“Vinn Ris dan Bann Bon Travay”

¹ Pandan bann dernye lane so minister zele, lapot Pol ti travay byin pros avek Timote ek Tit. Li ti ekrir sakenn bann mem parol ankurazan. Li ti dir Tit ki “bann ki’nn krwar Bondye” bizin “pans pu pratik bann bon travay.” (Tit 3:8) Li ti dir Timote ki bann ki ena lespwar dan Bondye bizin “vinn ris dan bann bon travay.” (1 Tim. 6:17, 18) Sa enn gran konsey pu nu tu! Me ki kitsoz pu pus nu pu fer bann bon travay dan nu lavi? Ek ki bann travay spesyal nu kapav fer dan bann zur ki pe vini?

² Nu krwayans dan Zeova, nu lamur pu Li ek nu lesperans extraordiner ki Li’nn donn nu, sa mem ki motiv nu pu vinn ris dan bann bon travay. (1 Tim. 6:19; Tit 2:11) Sa lepok lane la sirtu, nu invite pu rapel ki Zeova finn avoy so Garson lor later pu ki Zezi pruve ki so Papa ti ena rezon ek uver simin ki amenn ver lavi pu tuletan pu tu bann dimunn ki merit sa. (Mat. 20:28; Zan 3:16) Pandan Memoryal lamor Kris le 28 Mars, pu explik sa bann kitsoz la dan enn fason byin kler. Eski lesperans ki nu finn gayne pu lavi pu tuletan pa pus nu pu vinn “ris dan bann bon travay”? Byinsir! Ki bann travay nu kapav fer aster?

³ Bann Bon Travay Ki Bizin Fer Pandan Mwa Mars ek Apre: Sirman, nu pu asiste Memoryal—levennman pli inportan dan lane pu bann Temwin Zeova dan lemond antye. (Lik 22:19) Me nu anvi partaz lazwa pu sa lokazyon la ar maximem dimunn posib. Get rapor servis dan L’Annuaire 2002, ek u pu truve ki lane pase dan buku peyi dan lemond antye, lasistans Memoryal ti trwa, kat, sink uswa plizir fwa plis ki kantite proklamater. Sirman sa finn demann bann kongregasyon buku zefor pu distribye enn kantite linvitasyon Memoryal atraver zot teritwar. Donk, nu anvi pas maximem letan nu kapav depi asterla ziska 28 Mars pu invit bann dimunn pu vinn Memoryal, ek ed zot pu aprann lesperans pu gayn lavi.

⁴ Letan Avril arive, nu ankor tuzur kapav profit bann long lazurne lete. Kuma eski nu kapav servi byin sa bann lavantaz la pu “vinn ris dan bann bon travay”? Kan nu kontiyn partisip avek zel dan predikasyon bonn nuvel, ek kan nu “zele pu bann bon travay.” (Tit 2:14; Mat. 24:14) Si u pa finn kapav fer pyonye oxilyer an Mars, eski u kapav fer li an Avril ek Me? Si u pe fer pyonye an Mars, eski u kapav kontiyne?

⁵ Sertin ki travay, truve ki zot kapav pas enertan uswa plis dan servis kan zot pe al travay, letan zot rann temwaynaz lor lari uswa rann vizit bann dimunn ki travay dan bann biznes ki uver boner gramatin. Lezot prevwar enn parti zot ler manze pu donn temwaynaz. Ena finn truve ki li posib pu fer enn letid Labib pandan sa letan la avek zot kamarad travay. Buku ser ki res lakaz finn reysi profit letan ki zot zanfan lekol pu prese. Ena finn lev pli boner sertin zur pu kapav fini zot luvraz lakaz, lerla zot gayn plis letan pu prese ek fer letid.—Efe. 5:15, 16.

⁶ Mem si u pa kapav fer pyonye oxilyer, petet u kapav fer enn program pu partisip plis dan minister, ek fer tu seki u kapav “pu fer dibyin, pu vinn ris dan bann bon travay, pu vinn zenere, ek pre pu partaz” laverite ar lezot.—1 Tim. 6:18.

⁷ Rapel Bon Travay Fer Bann Disip: Sak lane ena bann dimunn interese ki vinn Memoryal. Eski li ti pu posib pu sertin dan kongregasyon pran kont sa bann ki asiste Memoryal la me ki pa pe etidye asterla? Eski kapav vizit zot dan lobzektif pu ed zot pu fer bann progre spirityel? Kapav sertin ki finn asiste Memoryal ena bann fami Temwin. Kitfwa lezot, zot bann dimunn ki finn etidye dan lepase ek ki zis bizin inpe lankurazman pu rekumans etidye ek pu asiste bann reynion regilyerman. Sa pu donn nu enn gran lazwa pu truv sa bann dimunn la revinn bann serviter Zeova aktif ansam avek nu!

