Kestion Bann Lekter

Ebre 4:12 dir ki “parol Bondie, li vivan ek li pwisan.” Ki ete “parol Bondie”?

Bann verse avan verse 12 fer nou konpran ki Pol ti pe koz lor mesaz Bondie konsernan So proze, ek ki trouv dan Labib.

Souvan nou bann piblikasion mansionn Ebre 4:12 pou montre kouma Labib ena pouvwar pou sanz lavi bann dimounn, ek li vre. Selman, li inportan ki nou konpran seki Pol ti pe rod dir kan li ti ekrir bann parol ki ena dan Ebre 4:12. Li ti pe ankouraz bann Kretien Ebre pou korper ansam avek Zeova pou realiz So bann proze. Ek boukou parmi sa bann proze-la trouv dan bann Lekritir Sakre. Pol ti servi lexanp bann Izraelit ki ti libere depi Lezip gras-a Zeova. Zot ti ena lespwar pou rant dan Later Promiz, “enn pei kot dile ek dimiel koule,” enn pei kot zot ti pou kapav gagn enn vre repo.​—Exod 3:8; Deteronom 12:9, 10.

Samem proze ki Bondie ti ena. Me bann Izraelit finn rezet bann instriksion ki Zeova ti donn zot ek zot pa ti ena lafwa. Alor, laplipar parmi zot pa finn rant dan sa repo-la. (Nonb 14:30; Zozie 14:6-10) Selman, Pol finn dir ki “ankor ena enn promes pou rant dan . . . repo [Bondie].” (Ebre 3:16-19; 4:1) Sa ‘promes-la’ fer parti dan seki Bondie finn revele lor so proze. Parey kouma bann Kretien Ebre, nou kapav etidie sa proze-la ek korper ansam avek Zeova pou realiz So proze. Pou montre bien ki sa promes-la sorti dan bann Lekritir Sakre, Pol ti sit sertin parti Zenez 2:2 ek Psom 95:11.

Nou bien kontan ki “ankor ena enn promes pou rant dan . . . repo [Bondie].” Nou ena konfians dan seki Labib ansegne konsernan repo Bondie. Nou sir ki li posib pou rant dan sa repo-la ek nou fer tou pou kapav rant ladan. Kouma? Se pa kan nou esey swiv Lalwa Mozaik ouswa kan nou fer bann bon kitsoz zis pou gagn faver Bondie. Me plito, se kan nou ena lafwa an Zeova ek nou kontign korper ar So proze dan lazwa. Plizir milye dimounn partou lor later finn koumans etidie Labib ek finn aprann seki Bondie finn revele lor So proze. Sa finn motiv boukou parmi zot pou sanz zot lavi, pou montre lafwa, ek pou pran batem. Fason ki “parol Bondie” azir lor zot montre bien ki “parol Bondie, li vivan ek li pwisan.” Seki Bondie finn revel nou dan Labib konsernan so proze deza ena enn lefe lor nou lavi, ek li pou kontigne inflians nou lavi parski li pwisan.