Role l’esprit saint dan creation!
“Par parole Jéhovah, le ciel finn faire, ek par l’esprit so la bouche, tou so l’armée.”—PS. 33:6.
1, 2. (a) Couma connaissance bann dimoune lor l’univers ek lor la terre finn augmenté avek le temps? (b) Ki question ki demann enn reponse?
KAN en 1905, Albert Einstein ti publié so theorie, ki appel en français théorie de la relativité, li ek beaucoup lezot scientifik ti croire ki dan l’univers ti ena zis enn sel galaxie—la Voie lactée. Zot ti vrai-mem sous-estime grandeur l’univers! Zordi, nou pensé ki dan l’univers ena plus ki 100 milliard galaxie ek dan certain galaxie ena plusieurs milliard zetoile. Bann dimoune servi bann telescope bien sophistiké ek bien puissant lor la terre ou-soit zot place sa bann telescope-la tout autour la terre, ek sa permette pou decouvert encore plus galaxie.
2 Pareil couma en 1905, connaissance ki bann scientifik ti ena lor l’univers ti bien limité, zot connaissance lor la terre aussi ti limité. Li vrai ki bann dimoune ki’nn vive dan commencement vingtieme siecle, ti konn plus ki zot bann ancetre. Mais, comparé ar 1905, bann dimoune dan nou lepok comprend beaucoup pli bien couma la vie kapav existé lor la terre; zot comprend aussi ki tou bann forme la vie ki existé zot bien compliké ek zot ena enn grand beauté. Ek pena doute ki dan l’avenir, nou pou aprann encore plus concernant la terre ek l’univers. Mais li bon ki nou demann-nou: couma tousala finn commence existé? Nou kapav konn reponse sa question-la zis parski nou Createur finn faire nou konn sa a travers la Bible.
Creation—enn mirak
3, 4. Couma Bondié ti crée l’univers, ek couma seki Li’nn faire donne Li la gloire?
3 Bann premier parole ki ena dan la Bible, expliké couma l’univers finn existé: “Au commencement Bondié ti crée le ciel ek la terre.” (Gen. 1:1) Pa ti ena okenn matiere physik (bann substance ki ena dan bann kitsoz physik) kan Jéhovah ti servi so l’esprit saint—so la force actif ki bien puissant—pou crée le ciel, la terre, ek tou seki existé dan l’univers. Enn zouvrier servi so la main ek bann zouti pou faire bann kitsoz, mais Bondié Li, Li envoye so l’esprit saint pou faire so bann grand travail.
4 Dan enn fason symbolik, la Bible koz lor l’esprit saint couma “lé-doigt” Bondié. (Luc 11:20; Mat. 12:28) Ek “bann kitsoz ki Li finn faire avek so la main”—seki Jéhovah finn crée par moyen so l’esprit saint—faire Li gagne enn grand la gloire. Psalmiste David ti chanté: “Le ciel pé annonce la gloire Bondié ek li pé raconte bann kitsoz ki Li finn faire avek so la main.” (Ps. 19:1) Oui, la creation physik rann temoignage lor grand pouvoir ki l’esprit saint Bondié ena. (Rom. 1:20) Couma li faire sa?
Pouvoir Bondié pena limite
5. Donne enn l’exemple pou montré pouvoir ki l’esprit saint Jéhovah ena pou crée.
5 Nou pa kapav maziné ki quantité nou l’univers grand. Sa l’univers-la donne nou preuve ki pouvoir ek l’energie Jéhovah pena limite. (Lire Isaïe 40:26.) La science moderne koné ki bann matiere physik kapav changé pou vinn l’energie ek l’energie kapav changé pou vinn matiere physik. Nou soleil ki enn zetoile, c’est enn l’exemple ki montré nou couma matiere physik kapav transformé pou vinn l’energie. Chaque seconde, soleil transforme apepré quatre million tonne matiere physik pou faire sa vinn la lumiere soleil ek lezot forme l’energie. Zis enn ti partie sa l’energie soleil-la ki vinn lor la terre, mais li assez pou permette la vie existé lor la terre. Li clair alors ki ti’nn bizin enn grand puissance ek beaucoup l’energie pou crée soleil, ek aussi tou lezot milliard zetoile. Jéhovah possede sa l’energie ki ti necessaire-la ek Li ena encore plus l’energie.
6, 7. (a) Kifer nou kapav dire ki Bondié inn servi so l’esprit saint dan enn fason ordonné? (b) Couma nou koné ki l’univers pa finn existé par hasard?
