu anvi servi enn parti letan dan zot letid familyal pu gete kuma lafami kapav ogmant so laktivite pandan lepok Memoryal. Eski u fami an antye kapav fer pyonye oxilyer? Uswa eski lafami kapav sutenir enn uswa de manb pu fer pyonye oxilyer? Si sa pa posib, fixe bann lobzektif presi an fami pu pas pli buku letan dan predikasyon. Eski ena enn zenn dan u fami ki avek enn tipe lankurazman ek led kapav ranpli bann kondisyon pu vinn enn proklamater? Komye dimunn u fami kapav invite pu Memoryal sa lane la? Enn bon program pu fer u fami gayn buku benediksyon ek buku lazwa.

²⁵ Profit Maximem Letan Ki Reste: Kan lapot Pyer ti pe ekrir bann premye Kretyin, li ti rapel zot ki pa ti res buku letan avan ki Zerizalem detrir. (1 Pyer 4:7) Zordi nu ena tu bann prev ki montre ki lafin sa lemond la byin-byin pre. Zur apre zur, fason nu amenn nu lavi bizin montre ki nu sir ki sa pu arive. Antan ki bann serviter Zeova ki zele, nu bizin konsantre lor travay pli inportan ki ena, setadir anons bon nuvel lor Rwayom.—Tit 2:13, 14.

²⁶ Asterla, se ler pu nu montre nu zel ek anu azir! Medit lor seki Zeova finn fer pu u, pu u fami ek pu kongregasyon. Mem si nu pa kapav rann Zeova tu bann benediksyon ki Li donn nu, nu kapav donn Li enn ladorasyon avek tu nu leker. (Psom 116:12-14) Zeova pu beni bann gran zefor ki nu fer. (Prov. 10:22) Ki nu tu, nu “devwe pu fer seki bon” pandan sa lepok spesyal la kot pu ena plis laktivite. Kumsa, “dan tu kitsoz, Bondye pu gayn laglwar par Zezi Kris.”—1 Pyer. 3:13; 4:11.

[Lankadre lor paz 3]

Lasistans Memoryal dan Lemond Antye

1999 14,088,751

2000 14,872,086

2001 15,374,986

2002 15,597,746

[Lankadre lor paz 4]

Kisannla U Pu Invite pu Memoryal?

□ U bann pros paran, ek bann lezot fami

□ Bann vwazin ek bann konesans

□ Bann koleg travay ek kamarad lekol

□ Bann vizit ek bann letid

[Lankadre lor paz 5]

Ed Bann Dimunn Ki Asiste Memoryal

□ Akeyir zot byin

□ Vizit zot pu swiv lintere

□ Propoz zot enn letid Labib

□ Invit zot pu vinn ekut diskur spesyal

[Lankadre lor paz 6]

Ki U Bann Lobzektif pu Lepok Memoryal?

□ Fer ansort ki enn kikenn ki u’nn invite asiste Memoryal

□ Ranpli bann kondisyon pu vinn enn proklamater

□ Pas enn sertin kantite lertan dan predikasyon

□ Amelyor enn sertenn domenn dan u minister

□ Fer pyonye oxilyer