Servi bien le temps ki ou passé dan ministere
1 Ena encore beaucoup kitsoz pou faire dan nou ministere, ek pa reste beaucoup lé-temps. (Jean 4:35; 1 Cor. 7:29) Si nou organise-nou bien ek ki nou faire enn programme a l’avance, nou pou kapav profite bien le temps ki nou’nn reservé pou ministere.
2 Prepare-ou: Avant ki ou al reunion predication, verifié bien ki ou ena bann publication ki ou pou servi ek prepare bien ou presentation dan ou l’esprit. Kan reunion predication fini par la priere, al desuite dan territoire. Sa pou permette ou ek bann ki travail avek ou pou faire maximum possible dan le temps ki ou finn reservé pou predication.
3 Si bann ancien inn confié ou responsabilité pou dirige reunion predication, commence a l’heure. Faire enn ti reunion—pa plus ki 10 a 15 minute. Avant ki ou laisse groupe-la allé, faire sur ki sakenn koné kot-sa li pou travail ek avek kisannla li pou travail.
4 Pendant ki ou dan ministere: Enn fois ki reunion predication fini, pa tarde-tardé pou nanyin, mais al direct dan territoire. Si ou pensé pou arrete boner, faire l’arrangement pou ou prop transport pou ki le reste groupe pa bizin arrete boner zot aussi. Kan ou preche ensam avek enn groupe, ena consideration pou lezot. Pa trop tardé dan enn conversation, parski kitfois groupe-la pé attann ou fini. Sa vedir ki ou pou bizin kitfois, avek tact, quitte enn dimoune ki envie leve enn bel discussion ou-soit faire bann l’arrangement pou revinn visite bann ki interessé.—Mat. 10:11.
5 Pou ou pa perdi le temps, faire tou visite ki ou ena dan enn l’endroit avant ki ou al dan enn lot l’endroit. Ou kapav telephone certain dimoune avant ou al faire zot visite pou faire sur ki zot pou là. (Prov. 21:5) Si ou pensé ki ou visite pou prend le temps, faire l’arrangement pou ki bann ki dan ou groupe preche dan mem l’endroit, ou-soit ou kapav contigne la conversation dan enn prochain visite.
6 Nou pé vive dan lepok kot ena enn grand recolte spirituel. (Mat. 9:37, 38) Bientot sa travail-la pou fini. Alors, nou bizin envie servi bien nou lé-temps dan nou ministere.