Preche avek courage, mais en mem temps garde la paix
1 Dan predication, nou joinde beaucoup dimoune ki croire dan bann l’enseignement ki contraire ar la Bible. Li vrai ki nou bizin preche avek courage, mais nou envie aussi “vive en paix avek tou dimoune” ek evite offense zot pou nanyin. (Rom. 12:18; Actes 4:29) Couma eski nou kapav preche avek courage ek mais mem temps garde la paix?
2 Rod bann point kot toulé-deux d’accord: Enn kikenn ki envie garde la paix pou evite bann discussion. Dan predication nou kapav joinde bann dimoune ki bien attaché avek zot croyance. Si pou nanyin, nou nek dire zot ki seki zot croire li fausse, zot pa pou envie ecoute nou message. Si dimoune-la dire enn kitsoz ki pa vrai, avek tact nou kapav mentionne enn point kot kitfois toulé-deux pou tombe d’accord. Kan nou faire sa, nou pou kapav elimine bann sentiment negatif ki dimoune-la kapav ena ek nou pou kapav touche so leker.
3 Si enn dimoune dire nou enn kitsoz ki pa en accord avek la Bible ek nou passe lor la, eski sa vedir ki nou d’accord avek li ou-soit ki nou pé diminué valeur la verité? Non. En tant ki chrétien, nou travail c’est pa pou dementi tou bann fausse l’enseignement, mais pou preche bon nouvel lor Royaume Bondié. (Mat. 24:14) Kan enn dimoune dire nou enn kitsoz coumsa, au lieu ki nou rod corrige li dé-suite, nou kapav considere sa couma enn l’occasion pou koné ki dimoune-la pensé vrai-mem.—Prov. 16:23.
4 Respecté zot dignité: Parfois nou bizin dementi bann fausse l’enseignement avek courage. Mais, parski nou envie garde la paix, nou pou evite bouffonne bann dimoune ki croire ek ki enseigne bann kitsoz ki fausse ek dire bann parole blessant lor zot. Si nou donne zot l’impression ki nou pli koné, bann dimoune pa pou envie ecoute nou. Mais si nou montré ki nou ena l’humilité, sa kapav touche leker bann dimoune ki content la verité. Kan nou montré respé pou bann dimoune ek zot croyance, nou permette zot garde zot dignité. Lerla li pli facile pou zot accepté nou message.
5 L’apotre Paul ti prend compte croyance bann dimoune avek ki li ti preché. Li ti faire zeffort pou presente la bonne nouvelle dan enn fason ki ti pou touche zot leker. (Actes 17:22-31) Li ti accepté pou vinn “tou kitsoz pou tou sorte qualité dimoune, pou ki par tou moyen possible [li] kapav sauve certain.” (1 Cor. 9:22) Nou aussi nou kapav faire pareil kan nou preche avek courage, ek en mem temps garde la paix avek tou dimoune.