Campagne pou annonce Mémorial commencé a partir le 17 mars
1. Ki pou commencé le 17 mars?
1 Nou celebré Mémorial chaque l’année pou proclame la mort Jésus. (1 Cor. 11:26) A cause sa, nou envie ki bann dimoune vinn assisté Mémorial ensam avek nou ek aprann plus lor la ranson, cadeau ki Jéhovah inn donne nou avek beaucoup l’amour. (Jean 3:16) En 2012, campagne l’invitation pou Mémorial pou commencé samedi le 17 mars. Eski ou’nn prevoir pou faire plus pendant sa lepok-la?
2. Couma nou kapav presente sa l’invitation-la?
2 Ki nou kapav dire: Li pli bon ki nou faire enn presentation bien courte. Ou kapav dire: “Bonjour. Nou’nn vinn invite ou ek ou famille pou enn l’evenement bien important ki celebré chaque l’année partout dan le monde entier. Sa l’année-la nou pou celebré li le 5 avril. Pou ena enn discours biblik gratis ki pou expliké seki la mort Jésus inn accompli ek ki Jésus pé faire asterla. Lor sa l’invitation-la ou pou trouve l’heure ek l’adresse kot-sa sa reunion-la pou deroulé dan ou l’endroit.” Dan bann week-end, nou kapav offert aussi bann periodik kan li approprié.
3. Couma nou kapav invite maximum dimoune?
3 Invite maximum dimoune: Nou l’objectif principal c’est pou invite maximum dimoune. Alors, surtout pa blié invite ou bann l’etude, bann visite, famille, collegue travail, camarade lekol, voisin, ek bann lezot dimoune ki ou koné. Bann ancien dan ou congregation pou faire bann l’arrangement pou reussi couvert tou bann territoire. Toulé l’année sa campagne ki nou faire pou invite bann dimoune vinn assisté Mémorial-la, produire bann bon resultat. Kan enn madame ti vinn assisté Mémorial l’année derniere, enn frere dan service l’accueil ti propose pou aide li rod sa proclamateur ki ti invite li-la. Mais madame-la ti dire ki li pa konn personne ici ek ki li ti gagne sa l’invitation-la ar enn kikenn ki ti pé passé lakaz-lakaz, pli boner dan la journée.
4. Kifer ou pou participe avek zele dan sa campagne-la?
4 Kitfois enn kikenn kapav vinn assisté Mémorial parski ou finn donne li enn l’invitation. Ki dimoune-la vini ou-soit non, bann zeffort ki ou faire pou al invite lezot pou deja rann enn temoignage. Bann l’invitation ki ou pou donne bann dimoune pou proclamé ki asterla Jésus li enn le Roi ki bien puissant. Kan ou participe avek zele dan sa campagne-la ou pou montré bann dimoune ki pé observe ou, setadir bann dimoune dan ou territoire, lezot proclamateur, ek surtout Jéhovah, ki ou ena beaucoup reconnaissance pou la ranson.—Col. 3:15.