“Anou rann temoignage a fond”—kan nou donne temoignage dan bann l’appartement
1. Ki sa impliké pou ‘rann temoignage a fond lor la bonne nouvelle’?
1 Pareil couma l’apotre Paul, nou envie ‘rann temoignage a fond lor la bonne nouvelle.’ (Actes 20:24) Alors nou faire zeffort pou joinde maximum dimoune dan nou territoire pou partage message Royaume Bondié avek zot. Sa implik aussi bann dimoune ki reste dan bann l’appartement. Parfois, sa kapav difficile pou joinde bann dimoune ki reste dan sa bann l’appartement-la. Mais, parski ena beaucoup dimoune ki reste dan bann l’appartement sa donne nou beaucoup l’occasion pou partage la bonne nouvelle.
2. Kifer nou bizin montré-nou prudent ek manifesté enn bon jugement kan nou donne temoignage dan bann l’appartement?
2 A cause crime ek violence, beaucoup l’appartement fermé a-clé ek ena bann gardien ou-soit bann camera. (2 Tim. 3:1, 2) Bann ki en charge sa batiment-la kapav etabli enn regle ki bann dimoune ki pa’nn gagne enn l’invitation par bann dimoune ki reste la, pa gagne droit rentré. Enn gardien kapav demann nou pou quitte sa l’appartement-la, surtout si enn parmi bann dimoune ki reste la finn faire complainte. Alors, li important ki nou montré-nou prudent ek nou manifesté enn bon jugement.
3. Kan li pli bon ki nou preche dan bann l’appartement, ek kifer?
3 Kan pou preché: Pareil couma dan lezot territoire, li pli bon ki nou preche dan bann l’appartement kan ena plus chance ki bann dimoune kot zot. Bann dimoune kapav gagne bann doute lor nou si nou vinn dan bann l’appartement kan la plupart dimoune ki reste la, absent. Beaucoup proclamateur finn reussi joinde bann dimoune kot zot tard dan l’apré-midi, apré zot travail ek aussi dan samedi ek dimanche apré-midi. Si nou preche trop boner dan bann l’appartement, surtout dan bann week-end, bann dimoune kapav faire bann complainte ar bann ki en charge sa batiment-la.
4, 5. Couma nou kapav rente dan bann l’appartement ki zot l’entrée fermé a-clé?
4 Rente dan bann l’appartement: Fodé pa ki bann proclamateur contacté responsable sa batiment-la avant ki zot commence preché. Si batiment-la fermé a-clé ek ena enn interphone en dehors l’entrée, nou kapav servi interphone-la pou trouve enn kikenn ki accepté pou laisse nou rentré pou koz ar li. Dependant lor fason ki bann l’appartement-la été, nou kapav al tape lezot la porte, apré ki nou’nn fini koz ar dimoune ki’nn donne nou permission pou rentré-la. Mais dan lezot cas, li pou sage ki nou quitte batiment-la ek nou servi interphone pou joinde enn lot dimoune ki reste dan sa l’appartement-la. Nou bizin manifesté bon jugement kan nou decidé comié dimoune nou pou contacté dan sa fason-la, dan sa mem l’occasion-la.
5 Certain dimoune prefere ki ou dire zot lor interphone pou ki raison ou pé visite zot. Dan sa cas-la, li pou bon ki ou presente-ou dan enn fason amical. Si ou’nn trouve nom dimoune-la dan la liste a coté ar interphone, li pou bon ki ou servi so nom kan ou koz avek li. Mentionne sujet ki ou pé presenté dan enn fason bien clair. Certain proclamateur finn gagne bann bon resultat kan zot finn lire enn introduction directement dan livre Comment raisonner.
6. Ki nou bizin faire kan nou preche dan bann l’appartement kot ena enn gardien?
6 Si gardien dan sa batiment-la pa permette nou joinde bann dimoune ki reste la, nou kapav faire zeffort pou rann li-mem temoignage. Beaucoup gardien content lire nou bann publication. Nou kapav mem commence ek dirige enn l’etude la Bible avek li dan l’entrée. Si gardien-la permette nou pou retourne visite enn dimoune ki ti montré l’interet, li pou pli bon ki nou pa al tape la porte lezot dimoune dan sa batiment-la.
7. Ki nou bizin rappel concernant nou sac predication?
7 Nou l’apparence ek nou bann bon maniere: Si nou amenn enn gros sac, bann dimoune pou remark nou bien. Alors, nou kapav pense pou amenn enn ti sac ou-soit pou pa amenn okenn sac. Certain proclamateur mette publication ki zot pou presenté dan enn ti file ek zot sarié zot la Bible dan zot la main ou-soit dan zot poche.
8. Couma bann proclamateur bizin organise-zot pou donne temoignage dan bann l’appartement?
8 Pou pa attire trop l’attention lor nou, li pli bon ki nou pa faire bann grand groupe, surtout dan bann l’entrée ou-soit dan bann parking. Nou bizin prend bann precaution approprié kan nou preche dan bann l’appartement ki trouve dan bann region kot ena beaucoup violence. (Prov. 22:3) Par exemple, quatre ou six proclamateur kapav preche assez pré ensam lor mem l’etage pou zot tann zot camarade; kitfois sakenn so tour kapav tape la porte, pendant ki lezot attann.
9. Couma nou kapav montré ki nou ena bann bon maniere, ek kifer li important nou faire sa?
9 Kan ou rente dan enn l’appartement, souye ou lipié ek ferme bien la porte l’entrée derriere ou. Kan nou montré bann bon maniere coumsa, nou pa pou donne l’occasion bann dimoune ki reste la pou faire complainte. Enn fois ki ou rente dan batiment-la, al direct vers l’ascenseur ou-soit vers l’etage kot bizin preché, au lieu ki ou reste deboute dan l’entrée. Sa pou empeche bann ki pé observé pou gagne bann doute lor nou.