6 Ena enn grand l’ordre dan bann kitsoz ki Bondié ti crée grace a so l’esprit saint. Nou kapav trouve sa l’ordre-la tout autour nou dan creation. Anou prend enn l’exemple: supposé ki ou ena enn boite ek ladan ena bann boule plusieurs couleur. Ou sakouye boite-la pou ki bann boule-la bien melangé. Apré, ou jette zot enba enn sel coup. Eski ou pou attann ki bann boule-la tombe enba par groupe, sakenn dapré so couleur—bleu ensam, jaune ensam ek pareil aussi pou lezot couleur? Non, impossible! Kan bann action pa controlé ena toujours tendance pou ena desordre. Tou dimoune accepté sa couma enn la loi fondamental concernant la nature.a
7 Pourtant, kan nou guette le ciel ek nou examine li avek bann telescope, ki nou trouvé? Nou trouve enn systeme ki bien grand ek bien ordonné kot ena bann galaxie, bann zetoile, ek bann planete, tou pé bouge avek enn grand precision. Sa pa kapav finn apparette par hasard ou-soit par enn accident ki’nn arrivé dan l’univers. Alors, nou bizin demann nou-mem: ‘Ki la force ki finn servi au commencement, pou faire nou l’univers ki bien ordonné?’ Nou bann humain, nou bann capacité trop limité pou ki zis a travers la science ek technologie tousel nou kapav koné ki sa la force-la. Mais, la Bible faire nou koné ki sa la force-la c’est l’esprit saint Bondié, la force pli puissant ki existé dan l’univers. Enn psalmiste ti chanté: “Par parole Jéhovah, le ciel finn faire, ek par l’esprit so la bouche, tou so l’armée.” (Ps. 33:6) Avek nou lizié, nou kapav trouve zis enn ti partie sa “l’armée” zetoile-la kan nou guette le ciel a soir!
L’esprit saint ek la terre
8. Ki quantité nou koné vrai-mem lor seki Jéhovah finn faire?
8 Seki nou comprend asterla lor la nature, li vrai-mem bien-bien tigit comparé ar tou seki ena pou aprann encore. Nou ena zis enn ti connaissance lor tou seki Bondié inn crée, pareil couma Job, enn zom fidele ti dire: “Guetté! Sa c’est zis bann bord so fason agir, ek vrai-mem, nou’nn tann zis enn ti son lor Li!” (Job 26:14) Plusieurs siecle plitar, le roi Salomon, ki ti bien konn observe creation Jéhovah, ti dire: “Tou kitsoz, [Bondié] inn faire li joli dan so le temps. Mem l’eternité, Li finn mette dan zot leker, pou ki jamais bann dimoune pa decouvert travail ki vrai Bondié finn faire depuis commencement ziska la fin.”—Eccl. 3:11; 8:17.
9, 10. Bondié ti servi ki la force kan Li ti crée la terre, ek ki Li ti faire pendant trois premier jour creation?
9 Selman, Jéhovah finn faire nou konn bann kitsoz bien important lor seki Li’nn faire. Par exemple, la Bible faire nou koné ki l’esprit Bondié ti actif lor la terre bien-bien longtemps dan le passé. (Lire Genèse 1:2.) Dan sa lepok-la, la terre ti couvert avek de l’eau, pa ti ena la lumiere, ek kitfois pa ti kapav respire l’air ki ti ena lor la terre.
10 La Bible decrire seki Bondié ti faire pendant plusieurs jour creation. Sa bann jour-la pa ti bann jour 24 heure mais ti bann longue periode le temps. Premier jour creation, Jéhovah ti faire la lumiere commence parette lor la terre. Sa ti pou contigné ziska ki soleil ek la lune ti pou vinn visible depuis la terre. (Gen. 1:3, 14) Deuxieme jour, Bondié ti faire l’atmosphere. (Gen. 1:6) Lerla, ti ena de l’eau, la lumiere, ek l’air lor la terre, mais la terre ferme pa ti encore parette. Au commencement troisieme jour creation, Jéhovah ti servi so l’esprit saint pou faire la terre ferme parette, kitfois Li ti servi bann la force naturel bien puissant ki ti ena dan la terre pou faire bann continent sorti en dehors la mer. (Gen. 1:9) Ti ena encore lezot creation extraordinaire sa troisieme jour-la ek pendant bann periode creation ki ti ena apré.
L’esprit saint ek bann creature vivant
11. Ki nou trouvé a travers bann kitsoz vivant ki compliké, ki ena enn symetrie ek enn grand beauté?
11 L’esprit Bondié ti aussi faire bann kitsoz vivant ki ti extraordinaire. Par so l’esprit saint, pendant troisieme jour creation ziska sixieme jour, Bondié ti crée enn grand varieté plante ek zanimo. (Gen. 1:11, 20-25) Alors, bann kitsoz vivant c’est bann l’exemple bann kitsoz ki bien compliké, ki ena enn symetrie, ek enn beauté ki montré ki zot finn faire dan enn fason extraordinaire.
