Nouveau Programme l’Assemblée Spécial Enn Jour
Si nous trouve ou-soit nous tann enn signal d’alarme, mais nous pa prend li compte, nous risqué konn bann grave conséquences. Eh bien, li pli important encore ki nous suive direction spirituel ki Jéhovah pé donne nous. C’est séki nous pou aprann dans nou prochain l’assemblée spécial. Thème sa l’assemblée-la, c’est “Veille Bien Façon Ki Zot Écouté.”—Luc 8:18.
Dans so premier discours, orateur visiteur pou examine bann conseils inspiré ki Paul ti donné dans bann premier chapitres livre Hébreux. Li pou montré couma sa bann conseils-la concerne nous zordi. Dans so discours final, “Anou Contigne Prend Compte l’Enseignement Bondié,” orateur visiteur pou faire nous examine nous-même, pou guetté si vrai-même nous pé écoute Jéhovah, so Garçon, ek “l’esclave fidèle et avisé.”—Mat. 24:45.
Certains discours pou particulièrement profitable pou bann familles. Par exemple, nous pou écoute sa discours-la: “Bann Familles Ki Écoute Parole Bondié Sans Laisse Zot l’Attention Détourné.” Sa partie-la pou faire nous trouvé couma nous kapav empêche le monde mine nou spiritualité. Bann interviews pou montré couma certains finn faire bann changements dans la vie pou donne bann kitsoz spirituel la priorité. Dans discours, “Couma, kan Nou Bann Jeunes Prend Bien Compte Parole Bondié, Sa Fortifié Zot,” nous pou écoute témoignages certains jeunes. Zot pou raconté couma zot inn défann la vérité dans l’école, face ar zot bann camarades, ou-bien dans prédication. Discours, “Bann Ti Zenfants Ki Écoute Bondié ek Ki Aprann,” pou montré ki fodé pa nous sous-estime capacité ki bann ti zenfants éna pou aprann. Nous pou suive interviews bann zenfants accompagné par zot parents, ki pou montré bienfaits ki nous gagné kan nous enseigne bann zenfants la vérité depuis ti-baba.
Alors ki Satan “pé mette le monde entier dans l’erreur,” Jéhovah Li, Li pé montré so bann fidèle serviteurs chemin kot zot bizin marché. (Rév. 12:9; Is. 30:21) Kan nous prend bien compte so bann conseils ek kan nous applique zot dans nou la-vie, nous vinn sage, nous heureux, ek nous prend chemin ki amène vers la vie éternelle.—Prov. 8:32-35.