An Novam Pou Distribie Nouvel lor Rwayom No. 38!
1. Ki bann kestion boukou dimounn poz zot konsernan bann ki’nn mor, ek kouma zot pou gagn repons sa bann kestion-la an Novam?
1 Lamor li kouma enn lennmi pou tou dimounn, mem si zot ena diferan krwayans. (1 Cor. 15:26) Boukou dimounn demann zotmem: Kotsa bann dimounn mor ete? Eski pou kapav retrouv zot enn zour? Pou reponn sa bann kestion-la, bann kongregasion dan lemond antie pou partisip dan enn kanpagn kot pou distribie Nouvel lor Rwayom No. 38 ki pou dire pandan enn mwa. Tit sa Nouvel lor Rwayom-la se: “Eski Vremem Bann Ki’nn Mor Kapav Reviv?” Sa kanpagn spesial la pou koumanse le 1e Novam. Apre sa distribision spesial la, nou pou kapav servi Nouvel lor Rwayom No. 38 kouma enn trak dan predikasion.
2. Mansionn bann karakteristik Nouvel lor Rwayom No. 38.
2 So Bann Karakteristik: Nouvel lor Rwayom No. 38 inn fer dan enn fason ki kan pliy li an longer, lor so premie paz ou trouv so tit ki bien interesan ek sa kestion-la: “Eski ou pou reponn . . . wi? non? kitfwa?” Kan enn dimounn ouver trak-la, li pou trouv repons ki Labib done pou tit sa trak-la ek bann bienfe ki li kapav gagne gras-a promes ki ena dan Labib. Li pou osi trouve kifer li kapav krwar seki Labib dir. Lor so dernie paz ena enn kestion bien interesan ki fer li reflesi ek ki invit li pou aprann plis lor sa size-la.
3. Kouma pou distribie Nouvel lor Rwayom No. 38?
3 Kouma Pou Distribie Sa Trak-La?: Sa kanpagn-la pou parey kouma bann kanpagn invitasion ki fer pou Memoryal ek lasanble distrik. Bann ansien pou fer kongregasion kone kouma pou travay teritwar, an-akor avek bann linstriksion ki zot inn gagne dan let 1e Avril 2013. Bann kongregasion ki ena enn ti teritwar kapav ed bann kongregasion alantour ki ena enn gran teritwar. Kan gagn Nouvel lor Rwayom No. 38 dan kongregasion, pa bliye pou pran zis kantite ki ou pou servi pou enn semenn. Pandan kanpagn, si’nn fini fer tou teritwar, kapav distribie bann trak-la dan bann plas piblik. Si’nn fini plas tou bann trak avan lafin Novam, kapav propoz bann dimounn piblikasion ki pou ofer pandan sa mwa-la. Pou premie Samdi dan mwa Novam, nou pou konsantre plis lor sa kanpagn spesial la olie ki nou esey koumans bann letid Labib. Dan wikenn, nou pou osi ofer bann magazinn ansam avek Nouvel lor Rwayom, kan sa li apropriye. Eski ou pe prepar ou pou partisip afon dan sa kanpagn spesial la?