Montré reconnaissance pou pli grand cadeau ki Bondié inn donné
1. Kifer nou bien reconnaissant envers Jéhovah?
1 Parmi tou bann “joli don” ki Jéhovah finn donné, pli grand don ki nou finn gagné, c’est la ranson par so Garson ki Li bien content. (Jacq. 1:17) Sa finn permette nou gagne beaucoup benediction, parmi ena pardon pou nou bann peché. (Éph. 1:7) Nou touletan reconnaissant pou sa. Pendant lepok Mémorial, nou prend surtout le temps pou medite lor sa cadeau ki ena enn grand valeur-la.
2. Couma en famille ek personnellement nou kapav augmente nou reconnaissance pou la ranson?
2 Augmente nou reconnaissance: Nou kapav profite nou soirée pou l’etude familial pou examine bann renseignement lor la ranson ek lerla augmente reconnaissance nou famille pou sa disposition-la. Nou kapav faire sa pendant bann semaine avant le 30 mars, date Mémorial. Examine aussi lecture la Bible pou Mémorial toulé-jour avek ou famille. Reflechi personnellement couma la ranson finn faire ou gagne bann bienfait, ek finn influence fason ki ou considere Jéhovah, ou-mem, lezot, ek l’avenir.—Ps. 77:12.
3. Couma nou kapav montré nou reconnaissance?
3 Montré nou reconnaissance: Nou reconnaissance pou la ranson pousse nou pou koz avek lezot lor Jéhovah ek lor so grand l’amour kan Li’nn envoye so Garson. (Ps. 145:2-7) Pendant mois mars, avril ek mai, certain famille montré zot reconnaissance kan zot organise-zot pou ki au moins enn membre dan la famille faire pionnier auxiliaire. Si sa pa possible, eski ou kapav “réacheté le temps” pou augmente ou l’activité dan ministere? (Éph. 5:16) Reconnaissance pou motive nou aussi pou aide lezot pou vinn Mémorial avek nou. (Rév. 22:17) Commence faire la liste bann visite, l’etude, famille, collegue travail, ek voisin ki ou pou invité, ek apré, faire ou maximum dan campagne special pou invite bann dimoune pou l’invitation pou Mémorial.
4. Couma nou kapav servi nou le temps pendant lepok Mémorial?
4 Lepok Mémorial donne nou bann nouveau l’occasion pou montré Jéhovah ki quantité nou apprecié sa cadeau ki Li’nn donne l’humanité-la. Anou servi sa le temps-la pou augmente ek pou montré nou reconnaissance pou la ranson, ek pou tou “bann richesse Christ ki nou pa kapav comprend.”—Éph. 3:8.