Amelior Nou Bann Kapasite dan Nou Minister—Rann Temwaniaz dan Bann Teritwar Komersial

Kifer Li Inportan: Zordi, boukou dimounn travay pandan boukou lertan. Akoz sa, souvan, meyer fason pou fer zot konn mesaz Rwayom Bondie, se kan nou pres avek zot dan zot travay. Predikasion dan bann teritwar komersial kapav fer nou gagn boukou lazwa ek bann bon rezilta. Kifer? Parski pena okenn absan, ek souvan bann travayer ena bon manier parski pou zot, nou enn klian. Pou ki bann proklamater pres avek sa bann travayer-la dan enn fason efikas, zot bizin ena takt ek bon zizman ek zot bizin bien abiye ek bien kwafe. (2 Kor. 6:3) Akoz sa, sirveyan servis bizin vey bien kantite fwa ki prese dan bann teritwar komersial ek par kisannla.

Kouma To Kapav Fer Sa:

Prepar enn prezantasion ase kourt. Si nou pran tro boukou letan, kitfwa nou pa pou gagn posibilite pou koz avek travayer-la enn lot fwa.
Swazir enn moman kan bann travayer-la mwin okipe, par exanp, kan fek ouver.
Fer zefor pou koz avek responsab-la, avan. To bizin zanti ek amikal. To kapav dir: “Nou pe vizit bann dimounn pou enn ti moman dan zot travay, parski li pa fasil pou zwenn zot kot zot.” Fer enn ti prezantasion, ek ofer enn trak, bann magazinn, ouswa enn lot piblikasion. Li pli bon ki nou pa koz lor bann donasion, atansion zot krwar ki nou bann marsan, sof si zot demann nou kouma nou laktivite finanse.
Si responsab-la amikal, demann li permision pou koz avek lezot travayer pou enn ti moman. Dan sertin plas, kitfwa li pli bon ki to demande si to kapav les bann piblikasion dan enn landrwa kot zot pran zot poz.
To bizin soup ek servi to bon zizman. Par exanp, si enn travayer pe koz avek enn kliyan ouswa si li okipe, atann ki li lib avan to koz avek li.

Pandan Sa Mwa-la, Esey Sa:

Pandan to prosin Ladorasion an Fami, pratik enn ti prezantasion ki to kapav servi si to pres dan enn teritwar komersial.