4ème Partie: Bann l’Études Biblique Ki Faire Nou Étudiants Progressé
Forme Bann Étudiants pou Prépare Zot l’Étude
1 En principe, enn étudiant ki lire à l’avance chapitre ki li pou étudié, ki souligne bann réponses ek réfléchi couma li kapav réponn dans so propre mots, pou progressé rapidement lor plan spirituel. Donc, enn fois ki nou’nn établi enn l’étude, nous kapav prépare enn leçon ensam avec nou étudiant pou montré li couma faire sa préparation-la. Avec la majorité bann étudiants, li pou bon ki nous prépare enn chapitre ou enn leçon en entier.
2 Souligne Bann Réponses ek Écrire Bann Notes Dans la Marge: Explique étudiant-la couma trouve bann réponses direct à bann questions. Montré li ou brochure kot ou finn souligne zis bann mots ou-soit bann expressions important. À mesure ki ou examine leçon-la, kitfois li pou envie suive ou l’exemple, c’est à dire souligne zis bann points ki pou aide li rappelle réponse-la. (Luc 6:40) Après sa, demann li pou donne la réponse dans so propre mots. Sa pou permette ou trouvé si vrai-même li’nn bien comprend leçon-la.
3 Li bien important ki sa étudiant-la examine attentivement bann versets la Bible ki pa cité dans paragraphe kan li pé prépare so l’étude. (Actes 17:11) Aide li comprend ki chaque verset ki donné en référence appuye enn l’idée dans paragraphe. Montré li couma prend bann ti notes dans la marge so livre ou-soit so brochure. Faire li comprend ki tou séki li pé aprann, basé lor la Bible. Encourage li pou servi bann versets Biblique ki donné en référence kan li faire bann commentaires pendant l’étude.
4 Guette l’Article-la Avant ek Faire Révision Après: Avant ki étudiant-la commence prépare so l’étude à fond, li pou bon ki li gagne enn l’idée lor chapitre ki li pou examiné. Montré li ki li kapav faire sa, si li examine titre chapitre-la, bann sous-titres, ek bann zimages. Explique li ki avant li fini so préparation, li pou bon ki li prend enn ti lé-temps pou révise bann points important. Si éna bann questions révision à la fin, li kapav servi sa pou faire so révision. Sa pou aide li rappelle séki linn aprann.
5 Sa formation-la pou aide enn étudiant pou faire bann commentaires intéressant pendant bann réunions. Sa pou aide li développe bann bon l’habitudes pou étudié, bien après ki so l’étude inn terminé.