Attire l’attention lor “la lumiere le monde”
1. Ki grand la lumiere Parole Bondié ti predire, ek ki l’evenement attire enn l’attention special lor sa la-lumiere-la?
1 Jéhovah ti predire a travers prophete Isaïe: “Bann dimoune ki ti pé marche dan noir finn trouve enn grand la-lumiere. Ek bann ki ti pé reste dan enn l’endroit kot faire bien noir, la lumiere li-mem finn brillé lor zot.” (Is. 9:2) Nou’nn trouve sa ‘grand la-lumiere-la’ dan bann kitsoz ki Jésus Christ finn faire. Travail ki li ti accompli kan li ti lor la terre ek bann benediction ki’nn gagné grace a so sacrifice, ti ameliore condition spirituel bann ki ti dan noirté. Nou pé vive dan enn lepok kot faire bien noir ek c’est sa mem qualité la lumiere-la ki bann dimoune bizin zordi. Repas nou Seigneur, li enn l’occasion special pou nou attire l’attention lor “la lumiere le monde.” (Jean 8:12) L’année dernier, plusieurs million dimoune ti montré zot ti ena la foi kan zot ti reuni ensam pou obeir sa commandement ki Jésus ti donné-la: “Contigne faire sa en mo memoire.” (Luc 22:19) A mesure ki Mémorial kosté, couma nou kapav faire nou part pou attire l’attention lor sa grand la-lumiere ki Jéhovah finn faire brillé-la?—Phil. 2:15.
2. Couma nou kapav augmente nou reconnaissance pou la ranson, ek ki l’effet sa pou ena si nou faire sa?
2 Developpe enn profond reconnaissance: Lepok Mémorial li enn bon l’occasion kot nou kapav reflechi lor grand l’amour ki Jéhovah ek Jésus finn manifesté kan zot inn donne la ranson pou l’humanité. (Jean 3:16; 2 Cor. 5:14, 15) Si nou faire sa, sans doute sa pou augmente nou reconnaissance pou sa l’evenement sacré-la. Tou bann serviteur Bondié pou envie reserve le temps pou lire ek medite lor portion la Bible ki’nn prevoir pou Mémorial ek ki parette dan brochure Anou examine la Bible toulé-jour. Jéhovah ena bann qualité incomparable, ek la ranson revele nou So bann qualité dan enn fason extraordinaire. Kan nou reflechi lor sa bann qualité-la, nou fiere ki nou ena enn Bondié couma Jéhovah. Kan nou medite lor seki la ranson vedir pou nou personnellement, sa faire nou l’amour sincere pou Bondié ek pou so Garson vinn pli fort, ek sa motive nou pou faire tou seki nou kapav pou faire volonté Jéhovah.—Gal. 2:20.
3. Couma nou kapav montré nou reconnaissance pou Mémorial?
3 Jéhovah finn prend bann disposition pou sauve nou la-vie. Si nou augmente nou reconnaissance pou seki Li’nn faire, nou l’enthousiasme pou ena enn l’effet lor nou bann l’etude, bann visite, bann famille, bann voisin, bann camarade lekol, bann collegue travail ek lezot dimoune ki nou envie invité pou sa l’occasion special-la. (Luc 6:45) Alors, anou faire enn zeffort special pou invite tou sa bann dimoune-la, ek laisse enn feuille invitation pou Mémorial avek zot pou zot pa blié. Certain finn trouve sa pratik pou garde enn la-liste bann dimoune ki zot habitué invité pou Mémorial, ek chaque l’année zot ajoute lezot nom lor la. Coumsa, zot pa blié personne. Jéhovah finn faire nou enn “don gratuit ki pa kapav decrire.” Nou montré nou reconnaissance pou sa don-la kan nou organise-nou bien ek nou faire tou seki nou kapav pou invite bann ki interessé.—2 Cor. 9:15.
4. Ki nou kapav faire pou augmente nou participation dan ministere pendant mois mars ek avril?
4 Augmente nou participation dan ministere: Eski ou kapav augmente ou participation dan ministere pendant mois mars ek avril? Si nou faire zeffort pou partage “la bonne nouvelle concernant Christ” avek lezot, nou sur ki Jéhovah pou beni nou. Jéhovah, Li-mem la Source tou la-lumiere spirituel ek Li finn donne sa l’ordre-la: “Laisse la lumiere brillé dan noir.” (2 Cor. 4:4-6) Si necessaire, bann ancien pou organise bann rendez-vous predication en plus ek dan different l’heure. Zot-mem zot pou donne l’exemple kan zot reste pli longtemps dan predication pou soutenir bann ki envie preche plus. Kapav faire bann l’arrangement, par exemple, pou preché lor la rue boner gramatin, ou-soit pou faire bann quartier commercial, ek rann temoignage par telephone dan l’apré-midi ou-soit dan tantot. Si ou fixé enn certaine quantité l’heure raisonnable ek ou faire zeffort pou reussi ou l’objectif, sa pou aide ou pou augmente ou participation dan ministere. Pou beaucoup proclamateur, faire pionnier auxiliaire, li enn fason ki permette zot donne Jéhovah tou seki zot kapav.—Col. 3:23, 24.
