“Fer Dibyin Anver Tu Dimunn”
1 “Pres Parol Bondye Plin-Plin” ek “Vinn Ris dan Bann Bon Travay.” Se bann tem bann lartik ki’nn paret dan bann sipleman Nu Minister DiRwayom Fevriye ek Mars 2002. (Kol. 1:25; 1 Tim. 6:18) Dan sa bann nimero la nu ti ankuraze pu fer buku plis zefor pu ed bann dimunn interese pu asiste Memoryal, pu ed bann inaktif pu rekumans frekant kongregasyon, ek pu ed nu bann zanfan ek bann etidyan Labib pu kalifye zot pu kumans pres labonn nuvel. Sirman nu’nn konn sertin sikse grasa nu bann gro zefor. Asterla, “tank ki nu ena lokazyon, anu [kontiyn] fer dibyin anver tu dimunn.”—Gal. 6:10.
2 Invit Zot pu Reasiste: Dan teritwar filyal États Unis, plis ki enn milyon dimunn ki pa proklamater labonn nuvel asiste Memoryal sak lane. Dan bann zil ki anba nu filyal, preske 6,000 ki pa bann proklamater finn asiste Memoryal lane dernyer. Parski zot prezans montre enn sertenn lintere, ki nu bizin fer pu motiv sa bann ki “dan dispozisyon ki bizin pu viv pu tuletan” la, pu vinn “bann krwayan”? (Akt 13:48) Ankuraz zot pu revini ek asiste bann reynion kongregasyon pli vit posib.
3 Kifer eski u pa invit enn dimunn interese pu asiste Letid Liv Kongregasyon ek kumsa profit enn diskisyon interesan lor profesi Izai? Si sa dimunn la li u fami uswa li enn u konesans ek u ena enn size pu fer dan Lekol Minister Teokratik, u kapav invit li pu vinn ekut u size. Fer li konn tem bann diskur ki pu fer dan bann semenn ki pe vini. (Bizin met enn program azur lor tablo.) Rod tu lokazyon pu fer dimunn la gayn dezir pu ador Zeova. Byinsir, si li pankor kumans etidye Labib avek enn kikenn dan kongregasyon, u kapav propoz li enn letid.
4 Kontiyn Ankuraz Seki Pa Aktif: Enn kantite parmi bann ki asiste Memoryal finn deza fini angaz zot ar Zeova. Me, finn ariv enn moman kot zot finn aret pres labonn nuvel. Purtan, Pol finn ankuraz nu pu “fer dibyin . . . sirtu anver nu bann fami dan lafwa.” (Gal. 6:10) Donk, avan tu nu bizin pran kont bann ki pa aktif.
5 Sirman sertin finn deza fini reazir ar lankurazman bann ansyin ek lezot pu repartisip dan minister. Si bann ansyin met u travay avek enn proklamater ki’nn revinn aktif, pa bliye ki u prop lamur pu Zeova ek pu minister pu fer sa proklamater la regayn konfyans. Montre li kuma u partisip dan diferan form minister pu ki li kapav truv lazwa kan li fer sa, pu li kontiyne dan travay predikasyon, ek pu ki li kapav konn bann benediksyon Zeova.
6 Donn Bann Nuvo Proklamater enn Bon Depar: Kan enn madam interese ti realize ki li ti’nn truv vre lorganizasyon Bondye, li ti anvi kumans prese tutswit. Apre ki li’nn aprann ki bann kondisyon li ti bizin ranpli, li ti dir: “Anu kumans tutswit.” Si enn kikenn avek ki u finn etidye Labib finn kalifye aster pu kumans partisip dan predikasyon, ed li pu truve ki li inportan “kumans tutswit,” ek lerla fer nuvo proklamater la pran enn bon depar. Ed li pu devlop enn labitid pu prepar ek partisip regilyerman dan predikasyon sak semenn.
7 Si u prop zanfan finn vinn enn nuvo proklamater pa batize, travay avek li pu fer li progrese dapre so laz ek so kapasite. Si u ed li inpe, kitfwa li pu etonn u par fason ki li kapav reysi kumans enn konversasyon avek enn kikenn, lir Labib ek propoz piblikasyon. Kan li’nn zwenn enn dimunn ki’nn byin ekut li dan predikasyon, form li pu fer bann vizit ek pu swiv lintere.
8 Ogmant U Prop Minister: Eski u sityasyon permet u pu ogmant u partisipasyon dan travay predikasyon mem apre lepok Memoryal? Eski u kapav azut enn uswa dezertan sak semenn lor letan ki u pase normalman dan servis? Eski u pe gete lor u kalandriye kan u kapav fer pyonye oxilyer ankor? Uswa eski u kapav plann u lavi pu ki u kapav kumans servis aplintan? Tu zefor ki nu met dan minister kapav ed enn kikenn pu aksepte laverite! (Akt 8:26-39) Amezir ki nu get lavenir, anu “kontiyn resers seki bon sakenn anver so kamarad ek anver tu lezot.”—1 Tes. 5:15.
[Lankadre paz 3]
Kontiyn Ed:
□✔ Bann ki’nn asiste Memoryal
□✔ Bann proklamater ki’nn revinn aktif
□✔ Bann nuvo proklamater ki pankor batize