Avril—Enn Moman pu ‘Nu travay Dir ek pu Nu Fer Zefor’
1 Pu lepep Zeova, bann semenn ki tom dan linterval Memoryal zot enn moman pu medite. Sa li enn moman pu reflesi lor seki lamor Kris finn rann posib ek pu apresye lespwar ki Bondye finn donn nu atraver disan ki Zezi finn verse. Kan u pans 19 Avril lane dernyer, ki kitsoz vinn dan u lespri? Eski u ankor mazinn bann figir ki u ti truve, ek bon latmosfer spirityel ki ti ena? Eski u mazinn sa diskur inportan ki u ti ekute la ek bann lapriyer profon ki ti fer? Kitfwa, u ti byin deside pu montre ankor plis u profon rekonesans pu lamur ki Zeova ek Zezi finn montre dan u faver. Ki lefe enn meditasyon kumsa ena lor u zordi?
2 Li kler ki lepep Zeova pa montre zot remersiman zis par parol. (Kolosyin 3:15, 17) Sirtu Avril lane dernyer, nu ti donn nu net dan nu minister Kretyin pu montre ki nu apresye bann laranzman ki Zeova finn fer pu sap nu. Dan nu bann zil, ti ena plizir santenn pyonye asistan, ek sa finn depas maximem ki ti fer avan par 119 pursan; ek pu Moris sa finn depas par 125 pursan. Grasa zot zefor ek zefor bann lezot proklamater, finn ena nuvo maximem dan kantite lertan, magazinn ki finn plase, ek bann vizit. Nu ti byin kontan pu kapav kumans enn kantite nuvo letid Labib, ek finn ena enn nuvo maximem pu lasistans Memoryal.
3 Wi, pwiski nu ena enn lesperans sir, sa pus nu pu azir. Sa mem seki lapot Pol ti ekrir: “Akoz sa mem nu pe travay dir ek nu pe lite, parski nu finn met nu lesperans dan enn Bondye vivan, ki enn Sover pu tu sort kalite dimunn, sirtu bann ki fidel.”—1 Timote 4:10.
4 Pu sa lepok Memoryal la, kuma eski u kapav montre u lafwa dan bann laranzman ki Zeova finn fer pu nu lavi? Avril lane dernyer, dan Moris ti ena pli gran kantite proklamater ki zame pa finn ena avan. Eski nu kapav depas sa kantite la sa Avril la? Wi, nu kapav fer li. Me sak proklamater, ki li batize uswa li pankor batize, li pu bizin fer so par. Buku bann nuvo usi kapav fer zot kalifye pu zot pran par, zot usi. Donk, dan u bann program ki u pu fer pu travay dir ek pu fer zefor an Avril, reflesi lor bann fason kuma u kapav motiv lezot; ek fer bann nuvo ek bann ki pena lexperyans akonpayn u.
5 Ed Lezot pu Repran Zot Aktivite: Si u konn sertin ki pa finn prese pandan enn uswa de mwa, kitfwa u kapav ankuraz zot ek invit zot pu akonpayn u dan predikasyon. Si sertin proklamater dan kongregasyon nepli aktif, bann ansyin pu fer enn zefor spesyal pu vizit zot ek ankuraz zot pu rekumans zot aktivite an Avril.
6 Nu tu, nu bizin kontiyn demann Zeova so lespri pu fortifye nu dan so servis. (Lik 11:13) Ki nu bizin fer pu gayn sa lespri la? Lir Parol ki Bondye finn fer ekrir. (2 Timote 3:16, 17) Nu bizin usi “tann seki lespri pe dir bann kongregasyon.” Pu sa, nu bizin asiste tule sink reynion lasemenn. (Revelasyon 3:6) Asterla mem pli bon moman pu ed bann ki pa regilye ek bann ki pa aktif pu amelyor zot bann labitid letid ek pu asiste reynion pli regilyerman. (Psom 50:23) Me an mem tan ki nu pu fer sa, nu pu vey byin nu prop byinet spirityel. Ena enn lot kitsoz ankor ki nu bizin fer.