5. Couma beaucoup pé profité parski finn diminué quantité l’heure pou service pionnier auxiliaire?
5 Eski ou kapav faire service pionnier auxiliaire? Sa faire plus ki sept an depuis ki finn diminué quantité l’heure ki demann enn pionnier auxiliaire faire. Sa changement-la finn permette beaucoup plus frere ek soeur goute sa privilege-la, setadir faire pionnier auxiliaire. Eski ou’nn deja essaye faire pionnier auxiliaire? Certain finn prend l’habitude pou faire sa toulé-l’année. Dan beaucoup congregation, enn quantité proclamateur faire service pionnier auxiliaire ensam, ek sa vinn enn point fort dan l’activité congregation pendant l’année. Eski ou kapav organise-ou pou faire pionnier auxiliaire enn mois,—ki pou donne ou beaucoup satisfaction—pendant lepok Mémorial? Kitfois pou certain, avril pou enn bon mois parski li ena cinq week-end.
6. Ki bann disposition interessant finn prend pou bann pionnier auxiliaire?
6 Eski surveillant circonscription pé visite ou congregation pendant mars ou-soit avril? Ou ena enn joli l’occasion devant ou! Couma ti annoncé avant, pendant l’année service 2006, tou bann ki faire pionnier auxiliaire pendant mois visite surveillant circonscription, zot pou gagne l’occasion assisté premier partie reunion ki surveillant faire avek bann pionnier permanent. Nou sur ki bann renseignement ki zot pou gagné pendant sa reunion-la, pou fortifié zot la-foi, ek sa pou encourage beaucoup pionnier auxiliaire pou vinn bann pionnier permanent. En plus, pendant mois mars nou pou gagne l’occasion pou aide bann dimoune pou vinn vers la lumiere spirituel grace a enn l’etude la Bible dan nouveau livre Ki la Bible enseigné vrai-mem? Kifer ou pa faire-ou enn devoir pou commence enn l’etude dan sa nouveau livre-la?
7, 8. (a) Ki kapav aide nou pou faire enn bon program pou faire pionnier auxiliaire? (b) Couma tou dimoune dan la famille kapav cooperé, ek couma eski la famille kapav tire profit?
7 Nou koné ki enn pionnier auxiliaire bizin faire 50 heure. Alors faire enn program ki pou permette ou faire ou la-lumiere la verité brillé pou apepré 12 heure chaque semaine. Koz sa avek bann ki finn reussi faire pionnier auxiliaire, ek aussi avek lezot. Sa kapav encourage zot pou faire pionnier auxiliaire zot aussi. Bann proclamateur baptisé, jeune ek agé toulé-deux, finn trouvé ki li pa trop difficile pou faire 50 heure si zot bien organise-zot. Koz sa avek Jéhovah dan la priere. Apré, si possible, organise-ou, ek profite service pionnier auxiliaire!—Mal. 3:10.
8 Beaucoup famille finn trouvé ki si zot tou cooperé, au moins enn dan la famille kapav faire pionnier auxiliaire. Enn famille ti decidé ki toulé-cinq membre ki baptisé dan la famille pou faire pionnier auxiliaire. Deux lezot zenfant ki pa ti encore baptisé, ti faire enn zeffort special pou augmente zot l’activité. Eski sa bann zeffort ki zot ti faire-la, ti vaut la peine? Zot ti ecrire: “Nou’nn passe enn mois extraordinaire, ek nou’nn trouvé couma nou lien familial inn vinn pli fort. Nou remercié Jéhovah pou sa grand benediction-la!”
9. Couma eski nou kapav laisse nou la-lumiere brillé pendant lepok Mémorial?
9 Eski nou l’activité special pendant mois mars ek avril pou vrai-mem encourageant, ek pou faire nou vinn pli proche avek nou Papa ki dan le ciel? Tou depann lor bann zeffort ki nou faire personnellement pou augmente nou l’amour pou Bondié ek pou so Garson, ek pou participe plus dan predication. Anou bien determiné pou faire pareil couma sa ecrivain psaume-la ki ti dire: “Mo pou glorifié Jéhovah beaucoup avek mo la-bouche ek au millieu beaucoup dimoune, mo pou loué Li.” (Ps. 109:30) Jéhovah pou beni nou l’activité ki nou faire avek zèle pendant lepok Mémorial. Alors, laisse enn grand la-lumiere brillé pou ki encore plus dimoune sorti dan noirté ek “gagne la lumiere la vie.”—Jean 8:12.