Imite nou grand Enseignant kan nou servi livre Ki la Bible enseigné?
1. Couma eski Jésus ti enseigné?
1 Nou grand Enseignant, Jésus, ti touletan explik bann kitsoz dan enn fason simple ek clair. Pou faire bann dimoune ki ti pé ecoute li reflechi, parfois li ti demann zot seki zot pensé avant. (Mat. 17:24-27) Li ti attire l’attention lor Parole Bondié. (Mat 26:31; Marc 7:6) Li ti faire attention pou pa touffe so bann disciple ar trop beaucoup renseignement parski li ti koné ki zot ti pou contigne aprann. (Jean 16:12) Jésus ti interessé aussi pou koné si so bann disciple ti croire ek ti comprend seki li ti enseigne zot. (Mat. 13:51) Livre Ki la Bible enseigné? inn faire pou aide nou enseigne dan sa fason-la.
2. Couma nou kapav servi bann question ki ena dan commencement chaque chapitre?
2 Bann question ki ena dan commencement chaque chapitre: Kan ou commence enn chapitre, li bon ki ou attire l’attention lor bann question ki trouve dan commencement enba titre sa chapitre-la. Zis lire bann question-la pou donne etudiant-la plus l’envie pou gagne bann reponse. Ou-soit invite li pou faire bann ti commentaire lor bann question-la. Li pa necessaire pou discute lor so bann commentaire en detail ou-soit pou corrige chaque mauvais reponse ki li donné. Ou zis kapav remercié li pou so bann l’idée ek commence avek bann paragraphe. Bann reponse ki li’nn donné pou aide ou koné si ou bizin tardé plus lor enn certaine partie dan sa chapitre-la.
3. Couma eski nou kapav garde l’etude simple?
3 Bann verset la Bible: L’etude bizin basé lor la Bible. (Héb. 4:12) Mais, pa necessaire lire tou bann verset. Mette l’accent lor bann verset ki montré ki nou bann croyance basé lor la Bible. Pa necessaire lire bann verset ki donne bann renseignement secondaire. Livre Ki la Bible enseigné? presente la verité dan enn fason bien simple. Garde l’etude simple. Concentré lor bann point principal ek evite koz trop beaucoup lor bann detail ou-soit lor bann lezot renseignement ki pa trouve dan sa livre-la, si sa pa necessaire.
4. Ki pou aide nou pou decidé si nou bizin prend le temps pendant l’etude pou examine renseignement ki ena dan l’appendice?
4 L’appendice: Dan l’appendice ena 14 sujet ki donne plus renseignement lor seki expliké dan bann chapitre. Ou pa obligé discute sa bann sujet-la. Pou certain point, ou kapav encourage ou etudiant pou lire bann lezot renseignement ki ena dan l’appendice par li-mem, surtout si li comprend ek si li accepté seki ena dan chapitre-la. Par exemple, kan ou pé faire chapitre 4, “Kisannla Jésus Christ?”, si etudiant-la deja croire ki Jésus li le Messie, kitfois li pa necessaire ki ou examine sujet “Jésus Christ—Messie ki ti promette.” Pou certain chapitre, kitfois li pou bon ki ou prend le temps pendant l’etude pou examine ensam seki ena dan l’appendice lor sa sujet-la ou-soit zis enn ti partie-mem.
5. Si nou decide pou examine bann renseignement ki ena dan l’appendice, couma nou kapav faire sa?
5 Si ou decide pou examine seki ena dan l’appendice, ou kapav prepare bann question a l’avance ek guette bann paragraphe-la ensam avek ou etudiant pareil couma ou faire kan ou examine bann chapitre. Ou-soit dependant ou etudiant, ou kapav decidé pou prend zis dé-trois minute pendant l’etude, pou ré-guette certain renseignement avek li. Sa pou permette ou koné si li comprend seki li lire par li tousel.
6. Couma kapav servi bann question revision ki ena dan l’encadré a la fin chaque chapitre?
6 Bann l’encadré revision: Dan l’encadré ki trouve a la fin chaque chapitre, ena bann l’idée ki en general reponn bann question ki posé dan commencement chapitre-la. Ou kapav servi sa bann l’idée-la pou revise bann point principal dan sa chapitre-la. Certain proclamateur inn trouve sa bon pou lire ensam avek etudiant-la chaque l’idée ek kitfois bann verset la Bible ki mentionné. Lerla zot demann etudiant-la pou expliké, sans rente dan bann detail, couma sa bann verset-la prouve sa l’idée-la. Sa permette enseignant-la pou koné si etudiant-la comprend bien bann point principal ki ena dan sa chapitre-la ek couma la Bible appuye sa bann l’idée-la ek si li d’accord avek sa. Sa method-la aussi forme etudiant-la pou servi la Bible pou explik lezot la verité.
7. Couma eski nou kapav servi livre Ki la Bible enseigné? pou accompli nou mission?
7 Imite bann method ki Jésus ti servi kan li ti enseigné, sa-mem fason pli efficace pou accompli nou mission pou enseigne bann dimoune ek faire bann disciple. (Mat. 28:19, 20) Livre Ki la Bible enseigné? kapav aide nou pou faire sa. Servi sa livre-la bien pou enseigne lezot la verité dan enn fason clair, simple ek interessant.