⁸ Avek plis partisipasyon dan minister pandan Mars ek apre, sirman nu pu truv plis dimunn interese pu vizite. Sey sulev enn kestyon kan u pe kit zot. Lerla promet ki u pu reponn zot pandan u prosin vizit. Kan nu fer sa, nu pu prepar semin pu enn vizit. Pli vit u fer vizit la, pli li bon. Si nu pa reysi kumans letid premye fwa, nu anvi seye lor prosin vizit mem, si posib.

⁹ Kan nu rann temwaynaz lor lari, nu bizin konsyan ki nu bizin sey kumans bann konversasyon avek bann dimunn. Buku proklamater finn gayn bann non, ladres, ek nimero telefonn avek bann dimunn interese ki zot finn zwenn kan zot ti pe donn temwaynaz lor lari. Si sa dimunn avek ki u’nn rant an kontak la pa res dan u teritwar, pran enn form (S-43) Veuillez suivre l’intérêt dan Lasal DiRwayom, ranpli li, ek donn sa sekreter kongregasyon, ki pu remet sa kongregasyon ki truv dan teritwar kot dimunn la reste. Si sekreter la pa kapav fer sa, li pu avoy form la biro filyal, ki pu okip sa. Dan sa fason la, pu kapav kiltiv lintere dimunn la.

¹⁰ Si gayn enn nimero telefonn me pa enn ladres, lerla fer enn vizit par telefonn. Prepar an avans seki u anvi diskite. Gard u liv Comment raisonner akote u pu ki u kapav fer referans. Sertin pe gayn buku sikse kan zot etidye avek bann dimunn par telefonn, parmi ena bann dimunn ki difisil pu zwenn kot zot. Enn ser finn kumans demann nimero telefonn bann madam interese ki li’nn zwenn dan predikasyon lakaz-lakaz. Rezilta: li finn kapav kumans de letid Labib.

¹¹ Korper Avek Bann Ansyin pu Ed Bann Inaktif: Bann ansyin byin kontan pu pran sa bannla kont avek lamur. Enn kantite inaktif finn deza fini kumans asiste bann reynion kongregasyon par zotmem. Zot realize ki bizin res pros avek lorganizasyon Zeova pu kapav truv sekirite spirityel ki dekrir an Psom 91. Sertin parmi sa bannla finn pre aster pu partisip dan minister ankor enn fwa. Si bann lezot ki inaktif asiste Memoryal sa mwa la, kapav zot pu aksepte enn letid Labib personel. Dan sa ka la, bann ansyin pu pran bann dispozisyon pu ki enn kikenn etidye avek sa bann ki anvi gayn led la. Si invit u pu ede dan sa fason la, u korperasyon pu byin apresye.—Rom. 15:1, 2.

¹² Kontiyn “Pratik Bann Bon Travay”: Buku ki finn fer pyonye oxilyer pu enn mwa uswa plis finn truve ki zot aktivite predikasyon ogmante dan bann mwa ki vini. Zot finn zwenn bann dimunn interese ki zot finn santi, zot bizin vizite. Sa finn motiv zot pu fer extra zefor pu sorti dan predikasyon pli suvan pu ki zot kapav kontakte sa bann dimunn interese la ankor. Sertin finn kumans bann letid, ek sa finn ed zot pu partisip ankor plis dan minister.

¹³ Ena lezot ki finn truv telman lazwa pu fer plis dan predikasyon ek travay fer disip, ki zot finn motive pu egzaminn zot bann priorite. Rezilta: sertin finn reysi diminye travay profann ek vinn bann pyonye oxilyer regilye. Lezot finn kapav mem kumans servis pyonye permanan. Zot finn kapav met zot lesperans plis dan Bondye ek pa dan bann kitsoz ki lemond ena pu ofer. Zot finn truve ki kan zot “zenere, ek pre pu partaze,” Zeova beni zot buku ek sa fortifye zot lesperans pu zwir “vre lavi”. (1 Tim. 6:18, 19) Byinsir, amezir ki ena ankor ki fer pyonye, kongregasyon antye gayn bann byinfe. Bann pyonye ena tandans rakont zot lexperyans ek invit lezot pu partisip avek zot dan minister, ek sa ogmant latmosfer spirityel dan kongregasyon.

¹⁴ Anu “vinn ris dan bann bon travay” nu tu pandan sa lepok Memoryal la ek apre kan nu ogmant nu partisipasyon dan minister Kretyin. Anu montre nu rekonesans pu seki Zeova finn fer pu nu kan Li’nn donn nu lesperans pu viv pu tuletan lor enn nuvo later kot pu ena lazistis.—2 Pyer 3:13.