12. (a) Ki fonction ADN ena? (b) Ki nou bizin aprann par fason efficace ki ADN pé contigne travail?
12 Anou prend l’exemple ADN (acide désoxyribonucléique). So role c’est pou transmette bann caracteristik bann kitsoz vivant, generation apré generation. Tou kitsoz vivant lor la terre—parmi ena microbe, l’herbe, l’elephant, baleine bleu, ek dimoune—zot servi l’ADN pou zot reproduire. Mem si bann creature ki ena lor la terre zot bien different entre zot, sa code ki controle la plupart bann caracteristik ki zot finn herité-la, li bien stable ek li garde difference de base ki ena entre bann l’espece a travers bann siecle. Alors, dapré projet Jéhovah, tou bann kitsoz vivant ki ena lor la terre contigne fonctionne couma bizin dan enn l’environnement kot sakenn depann lor so camarade. (Ps. 139:16) Sa l’arrangement efficace ek ki bien ordonné-la donne encore plus preuve ki creation c’est travail “lé-doigt” Bondié, travail so l’esprit saint.
Creation ki pli important lor la terre
13. Couma Bondié ti crée premier zom?
13 Apré ki enn longue periode le temps ti’nn passé ek ki Bondié ti’nn crée enn grand quantité kitsoz ki ena la vie ek ki pena la vie, la terre ti gagne enn forme ek ti ena kitsoz lor la. Pourtant, Jéhovah ti pou servi encore so l’esprit saint pou crée. Li ti pré pou faire so creation ki pli important lor la terre. Vers la fin sixieme jour creation, Bondié ti crée premier zom. Couma Jéhovah ti faire sa? Li ti servi so l’esprit saint ek bann element ki ti trouve dan la terre.—Gen. 2:7.
14. Ki grand difference ena entre bann dimoune ek bann zanimo?
14 Genèse 1:27 dire: “Bondié ti commence crée zom dan so ressemblance, dan ressemblance Bondié Li ti crée zom; Li ti crée zot male ek femelle.” Crée dan ressemblance Bondié vedir ki Jéhovah ti crée nou avek capacité pou manifesté l’amour, liberté pou choisir, ek mem pou ena bann relation personnel avek nou Createur. A cause sa, nou cerveau bien different ar cerveau bann zanimo. Jéhovah ti faire cerveau bann dimoune dan sa fason-la pou ki nou kapav contigne trouve plaisir pou aprann lor Li ek lor seki Li faire, pou touletan.
15. Ki possibilité Adam ek Ève ti ena devant zot?
15 Au commencement l’humanité, Bondié ti donne Adam ek Ève, la terre ek tou bann kitsoz extraordinaire ki ti ena lor la pou ki zot kapav decouvert, aprann ek profite sa bann kitsoz-la. (Gen. 1:28) Jéhovah ti donne zot mangé en abondance ek Li ti mette zot dan enn paradis pou zot resté. Zot ti ena possibilité pou vive pou touletan. Zot ti pou vinn bann parent ki ti pou ena l’amour pou zot bann descendant, plusieurs milliard dimoune parfait. Pourtant, bann kitsoz pa finn passe coumsa.
Reconette role l’esprit saint
16. Ki l’esperance nou ena malgré rebellion nou premier parent?
16 Au lieu ki zot ti obeir zot Createur avek reconnaissance, Adam ek Ève ti rebellé dan enn fason egoïste. Resultat: tou zot bann descendant ki imparfait, pé souffert. Mais la Bible expliké couma Bondié pou repare tou bann degat ki’nn arrivé a cause peché nou premier parent. La Bible montré aussi ki Jéhovah pou realise projet ki Li ti ena au commencement. La terre pou vinn enn paradis ki rempli avek bann dimoune heureux, en bonne santé ki pou gagne la vie eternel. (Gen. 3:15) Pou nou garde la foi dan sa l’esperance bien encourageant-la, nou bizin l’aide l’esprit saint Bondié.
17. Ki qualité pensée nou bizin rejeté?
17 Nou bizin prié Jéhovah pou nou gagne so l’esprit saint. (Luc 11:13) Kan nou faire sa, sa pou faire nou ena plus conviction ki creation c’est travail Bondié. Zordi, enn sel coup bann propagande ki dire ki Bondié pa existé ek bann propagande lor l’evolution finn augmenté. Sa bann propagande-la zot basé lor bann fausse raisonnement ki pena okenn fondement. Fodé pa nou laisse tou sa bann fausse pensée-la faire nou ena bann doute ou-soit faire nou peur. Tou bann chretien bizin prepare zot pou resisté ar sa qualité l’attak-la ek bann pression ki ena enn rapport avek sa.—Lire Colossiens 2:8.