7 Lapot Pol ti explike ki Bondye donn “bann ki obeir Li kuma sef” so lespri sin. (Akt 5:32) Obeir vedir usi ekut lord “pu pres avek bann dimunn ek pu donn zot enn temwaynaz konple.” (Akt 1:8; 10:42) Li vre ki nu bizin lespri Bondye pu donn nu lafors pu prese, me li vre usi ki plis nu montre nu dezir pu fer Zeova plezir, plis Li ed nu. Fode ki zame nu bliye ki pu nu obeir volonterman, li inportan ki nu fer sa bann pa neseser la!
8 Ed Bann ki Pli Zenn: Paran, eski u finn remarke ki u bann zanfan ena dezir pu pres laverite ar lezot? Eski zot finn tuzur akonpayn u dan predikasyon? Eski zot ena enn bon kondwit? Si wi, kifer bizin ezite? Apros enn manb Komite Servis Kongregasyon, ek gete si u zanfan ranpli bann kondisyon pu vinn proklamater an Avril. (Get liv Notre Ministère, paz 99-100.) U bizin rekonet ki u bann zanfan kapav fer enn gran par pu donn Zeova laglwar dan sa lepok Memoryal la.—Matye 21:15, 16.
9 An Georgie, dan Etazini Lamerik, enn mama Kretyin ti tuletan ankuraz so zenn tifi pu koz lor Zeova ar lezot. Lane pase, alor ki tifi la ti pe prese ansam avek so mama, li finn plas enn brosir Ki Bondye Pe Demann Nu? ar enn misye. Li finn explik li an gro bann leson ki ena dan sa brosir la. Misye la finn demann li: “Ki laz to ena?” Li finn reponn: “Setan.” Misye la finn inpresyone kan li finn ekut prezantasyon ki sa tifi la finn fer. Avredir sa misye la usi ti finn elve dan laverite, selman li pa finn pran sa serye ek li pa finn viv an akor avek sa. Ebyin apre sa, enn letid finn kumanse avek misye la, so madam, ek so tifi.
10 Buku zenn deza proklamater, ek nu kontan kan zot avek nu dan predikasyon. Sa bann zenn la kapav motiv bann ki mem laz ar zot ek kapav ankuraz zot. Me, Avril li usi enn bon lokazyon pu bann fami travay ansam dan predikasyon, pu ki kumsa zot kapav fortifye zot lyin familyal ek ranforsi zot kondisyon spirityel. Bann sef fami bizin pran latet pu fer sa.—Proverb 24:27.
11 Ed Bann Nuvo: Ki nu kapav dir lor bann nuvo ki pe etidye Labib avek u? Eski zot usi, zot kapav fer enn zefor spesyal an Avril? Kitfwa, apre ki u finn fini egzaminn avek zot sapit 2, paragraf 22, uswa sapit 11, paragraf 14, dan liv Connaissance, zot finn kumans ena dezir pu rakont lezot seki zot finn aprann. Si u pre pu fini liv la, prepar u pu koz klerman lor sa size la kan u ariv sapit 18, paragraf 8, ki dir: “Kitfwa, u anvi rakont u bann fami, u bann kamarad ek lezot, seki u pe aprann. Kitfwa u finn mem fini kumans fer li, parey kuma Zezi ti profit bann lokazyon pu donn temwanyaz okazyonel. (Lik 10: 38, 39; Zan 4:6-15) Sirman asterla, u anvi fer plis.” Eski vremem u bann etidyan dan sa sityasyon la?
12 Eski u etidyan krwar dan Parol Bondye? Eski li pe met an pratik bann prinsip Labib? Eski li pe viv an armoni avek seki Bondye demande? Eski li pe asiste bann reynion dan kongregasyon? Eski li anvi servi Bondye Zeova? Alor, kifer eski u pa ankuraz li pu koz avek bann ansyin pu ki bannla kapav gete si li kalifye pu vinn enn proklamater ki pa batize ek kumsa li kapav pres avek u an Avril? (Get liv Notre Ministère, paz 97-9.) Kumsa, par li mem li pu fer lexperyans kuma lorganizasyon Zeova pu sutenir li dan so bann zefor pu servi Zeova.
