Enn lettre College central

Cher compagnon Témoins de Jéhovah:

C’est vrai-mem enn grand l’honneur ki nou ena en tant ki peuple Bondié pou porte nom Jéhovah, Souverain l’univers! Sa nom-la li eternel, jamais li pou disparette ek pa kapav compare li ar nanyin. C’est Jéhovah Li-mem ki’nn donne nou sa nom ki bien different avek tou lezot nom-la. Surtout depuis 1931, bann dimoune kapav identifié nou par sa nom-la. (Is. 43:10) C’est avek enn grand fierté ki nou identifié nou couma bann Témoins de Jéhovah.

Satan le Diable pa pé arrete faire zeffort pou faire bann dimoune blié nom Bondié. Bann nation ki li controlé meprise nom Jéhovah. Babylone la Grande, setadir l’empire mondial bann fausse religion, detesté nom Bondié ek finn tire li dan beaucoup traduction la Bible. Jésus li, li ti different, li ti glorifié nom so Papa. Li ti mette sa en premier dan la priere modele ki li ti enseigne so bann disciple. Li ti dire zot: “Alors, c’est coumsa ki zot bizin prié: ‘Nou Papa ki dan le ciel, ki to nom sanctifié.’” (Mat. 6:9) Plitar, dan enn la priere sincere ki li ti faire ar so Papa, li ti dire: “Mo finn faire bann dimoune ki to finn donne moi, ek ki sorti dan le monde, konn to nom.” (Jean 17:6) Nou ki suive bon l’exemple Jésus, nou plus decidé ki jamais pou proclame nom Jéhovah bien fort ek avek zele partout lor la terre.

Texte pou l’année 2009: ‘Rann temoignage a fond lor la bonne nouvelle,’ ti pousse nou pou accompli nou ministere a fond. (Actes 20:24) Pena doute ki Jéhovah finn bien beni nou bann zeffort pendant dernier l’année service. Nou finn donne enn grand temoignage partout lor la terre pou la gloire ek l’honneur nom Jéhovah. Enn nouveau maximum 7,313,173 proclamateur finn joinde zot la voix ensam pou preche ar tou dimoune, ek aussi pou enseigne bann dimoune ki ena enn leker sincere ek ki pé rod bann solution ar sa quantité probleme ki zot pé gagné toulé-jour-la. Pou Mémorial la mort Jésus, ti ena enn l’assistance 18,168,323 dimoune. Sa montré ki dan l’avenir ena encore plusieurs million dimoune ki kapav invok nom Jéhovah avant la fin sa mauvais systeme-la.

Tant ki Jéhovah pou permette, nou pou contigne preche la bonne nouvelle lor so Royaume avek zele. Nou pou servi tou sorte qualité moyen possible pou joinde bann dimoune dan nou territoire. (Mat. 24:14; Marc 13:10) Ki nou preche de porte en porte, lor chemin, par lettre ek par telephone, ou-soit par temoignage informel, anou faire tou seki nou kapav pou faire pli beaucoup dimoune possible konn nom Jéhovah ek so projet.

Nou ena tou bann raison pou croire ki Jéhovah pa pou tardé pou sanctifié so nom. (Ézék. 36:23) Jour pé kosté kot tou bann ki pé gate so reputation, pou detruire. Sa jour-la pou vrai-mem enn jour extraordinaire pou tou bann serviteur Jéhovah, ki finn faire konn so nom ek finn soutenir so souveraineté!

Nou ti trouvé ki quantité Jéhovah prend soin so peuple pendant l’assemblée district ek international “Contigne veillé!” ki ti ena preské partout lor la terre en 2009. Sa bann l’assemblée-la ti bann grand moment dan l’histoire theocratik. Zot finn motive nou pou ki nou plus conscient lor l’importance pou veille bien jour Jéhovah.—Marc 13:37; 1 Thess. 5:1, 2, 4.

Oui, Jéhovah bon envers nou; Li rempli nou leker ar la joie. Li faire nou allongé dan bann la plaine kot ena beaucoup l’herbe ek dirige nou dan bann place kot ena bien de l’eau ek kot nou kapav reposé.—Ps. 23:1, 2; 100:2, 5.

Ena l’assurance ki Jéhovah pou contigne beni ou pendant ki ou reste occupé dan so service dan bann mois ki pé vini!

Nou transmette nou bann frere ek soeur dan le monde entier, tou nou l’affection fraternel,

Zot bann frere,

College central bann Témoins de Jéhovah