Couma Nous Kapav Prêche Dans Bann Territoires Commercial
1. Ki l’avantage éna kan nous prêche dans enn territoire commercial?
1 Eski ou ti pou content prêche dans enn territoire kot touletan éna dimoune, ek kot en général bann dimoune-la bien accueillant envers bann visiteurs? Dans ou propre territoire mem ou kapav faire sa l’experience-la. Couma? C’est kan ou prêche dans enn territoire commercial. Bann proclamateurs ki prêche dans bann magasins souvent gagne bann bon résultats.
2. Couma eski bizin organise prédication dans bann territoires commercial?
2 Certains congrégations éna bann quartiers commercial dans zot territoire. Frère ki occupe territoire kapav prépare bann cartes spécial pou sa bann quartier-la. Si dans enn carte territoire résidentiel éna enn quartier commercial aussi, lor carte sa territoire-la bizin indiqué clairement ki fodé pa travail sa quartier commercial-la. Mais dans certains territoires kapav prêche dans quartier résidentiel ek commercial en mem temps. Si jamais ou pa’nn prêche dans enn territoire commercial, essaye commencé dans bann ti magasins.
3. Ki pou aide nou pou prêche dans enn façon efficace dans bann magasins?
3 Servi enn Méthode Simple: Kan ou pé prêche dans bann magasins, li important ki ou habillé pareil couma ou pé al réunion. Li bon aussi ki ou choisir enn moment kot péna beaucoup dimoune dans magasin-la. Si possible, rentre dans magasin-la kan péna okenn client ki pé atann. Demann pou koz avec dimoune ki en charge magasin-la. Ou bizin précis ek bref. Donc, ki ou kapav dire?
4-6. Ki nous kapav dire kan nous pé prêche avec enn dimoune ki travail dans enn magasin ou-soit enn dimoune ki en charge enn magasin?
4 Kan ou pé koz avec enn dimoune ki travail dans magasin-la ou-soit avec sa dimoune ki en charge-la ou kapav dire li: “Bann dimoune ki dans commerce zot touletan bien occupé, ek la plupart du temps nous pa trouve zot kot zot. À cause sa nous pé visite ou dans ou place travail. Nou bann magazines koz lor bann événements ki pé passé dans le monde.” Après sa attire l’attention lor enn point en particulier dans enn périodique.
5 Ou kapav essaye sa méthode simple-la aussi: “Beaucoup dimoune ti pou content konn plus lor la Bible, mais zot péna beaucoup lé-temps. Sa tract-la koz lor enn programme l’étude Biblique gratuit ki pou aide ou trouve réponses à ou bann questions Biblique.” Après sa attire l’attention lor pages 4-5 dans tract Eski U Ti Pu Kontan Konn Plis lor Labib?
6 Si dimoune ki en charge magasin-la parette occupé, ou kapav zis offer li enn tract ek dire li: “Mo pou re-vini enn moment kot ou moins occupé. Mo ti pou content koné ki ou pensé lor sa tract-la.”
7. Couma eski nous kapav développe l’intérêt ki nous trouvé dans enn territoire commercial?
7 Développe l’Intérêt: Ou kapav mem conduire enn l’étude la-Bible dans enn territoire commercial. Enn pionnier spécial ti pé quitte régulièrement bann périodiques avec enn businessman. Enn jour kan monsieur-la inn dire li combien li apprécié séki li pé lire, pionnier-la inn montré li couma enn l’étude Biblique déroulé dans brochure Ki Bondye Pe Demann Nu? Monsieur-la inn commence étudié la Bible dans so place travail mem. Mais pionnier-la inn tenir compte situation sa monsieur-la, ek li’nn prend zis 10-15 minutes pou chaque l’étude. Nous aussi, anou contigne rod bann dimoune sincère kan nous prêche dans bann territoires commercial.