13 Li vre, ki sertin etidyan progres pli vit ki lezot. Donk, an armoni avek bann instriksyon ki ena dan Nu Minister Rwayom Zin 2000, paz 4, paragraf 5-6, buku etidye enn dezyem liv avek bann dimunn ki kumansman ti montre lintere, me ki bizin led ankor pu frekant lorganizasyon. Zame, nu pa perdi lespwar ki sa bann dimunn ki ena leker onet la kapav vinn bann vre disip Kris, “swa dan enn tigit letan, swa apre buku letan.” (Akt 26:29) Mem si u pe etidye avek bann dimunn pandan plizir mwa, ki reprezant kitfwa “buku letan,” eski sa lepok Memoryal la pa kapav donn u etidyan enn bon lokazyon pu kumans montre so profon apresyasyon pu ranson Kris?
14 Kuma Ed Zot pu Partisipe: Kan nu egzaminn formasyon ki Zezi ti donn lezot, nu aprann buku kuma pu ed bann nuvo pu kalifye pu prese. Zezi pa finn zis truv enn laful, ek apre li finn dir so bann zapot kumans koze. Non! Dabor, li finn met lanfaz lor linportans travay predikasyon, li finn ankuraz zot pu priye, ek li finn fer trwa laranzman neseser pu zot: li finn donn zot enn partner, enn teritwar, ek enn mesaz. (Matye 9:35-38; 10:5-7; Mark 6:7; Lik 9:2, 6) U kapav fer parey. Ki u pe ed u prop zanfan, enn nuvo etidyan, uswa enn kikenn ki pa aktif pandan enn sertin letan, li pu bon si u fer enn zefor spesyal pu reysi sa bann diferan obzektif la.
15 Met Lanfaz lor Linportans sa Travay la: Atir latansyon dimunn la lor linportans travay predikasyon. Montre ki u pozitif anver sa travay la. Rakont bann fe ki montre seki kongregasyon pe fer dan predikasyon. Gard mem latitid ki Zezi ti ena, ki nu truv dan Matye 9:36-38. Ankuraz sa fitir proklamater la, uswa sa proklamater ki pa aktif la pu priye pu so partisipasyon personel dan minister ek pu ki sa travay la reysi dan lemond antye.
16 Ankuraz Dimunn la pu Reflesi lor Kantite Lokazyon ki Ena pu Rann Temwaynaz: Mansyone ki li kapav reyni ansam avek grup letid liv pu pres lakaz-lakaz. Mansyonn usi ki li kapav koz avek so bann fami, avek seki li abitye, so bann kamarad travay ek kamarad lekol dan ler dezene. Kan enn kikenn pe vwayaz dan transpor piblik, li kapav montre ki li interes li personelman ar bann pasaze, kumsa li kapav kumans enn konversasyon avek zot. Kan nu fer premye pa, suvan sa uver simin pu nu donn enn bon temwaynaz. Vremem, ena buku lokazyon pu partaz nu lesperans avek lezot, “zur apre zur.”—Psom 96:2, 3.
17 Me, li ti pu bon si pli vit posib, u ek nuvo proklamater la zot travay ansam lakaz-lakaz. Si u finn fixe obzektif pu ogmant u servis an Avril, demann sirveyan servis si u kapav gayn enn teritwar pu prese. Kumsa, u pu ena buku lokazyon pu travay teritwar la net. Par egzanp, si u pe rant kot u apre predikasyon, uswa u pe vwayaze pu al reynion, kitfwa, u kapav remarke ki sa ler la ena dimunn dan enn lakaz ki tuletan abitye ferme uswa enn lakaz kot dimunn ti deza montre lintere. Si li posib, fer enn ti vizit dan enn ler kot u kapav zwenn enn kikenn. An retur, sa pu donn u satisfaksyon ek lazwa dan u minister.
18 Prepar enn Mesaz Atiran: Ena dezir pu pres mesaz lor Rwayom, sa li enn kitsoz, me gayn lasirans dan fason ki nu pe dir sa mesaz la, sa li enn lot kitsoz, sirtu si proklamater la nuvo, uswa li pa finn prese pandan lontan. Li vo lapenn pas letan avek bann nuvo ek bann ki pa aktif pu ed zot pu prepar zot. Mem si bann Reynion Servis ek bann reynion predikasyon donn nu bann lide pu ed nu, sa pa ranplas nu preparasyon personel.
19 Kuma eski u kapav ed bann nuvo pu prepar zot pu predikasyon? Kumans par prezant bann magazinn, ek gard enn prezantasyon sinp ek kurt! Demann zot pu pans bann evennman dan laktyalite ki konsern bann dimunn dan teritwar, ek truv enn lide ki al byin ar sa dan enn bann magazinn ki nu ena. Pratik sa prezantasyon la ansam, ek servi li dan predikasyon pli vit posib.
