Har-Maguédôn​—Ki li été vrai-mem?

“Bann l’esprit demoniak . . . al vers bann le roi lor la terre entier . . . , ek zot rassemblé bannla dan enn place ki en hébreu appel Har-Maguédôn.” (C’est nou ki’nn mette en italik.)​—RÉVÉLATION 16:14, 16, New Revised Standard Version.

HAR-MAGUÉDÔN, ki parfois bann dimoune ecrire Harmaguédon, c’est nom enn place. Mais li parette ki sa place-la pa finn vrai-mem existé dan okenn l’endroit lor la terre.

Alors, ki “Har-Maguédôn” vedir vrai-mem? Kifer eski bien souvent bann dimoune associé sa mot-la avek enn l’evenement, couma par exemple enn la guerre?

Rassemblé dan enn place ki appel Har-Maguédôn

Mot hébreu Har-Maguédôn litteralement vedir “Montagne Meguiddo.” Mem si pa ti ena okenn montagne ki ti appel Meguiddo, ena enn l’endroit ki appel sa nom-la. Li trouve dan nord-ouest pays kot nation Israël ti resté dan le passé. Li ti dan enn bon position parski li ti trouve dan enn la croisé. Finn ena beaucoup la guerre important pré ar sa place-la. Alors, finalement inn associé sa nom Meguiddo-la ar la guerre.a

Mais selman, vrai signification Meguiddo c’est pa bann la guerre ki ti faire dan sa l’endroit-la, mais kifer ti faire sa bann la guerre-la. Meguiddo ti forme partie dan la Terre promise ki Jéhovah ti donne bann Israélite. (Exode 33:1; Josué 12:7, 21) Li ti promette bannla ki Li ti pou protege zot kont bann l’ennemi ki ti pou attak zot, ek Li ti faire sa. (Deutéronome 6:18, 19) Par exemple, c’est dan Meguiddo ki Jéhovah par enn mirak ti defann bann Israélite kont bann soldat Yabîn, le roi cananéen, ek chef so l’armée, Sisera.​—Juges 4:14-16.

Alors, sa mot “Har-Maguédôn-[la]” ena enn grand signification symbolik. Li ena enn rapport avek enn la guerre entre deux l’armée bien puissant.

Sa prophetie dan Révélation-la koz lor seki pou arrivé bientot dan l’avenir. Li dire ki Satan ek so bann demon pou pousse bann gouvernement humain pou rassemblé zot l’armée, ek coumsa zot pou lance enn l’attak kont peuple Bondié ek travail ki zot pé faire. Dan sa l’attak-la, plusieurs million dimoune pou mort kan Bondié pou gagne victoire lor so bann l’ennemi.​—Révélation 19:11-18.

Kifer eski Bondié, ki la Bible decrire couma enn Bondié ki ena “misericorde, ki pa en colere vite ek ki ena l’amour fidele en abondance,” pou touye tou sa dimoune-la? (Nehémia 9:17) Pou comprend fason agir Bondié, nou bizin reponn trois question: (1) Kisannla pou commence sa la guerre-la? (2) Kifer Bondié pou prend part ladan? (3) Ki l’effet sa la guerre-la pou ena lor la terre ek lor bann dimoune dan l’avenir?

1. KISANNLA POU COMMENCE SA LA GUERRE-LA?

C’est pa Bondié ki pou commence la guerre Har-Maguédôn. Au contraire, Bondié pou defann bann bon dimoune kont bann ki pou rod crase zot. C’est “bann le roi lor la terre entier,” bann chef sa le monde-la, ki pou commence sa la guerre-la. Kifer zot pou faire sa? Parski systeme politik ek militaire couma bann marionnette dan la main Satan. Satan pou faire zot lance enn l’attak kont bann ki adore Jéhovah.​—Révélation 16:13, 14; 19:17, 18.

Zordi, dan certain pays, bann dimoune donne enn grand l’importance liberté pou kozé ek pou pratik enn religion. Kan nou pense lor la, li parette impossible ki enn jour bann gouvernement pou essaye impose certaine limite lor bann religion ou-soit-mem elimine zot net. Mais selman, ti ena bann l’attak coumsa dan 20^eme siecle ek encore ena sa zordi.b Mem sa, ena au moins deux grand difference entre bann l’attak ki ti ena dan le passé ek sa l’attak ki ena enn rapport avek Har-Maguédôn-la. Premierement, sa l’attak-la pou lor la terre en entier. Deuxiemement, kan Jéhovah pou reagir, Li pou faire sa dan enn fason pli grand ki jamais Li finn faire dan le passé. (Jérémie 25:32, 33) La Bible decrire sa la guerre-la couma “la guerre grand jour Bondié Tout-Puissant.”

2. KIFER BONDIÉ POU PREND PART LADAN?

Jéhovah demann bann ki adore Li pou vive en paix ek pou content zot l’ennemi. (Mika 4:1-3; Matthieu 5:43, 44; 26:52) Alors, zot pa pou prend zarme pou defann zot-mem kan pou ena sa l’attak bien violent-la. Si Bondié pa rente dan sa la guerre-la pou sauve so peuple, zot pou disparette net. Alors, c’est nom Jéhovah ou-soit so reputation ki pou en jeu. Si bann l’ennemi Bondié reussi detruire So peuple, sa pou faire Jéhovah parette couma enn Bondié ki pena l’amour, ki injuste, ou-soit ki pena pouvoir. Mais li impossible ki Jéhovah laisse enn kitsoz coumsa arrivé!​—Psaume 37:28, 29.

Bondié pa envie detruire personne, alors Li averti zot seki Li pou faire. (2 Pierre 3:9) A travers bann recit ki ena dan la Bible, Li rappel nou ki dan le passé Li ti defann so peuple kan zot l’ennemi ti attak zot. (2 Rois 19:35) La Bible averti aussi ki dan l’avenir kan Satan ek bann dimoune ki couma bann marionnette dan so la main, pou attak peuple Bondié, encore enn fois Jéhovah pou defann so peuple. Li pou servi so la force pou laguerre kont bann ki pou faire so peuple di-tort. En realité, depuis bien longtemps Parole Bondié ti annoncé ki Jéhovah pou detruire bann mauvais dimoune. (Proverbes 2:21, 22; 2 Thessaloniciens 1:6-9) Sa jour-la, pa pou ena doute dan l’esprit sa bann l’ennemi-la ki zot inn rod la guerre kont Bondié Tout-Puissant.​—Ézékiel 38:21-23.

3. KI L’EFFET SA LA GUERRE-LA POU ENA DAN L’AVENIR?

Grace a la guerre Har-Maguédôn, plusieurs million dimoune pou gagne la vie sauve. En realité, li pou commencement enn periode la paix ki pou ena lor la terre.​—Révélation 21:3, 4.

Livre Révélation koz lor “enn grand la foule” ki pa kapav compté, ki pou sapé pendant sa la guerre-la. (Révélation 7:9, 14) Kan Royaume Bondié pou dirigé, sa bann dimoune-la pou donne coude main pou faire la terre vinn enn paradis pareil couma Jéhovah ti ena l’intention faire au commencement.

Eski nou koné kan pou ena sa l’attak kont peuple Bondié-la?

[Notes]

[Zimage page 6]

Jéhovah ti defann so peuple dan le passé

[Zimage page 7]

Jéhovah pou defann encore enn fois so peuple pendant la guerre Har-Maguédôn