Servi Liv Ki la Bible enseigné? dan enn Fason Efikas

Amezir ki enn etidian Labib aprann seki Labib ansegne vremem ek aplik seki li aprann, li pou grandi ek li pou raport bann frwi lor plan spiritiel. (Ps. 1:1-3) Nou kapav ed nou etidian pou progrese kan nou servi bien bann karakteristik bien itil ki ena dan liv Ki la Bible enseigné?

Bann Kestion dan Koumansman: Sak sapit koumans avek bann kestion, ek bann repons-la trouv dan sapit-lamem. To kapav lir bann kestion-la pou donn etidian-la plis anvi pou gagn bann repons ki li pou aprann dan sapit-la. Ouswa to kapav invit li pou fer enn ti komanter lor sak kestion. Li pa neseser pou koriz li si li donn enn move repons asterla. Bann repons ki li pou done pou ed twa kone si to bizin pas plis letan pou explik li enn sertin parti.​—Prov. 16:23; 18:13.

Appendice: Si enn etidian konpran ek aksepte seki’nn explike dan enn sapit, to kapav ankouraz li pou lir bann ransegnman ki ena dan l’appendice par limem. Prosenn fwa ki zot fer letid, to kapav pran de-trwa minit pou fer sir ki li finn bien konpran sa parti dan l’appendice la. Selman, si li pli bon pou etidian-la, to bizin pran letan pandan letid pou examinn bann ransegnman ki ena dan l’appendice, ouswa sertin parti. To kapav fer sa kan to lir bann paragraf-la ek poz bann kestion ki to’nn prepare alavans.

Lankadre Revizion: Dan lankadre ki ena alafin sak sapit, ena bann lide ki reponn bann kestion ki poze dan koumansman sapit-la. To kapav servi sa bann lide-la pou fer sir ki to etidian finn konpran ek ki li kapav explik bann pwin prinsipal. Lir sak fraz avek etidian-la ek lir sak verse ki site. Apre, invit to etidian pou servi sa bann verse-la pou explike kifer sa bann fraz-la vre.​—Zist. 17:2, 3.