20 Devlop Posibilite pu ki Ena Lakrwasman dan Lavenir: Lane pase, dan lemond antye plis ki 14.8 milyon dimunn ti asiste Memoryal. Dan sa sif la, ti ena zis enn tipe plis ki sis milyon proklamater. Sa vedir ki apepre 8.8 milyon dimunn ti montre ase lintere pu vinn asiste sa program spesyal la, kot zot finn gayn lokazyon ekut explikasyon lor enn parmi bann lanseynman pli inportan ki ena dan Labib. Sirman, zot finn fer konesans avek sertin parmi nu, ek sa finn ena enn bon linpresyon lor zot. Buku parmi zot koz an byin lor nu, fer bann donasyon pu nu travay ki pe fer atraver lemond, ek zot defann nu devan lezot. Sa gran grup dimunn la reprezant enn posibilite lakrwasman dan lavenir. Ki nu kapav fer pu ed zot pu progres plis?
21 Lamazorite bann nuvo vinn asiste Memoryal parski enn parmi nu finn kit enn fey linvitasyon ar zot. Donk, savedir ki zot bizin konn omwin enn dimunn dan lasistans. Si enn kikenn finn reponn nu linvitasyon, li nu devwar pu akeyir li ek ed li pu li profit byin sa program la. Pwiski lasal pu ranpli, ed li pu truv enn plas. Pret li enn Labib, ek invit li pu swiv avek u dan u liv kantik. Reponn bann kestyon ki li kapav poz u. So lintere kapav ogmante grasa latansyon salere ek personel ki u donn li. Byinsir, nu tu ena sa responsabilite la—si nu truv enn kikenn ki nu pa kone, anu akeyir li salerezman, ek koz enn tipe ar li pu fer so konesans.
22 Lasistans pu Memoryal kapav ena enn bel lefe lor panse enn dimunn. Pwiski li finn vinn sa reynion la, sa montre kitfwa li pa finn truv seki li pe rode okenn plas ek asterla nu pe ofer li enn kitsoz ki dapre li, li bizin egzaminn pli pre. Explikasyon lor ranson, enn laranzman extraordiner ki Zeova finn fer, kapav tus enn dimunn buku si li pena okenn lide lor gran lamur ki Zeova ena. Deswit, li kapav truve ki nu diferan—nu sinser, nu amikal, nu ena lamur ek respe. Nu lasal pa resanble bann legliz kot ena bann zimaz ek kot fer bann seremoni ki pena okenn sans. Sirman, bann nuvo pu remarke ki dan lasistans ena tu sort kalite dimunn, ek pa pas okenn laket. Tusala, kapav pus zot pu revini.
23 Apre Memoryal, nu bizin pre pu ed tu bann nuvo ki ti prezan. Si u finn invit bann nuvo, u ena enn responsabilite spesyal. Avan ki zot ale, fer enn manyer ki zot gayn bann ranseynman lor bann lezot reynion ki fer dan Lasal Rwayom. Mansyonn tem prosin diskur piblik. Fer zot konn plas ek ler Letid Liv Kongregasyon ki pli pre ar zot lakaz. Plitar, fer zot gayn enn kopi liv Créateur, ek fer zot kone ki dan semenn 30 Avril, pu egzaminn sapit “Ce qu’un livre peut vous apprendre sur le Créateur” (“Ki Enn Liv Kapav Anseyn U lor Kreater?”) Explike kifer kongregasyon an antye pu asiste enn lasanble distrik ki pu fer dan detrwa mwa.
24 Fer laranzman pu vizit zot kot zot. Fer enn manyer ki zot ena brosir Ki Bondye Pe Demann Nu? ek liv Connaissance, ki pu fer zot konn bann prinsipal lanseynman Labib. Si zot pa pe etidye, propoz zot enn letid Labib. Ankuraz zot pu lir brosir Les Témoins de Jéhovah ki montre klerman kuma nu lorganizasyon fonksyone. Invit zot pu get nu bann kaset video, kuma par egzanp, kaset Our Whole Association of Brothers. Fer zot zwenn lezot dan kongregasyon. Dan bann mwa ki vini, gard kontak avek bann nuvo, invit zot pu asiste bann reynion kan sirveyan rezyonal vizit kongregasyon, uswa asiste lasanble rezyonal ubyin lasanble spesyal enn zur. Donn zot tu lokazyon pu montre ki zot “byin dispoze pu lavi pu tuletan”!—Akt 13:48.
