Pou commence distribué l’invitation Mémorial le 2 avril
1. Kan eski nou pou distribué bann l’invitation Mémorial sa l’année-la, ek ki l’importance sa campagne-la ena?
1 A partir 2 avril ziska 17 avril, nou pou distribué bann l’invitation pou l’evenement pli important ki ena dan l’année—Mémorial la mort Christ. Dan le passé, beaucoup dimoune ki ti interessé finn bien reagir ar sa campagne ki nou faire toulé-l’année-la. Par exemple, jour Mémorial, enn madame ti telephone Béthel ek ti dire: “Mo fek rente kot moi, ek mo’nn trouve enn l’invitation enba mo la porte. Mo envie assisté sa l’evenement-la, mais mo pa sur ki ler sa commencé.” Frere ki ti prend sa call telephone-la ti explik madame-la kot-sa li kapav trouve sa l’information-la lor so l’invitation. Sa madame-la ti termine so conversation avek enn promesse: “Mo pou assisté sa l’evenement-la tantot!”
2. Ki nou kapav dire kan nou pé presente sa l’invitation-la?
2 Couma nou pou offert sa: Parski nou ena enn tigit le temps pou couvert territoire, li pli bon ki nou pa prend beaucoup le temps. Nou kapav dire: “Bonjour. Nou ti pou content donne ou famille sa l’invitation-la. C’est pou enn celebration important ki nou faire toulé-l’année partout dan le monde. Sa l’année-la nou pou celebré li dimanche, 17 avril. [Donne dimoune-la l’invitation-la.] Sa date-la c’est date l’anniversaire la mort Jésus. Pou ena enn discours la Bible kot tou dimoune invité, ki pou expliké couma nou kapav tire profit ar ranson ki Christ inn donné. Lor sa l’invitation-la ou kapav trouve ler ek l’adresse kot sa reunion-la pou deroulé dan nou l’endroit.”
3. Couma nou kapav invite maximum dimoune?
3 Si congregation ena enn grand territoire, bann ancien kapav demann bann proclamateur pou quitte bann l’invitation kot bann absent, mais selman zot bizin mette li dan enn place kot bann dimoune ki passé pa pou trouvé. Faire sur ki ou invite ou bann visite, bann famille, bann collegue travail, bann camarade lekol ek lezot dimoune ki ou koné. Dan week-end, kan ou pé participe dan sa campagne-la, offert bann periodik kan li approprié. Eski ou kapav faire pionnier auxiliaire pendant mois avril ek participe plus dan sa campagne ki faire gagne beaucoup la joie-la?
4. Kifer nou envie ki bann dimoune interessé assisté Mémorial?
4 Bann dimoune ki interessé ek ki assisté Mémorial pou gagne vrai-mem enn grand temoignage! Zot pou tann koz lor grand l’amour ki Jéhovah inn manifesté kan Li’nn donne la ranson. (Jean 3:16) Zot pou aprann ki bann benediction bann dimoune pou gagné grace a Royaume Bondié. (Is. 65:21-23) Zot pou gagne l’encouragement pou al guette bann frere ki occupe service l’accueil ek demann bannla enn l’etude la Bible pou zot kapav konn plus. Nou souhaité ki beaucoup dimoune sincere pou bien reagir ar sa campagne-la ek pou assisté Mémorial ensam avek nou!