10. Couma nou kapav evite faire beaucoup tapaz dan bann couloir?
10 Dan beaucoup l’appartement, tapaz resonné dan bann couloir. Alors, pa koz pli fort ki bizin pou ki dimoune-la tann ou. Kan ou koz avek lezot proclamateur, pa koz fort, mais koz lor enn ton calme ek raisonnable pou pa faire lezot gagne bann doute lor ou. Pou pa derange bann dimoune ki reste-la, certain proclamateur, au lieu ki zot tape bann la porte enn apré lot, zot commence par enn boute couloir, apré zot al dan lot boute, ziska ki zot fini faire tou bann appartement lor sa l’etage-la. En plus, si nou tape la porte bann dimoune fort, sa kapav faire zot gagne peur.
11. Ki bann suggestion nou kapav suive kan nou tape enn la porte ki ena enn ti trou ki permette bann dimoune pou trouve nou?
11 Si dan la porte-la ena enn ti trou ki permette dimoune ki endan pou trouvé kisannla pé tapé, deboute dan enn fason ki li kapav trouve ou avek ou compagnon bien. Guette direct dan sa ti trou-la ek kan ou remarké ki enn kikenn pé guette ou, dire enn grand bonjour ek commence ou presentation. Si dimoune-la demandé, ‘Kisannla sa?’ li pou pli bon ki ou dire ou nom ek nom sa proclamateur ki avek ou-la. Lerla dimoune-la kapav senti-li pli a l’aise pou ouvert la porte. Mem si dimoune-la pa ouvert la porte, ou kapav faire ou presentation.
12. Couma nou kapav evite bann probleme kan nou quitte bann publication kot bann absent?
12 Bann absent: Souvent bann responsable faire complainte ki zot bizin ramasse bann publication dan batiment ou-soit en dehors. Si ou quitte bann publication devant enn la porte, li kapav tombé ek faire saleté enba. Alors, kan ou quitte bann publication kot bann absent, fodé pa ki lezot dimoune trouve sa bann publication-la.
13. Ki nou bizin faire si nou joinde enn dimoune ki en colere?
13 Bann dimoune ki en colere: Si nou joinde enn dimoune ki en colere ek ki pé rod appel gardien sa batiment-la, li pli bon ki nou quitte sa l’etage-la, nou allé ek nou revini enn lot fois. Dan bann lezot cas, li pou pli sage ki nou quitte batiment-la pou evite gagne probleme avek gardien-la. Mem si sa dimoune ki en colere-la pa dire nou pa revinn guette li, li pou bon ki nou note numero so l’appartement ek nou mette enn note dan carte territoire pou faire koné ki c’est enn dimoune ki fodé pa visité. Pareil couma nou faire ar bann lezot dimoune ki pa’lé nou visite zot, de temps en temps, nou kapav joinde sa bann dimoune-la pou guetté si zot l’attitude finn changé.
14, 15. Ki nou bizin faire si enn dimoune ki responsable enn l’appartement dire nou allé?
14 Si demann ou pou allé: Si letan ou pé preché, gardien-la ou-soit responsable securité sa batiment-la dire ou allé, li pli sage ki ou obeir desuite. Autant ki possible, nou envie evite gagne bann probleme ki kapav amenn bann dimoune pou menace pou poursuive nou la cour ou-soit pou appel la police. Dan la plupart cas, bann personnel l’appartement pena okenn prejugé kont bann Témoins de Jéhovah mais zot pé zis faire zot travail.
15 Parfois, kan dimoune ki occupe sa batiment-la dire ou allé, ou kapav explik li avek tact ek gentillesse raison ou visite. (1 Pierre 3:15) Nou reconette ki c’est so responsabilité pou veille lor securité bann dimoune ki reste-la ek pou donne zot satisfaction. Kitfois li pou laisse ou reste dan batiment-la. Mais si li pa d’accord pou ou resté, allé sans discuté. Si situation permette, ou kapav demann permission pou vinn quitte regulierement bann publication dan l’entrée. (Col. 4:6) Surveillant service bizin bien au courant sa bann situation-la.
16. Ki nou bizin faire si nou contigne gagne bann probleme kan nou pé rod preche dan bann l’appartement?
16 Kitfois, apré enn bon boute le temps bann proclamateur kapav essaye preche dan batiment-la sans faire zot remarké par lezot dimoune. Mais si contigne gagne bann probleme, bann ancien pou bizin prend contact avek filiale pou gagne l’aide au lieu ki bann proclamateur essaye reglé bann probleme par zot-mem. Si bann proclamateur pa kapav preche dan bann l’appartement, zot bizin faire bann zeffort pou joinde bann dimoune ki reste-la par lezot fason, par exemple par telephone ou-soit par bann lettre. Certain proclamateur donne temoignage informel devant ou-soit pré kot sa batiment-la gramatin kan bann dimoune pé al travail ek tantot kan zot pé retourne lakaz.
17. Kifer li important ki nou donne temoignage dan bann l’appartement?
17 La fin sa mauvais le monde-la pé kosté. Zis bann ki invok nom Jéhovah ki pou sapé. “Mais, couma eski zot pou invok enn kikenn en ki zot pena la foi? Ek couma eski zot pou ena la foi en enn kikenn, alors ki jamais zot pa finn tann koz lor li?” (Rom. 10:13, 14) Beaucoup dimoune ki “ena l’attitude ki bizin pou gagne la vie eternel” reste dan bann l’appartement. (Actes 13:48) Kan nou montré-nou prudent ek nou manifesté enn bon jugement, nou pou kapav faire sa bann dimoune-la konn la bonne nouvelle.