25 Seki Bann Ansyin Kapav Fer: Pu ki zefor ki kongregasyon pu fer dan minister an Avril reysi, sa pu depann buku lor bann ansyin. Si u enn kondikter letid liv, fer enn lalis bann kitsoz ki u kapav fer pu ed tu bann manb u letid liv pu partisip dan bann aktivite spesyal. Dan u grup, eski ena bann zenn, bann nuvo, bann ki pa regilye, uswa ki pa aktif? Verifye si bann paran, bann pyonye, uswa bann lezot proklamater finn fer premye pa pu ed zot. U mem u kapav ofer enn led personel. Enn ser ki pa ti regilye dan predikasyon pandan dezan finn fer plis ki 50 ertan dan minister Avril lane pase. Ki finn ed li? Li dir ki bann vizit pastoral ankurazan bann ansyin ki finn ed li.
26 Bann ansyin ek bann serviter ministeryel bizin korpere pu veye ki ena ase teritwar, ase magazinn, ek piblikasyon pu mwa ki pe vini. Eski kapav organiz bann lezot reynion pu predikasyon? Si wi, fer konn sa bann laranzman spesyal la. Me apart tusala, dan u bann lapriyer piblik ek personel, demann benediksyon Zeova lor mwa kot nu pu ogmant nu aktivite predikasyon Rwayom.—Romin 15:30, 31; 2 Tesalonisyin 3:1.
27 Avril lane dernyer, dan enn kongregasyon dan Caroline Nord, bann ansyin ti ankuraz bann proklamater pu ogmant zot aktivite dan minister. Sak semenn dan bann reynion, zot ti invit bann proklamater pu reflesi dan lapriyer si zot kapav fer pyonye asistan. Dan sak lokazyon ki finn prezante, tu bann ansyin ek serviter ministeryel finn koz avek antuzyas pu fer Avril vinn pli meyer mwa. Ebyin, 58 pursan bann proklamater, parmi tu bann ansyin ek tu serviter ministeryel finn fer pyonye sa mwa la!
28 Lazwa Kan Partisip Net: Ki bann benediksyon nu pu gayne si nu “travay dir ek nu fer zefor” dan nu minister? (1 Timote 4:10) Konsernan aktivite zele ki zot kongregasyon finn fer an Avril, bann ansyin sa kongregasyon ki nu finn site lao la finn ekrir: “Suvan, bann frer ek ser dir ki kantite zot resanti lamur ant zot ek santi zot pli pros ar zot kamarad depi ki zot finn kumans fer plis dan predikasyon.”
29 Enn zenn frer ki gayn problem pu marse ti byin anvi fer so par dan aktivite spesyal Avril lane dernyer. Grasa enn bon program ek led so mama ek bann frer ek ser spirityel, li finn kapav fer pyonye asistan sa mwa la. Ki so santiman lor sa lexperyans ki li finn fer la? Li finn dir: “Premye fwa dan mo lavi, mo finn santi mwa kuma enn zom fit.”
30 Pena dut, Zeova beni bann ki ena buku lestim pu privilez pu koz lor so Rwayom. (Psom 145:11, 12) Kan nu pu selebre lamor nu Senyer, nu pu konpran ki par nu latasman ar Bondye, nu pu gayn plis benediksyon ankor dan lavenir. Lapot Pol ti pe atann avek inpasyans rekonpans lavi pu tuletan. Me, li ti kone ki li pa ti pu bizin zis krwaz lebra ek gard lespwar. Li finn ekrir: “Akoz sa mo pe travay dir, mo pe fer zefor an armoni avek so travay ki pe azir an mwa avek pwisans.” (Kolosyin 1:29) Atraver Zezi, Zeova finn fer Pol vinn for pu ki li kapav fer so minister ki sap lavi, ek zordi usi Li kapav fer parey pu nu. Eski personelman u pu fer sa lexperyans la an Avril?
[Lankadre lor paz 3]
Kisannla U Kapav Ankuraze pu Prese an Avril?
U zanfan?
Enn etidyan Labib?
Enn kikenn ki nepli aktif?