18. Kan nou examine l’origine l’univers ek l’humanité, kifer li pa pou raisonnable ki nou rejette l’existence enn Createur intelligent?
18 Pena doute ki nou la foi dan la Bible ek dan Bondié pou vinn pli solide kan nou examine dan enn fason honnete bann preuve ki montré ki finn ena enn creation. Beaucoup dimoune, kan zot reflechi lor l’origine l’univers ek l’humanité, zot pensée ki li pa raisonnable pou croire ki ti ena enn lot la force, a part bann la force ki la science kapav prouvé, ki ti impliké dan formation l’univers. Mais, si nou pense coumsa, nou pa pou examine bann preuve dan enn fason juste, sans ki nou faire preference. En plus, nou pa pou mem prend compte tou bann kitsoz ki existé, ki finn faire dan enn fason ordonné, dan enn but precis ek ki “enn grand quantité.” (Job 9:10; Ps. 104:25) En tant ki chretien, nou sur ki sa la force actif ki ti impliké dan creation-la, ti l’esprit saint ki ti dirigé dan enn fason intelligent par Jéhovah.
L’esprit saint ek nou la foi dan Bondié
19. Ki preuve nou kapav gagné ki Bondié existé ek ki Li pé servi so l’esprit saint?
19 Li pa necessaire ki nou konn tou lor creation pou nou ena la foi dan Bondié ek ena l’amour ek enn profond respé pou Li. Par exemple, anou prend l’amitié ki ena entre deux dimoune. Sa l’amitié-la li pa basé zis lor certain renseignement ki zot ena lor zot camarade. L’amitié entre deux camarade vinn pli solide a mesure ki zot aprann konn sakenn zot camarade pli bien. Li pareil aussi concernant nou la foi dan Bondié. Plus nou aprann konn Li bien, plus nou la foi en Li vinn pli fort. Oui, kan nou trouve Li reponn nou bann la priere ek kan nou trouve bann bon l’effet ki bann principe biblik ena lor nou la vie, nou pli sur ki Li existé. Nou vinn pli proche ar Jéhovah a mesure ki nou trouve plus preuve ki Li pé guide nou bann pas, ki Li pé protege nou, Li pé beni bann zeffort ki nou faire dan so service, ek Li pé donne nou seki nou bizin. Tousala c’est bann preuve solide ki Bondié existé ek ki Li pé servi so l’esprit saint.
20. (a) Kifer Bondié ti crée l’univers ek bann dimoune? (b) Ki nou pou gagné si nou contigne suive direction l’esprit saint Bondié?
20 La Bible c’est enn l’exemple extraordinaire ki montré couma Jéhovah finn servi so la force actif. Kifer? Parski bann ki’nn ecrire la Bible inn faire sa ‘grace a l’esprit saint ki’nn pousse zot pou dire seki Bondié ti ena pou dire.’ (2 Pierre 1:21) Si nou etudié la Bible en profondeur, sa kapav fortifié nou la foi ki c’est Bondié ki finn crée tou kitsoz. (Rév. 4:11) Jéhovah ti vinn Createur parski Li ti ena l’amour, enn qualité attirant. (1 Jean 4:8) Alors, anou faire tou seki nou kapav pou aide lezot pou aprann lor nou Papa ek nou Camarade ki dan le ciel, ki bien content nou. Dan nou cas, si nou contigne laisse-nou guidé par l’esprit Bondié, nou pou ena privilege pou contigne aprann lor Li pou touletan. (Gal. 5:16, 25) Nou souhaité ki sakenn parmi nou contigne aprann lor Jéhovah ek lor bann kitsoz extraordinaire ki Li’nn faire. Anou imite l’amour sans limite ki Li ti montré kan Li ti servi so l’esprit saint pou crée le ciel, la terre ek bann dimoune.
[Note]
a Guette page 24 ek 25 dan livre Y a-t-il un Créateur qui se soucie de vous ?
Eski ou kapav expliké?
• Ki l’existence le ciel ek la terre enseigne nou lor fason ki Bondié ti servi so l’esprit saint?
• Ki possibilité nou ena parski nou finn crée dan ressemblance Bondié?
• Kifer nou bizin examine bann preuve ki finn ena enn creation?
• Couma bann relation ki nou ena avek Jéhovah kapav vinn pli fort?
[Zimage page 15]
L’ordre ki ena dan l’univers enseigne nou ki kitsoz lor creation?
[Zimage page 15]
Zetoile: Anglo-Australian Observatory/David Malin Images
[Zimage page 16]
Ki role l’ADN joué dan tou sa bann kitsoz-la?
[Zimage page 18]
Eski ou pré pou defann ou la foi?