3 Bondié tire vengeance​—Eski li vrai?

Seki ou finn deja tendé: “Bondié ecrire tou peché ek Li faire bann dimoune payé kan Li puni zot ek envoye zot dan l’enfer pou touletan.”

“Bondié envoye bann catastrophe naturel pou puni bann dimoune ki faire peché.”

Seki la Bible enseigné: Deuxieme Pierre 3:9 dire ki Jéhovah “pa envie ki personne mort, mais Li envie ki tou dimoune repenti.” Au lieu ki Li guette zis nou bann erreur, Li guette nou bann point fort. “Lizié [Jéhovah] pé guette partout lor la terre pou montré so la force en faveur bann dimoune ki ena enn leker complet envers Li.”​—2 Chroniques 16:9.

L’enfer pa enn l’enseignement biblik. En realité, l’idée ki enn dimoune al tourmenté pou touletan dan enn l’enfer difé li enn kitsoz degoutant pou Bondié. Pli grand punition ki Li kapav donne enn mauvais dimoune c’est ré-prend la vie ki Li’nn donne li. (Jérémie 7:31; Romains 6:7) Bann catastrophe naturel prend la vie tou sorte qualité dimoune, mais pa Bondié ki derriere sa. Au contraire, c’est bann situation ki kapav arrive n’importe kisannla sans ki nou attann.​—Ecclésiaste 9:11.

Couma eski kan ou konn la verité sa aide ou: Nou kapav vinn proche ar Bondié kan nou reconette ki Li “disposé pou pardonné” ek ki Li pa condamne nou vite-vite. (Psaume 86:5) Fodé pa nou servi Bondié parski nou senti-nou coupable ou-soit nou extra peur pangar Li puni nou. Au contraire, nou kapav faire nou la foi vinn pli fort kan nou servi Jéhovah avek pli bon mobile ki kapav ena, setadir l’amour pou Li. Sa l’amour-la li enn la force ki bien puissant ki pousse nou pou faire tou seki nou kapav pou faire Li plaisir.​—Matthieu 22:36-38; 1 Jean 5:3.

Bondié envie ki tou dimoune pratik seki bon, mais Li koné ki beaucoup jamais pa pou faire sa. Si Li ti zis guette bann dimoune ki bien decidé pou faire seki mauvais sans faire nanyin, Li ti pou pareil couma n’importe ki dirigeant ki etabli bann la loi mais ki pa applik sa. Coumsa zot laisse l’injustice ek souffrance contigne augmenté. (Ecclésiaste 8:11) Parski nou koné ki Bondié pa pou tolere le mal pou touletan, sa donne nou enn l’esperance bien solide pou l’avenir. Bondié ti promette ki Li pou tire tou bann ki persisté pou faire seki mauvais. Lerla, bann ki “ena l’humilité” pou kapav vive pou touletan lor la terre pareil couma Li ti ena l’intention au commencement.​—Psaume 37:10, 11, 29.a

[Note]

[L’encadré page 6]

Eski Bondié envie ki nou adore Li zis parski nou peur pangar Li puni nou?

[Remerciement photo page 6]

Enn dessin par Doré