Campagne special pou annonce Mémorial!
1. Ki bann proclamateur pou faire partout lor la terre a partir le 21 mars 2009, ek kifer?
1 Jeudi 9 avril 2009, bann serviteur Jéhovah partout lor la terre pou joinde ensam pou reflechi lor l’importance pli grand action ki Jéhovah inn faire pou tou dimoune parski Li content nou. (Rom. 5:6-8) Nou attann avek impatience pou trouve bann million dimoune ki interessé joinde ar nou pou celebré la mort Jésus. Enn l’invitation special pou distribué partout lor la terre a partir le 21 mars.
2. Ki kitsoz nou bizin rappel kan nou donne l’invitation?
2 Rappel: Servi bien bann zimage, bann question, ek bann texte la Bible ki ena dan l’invitation-la. Par exemple, ou kapav montré sa l’invitation-la ek dire: “Mo ti pou content invite ou pou commemore la mort Jésus. Nou pou celebré sa jeudi le 9 avril 2009.” Apré lire titre l’invitation-la ek bann question ki ena lor la. Faire sur ki dimoune-la comprend ki li kapav amenn so famille ou-soit n’importe kisannla ki li envie avek li.
3. Ki ou kapav faire apré ki ou’nn invite enn dimoune commencement campagne?
3 Si ou congregation ena enn grand territoire, bann ancien kapav demann ou pou laisse bann l’invitation kot bann absent. Dan week-end, offert bann periodik ensam avek l’invitation. Fixé l’objectif pou invite bann visite, bann etudiant la Bible, bann famille, bann camarade lekol, bann collegue travail, bann voisin, ek lezot connaissance. L’année derniere, enn soeur ti invite 30 dimoune dan so famille. Regulierement li ti rappel zot l’importance sa l’evenement-la. Vrai-mem li ti bien content ki 25 dimoune ti vini, ek 4 parmi zot ti accepté enn l’etude la Bible!
4. Ki preparation nou bizin faire asterla, ek kifer?
4 Prepare-ou asterla-mem: Kitfois beaucoup proclamateur pou kapav augmente zot l’activité pendant mois mars ek avril. Si ou ena bann zenfant ou-soit bann etudiant ki pé faire bann bon progré, sa kapav enn bon l’occasion pou zot pou vinn bann proclamateur non-baptisé. Asterla inn ler pou commence faire bann l’arrangement pou participe maximum possible dan sa campagne ki faire bann dimoune konn deux pli grand action ki’nn faire par amour.—Jean 3:16; 15:13.