Anou montré ki nou ena reconnaissance
Pou celebré Mémorial le 17 avril
1. Pareil couma sa psalmiste-la, ki sentiment li bon nou ena pendant lepok Mémorial?
1 Apré ki enn psalmiste ti medite lor seki Jéhovah ti faire pou montré So misericorde ek pou delivré So bann serviteur, li ti pose sa question-la: “Ki mo pou rann Jéhovah pou tou so bann benediction envers moi?” (Ps. 116:12) Azordi, bann serviteur Bondié ena encore plus raison pou montré zot reconnaissance. Plusieurs siecle apré ki ti ecrire sa bann parole inspiré-la, Jéhovah ti donne bann dimoune pli grand cadeau ki zot kapav gagné—la ranson. A mesure ki nou pé prepare-nou pou celebré la mort Christ le 17 avril, nou ena bann bon raison pou montré nou reconnaissance.—Col. 3:15.
2. Cite certain raison kifer nou ena reconnaissance pou la ranson.
2 Bann benediction ki nou gagné grace a la ranson: Grace a la ranson, nou kapav gagne “pardon pou nou bann peché.” (Col. 1:13, 14) Sa permette nou adore Jéhovah avek enn conscience pur. (Héb. 9:13, 14) Kan nou prié Jéhovah, nou kapav koz avek Li avek franchise. (Héb. 4:14-16) Bann ki ena la foi dan la ranson, ena l’esperance extraordinaire pou gagne la vie pou touletan!—Jean 3:16.
3. Couma nou kapav montré nou reconnaissance envers Jéhovah pou la ranson?
3 Couma montré nou reconnaissance: Enn fason ki nou montré nou grand reconnaissance c’est kan chaque jour nou faire nou lecture la Bible pou Mémorial ek nou medite lor la. Pou aide nou faire sa, nou kapav servi lartik: “ Êtes-vous prêt pour le jour le plus important de l’année ? ” ki trouve dan La Tour de Garde 1er février 2011, en français. A travers bann la priere sincere, nou kapav aussi dire Jéhovah ki quantité nou apprecié la ranson. (1 Thess. 5:17, 18) Nou montré ki ena reconnaissance, kan nou present letan pé celebré Mémorial, en accord avek commandement ki Jésus inn donné. (1 Cor. 11:24, 25) En plus, nou kapav imite grand l’amour ki Jéhovah ena pou tou bann dimoune, kan nou invite autant dimoune ki possible pou assisté Mémorial ensam avek nou.—Is. 55:1-3.
4. Ki determination nou bizin ena?
4 Bann serviteur Jéhovah ki ena reconnaissance pa pou considere Mémorial la mort Christ couma bann lezot reunion ki zot assisté. Sa-mem reunion pli important ki ena dan l’année! Alors ki Mémorial pé kosté, anou ena mem determination ki enn psalmiste. Li ti ecrire: “Beni Jéhovah, o mo nâme, ek pa blié tou so bann action.”—Ps. 103:2.