Fanarahana Ilay Modelintsika Amin’ny Maha-mpitondra Fahazavana
1 Nanambara toy izao momba ny tenany i Jesosy: “Izaho no fahazavan’izao tontolo izao”. Amin’ny fanarahana ny ohatra nomeny, ireo mpianatr’i Jesosy koa dia “fahazavan’izao tontolo izao”. (Matio 5:14). Amin’ny maha-“fahazavan’izao tontolo izao” azy, dia afaka niteny i Jesosy fa hanana “ny fahazavan’aina” izay rehetra manaraka azy. (Jaona 8:12). Izany dia mahatonga antsika ho mpitondra fahazavana ara-panahy izay tsy tokony hamela na inona na inona mihitsy hanafina na hanakona izany fahazavana izany. — Jaona 8:12.
2 Manome fampiofanana ny fandaminan’i Jehovah mba hampisehoana amintsika ny fomba hahatongavana ho mpitondra fahazavana mahita vokatra. Raha manaraka akaiky ny torohevitra sy ny fitarihana azontsika isika, dia ho afaka hampahazava ny karazan’olona rehetra momba ny fahamarinana ny amin’ilay Fanjakana. (1 Tim. 4:6). Ny tafiditra amin’ny fanompoana amin’ny maha-mpitondra fahazavana, dia tsy ny firesahana momba ny fahamarinana isaky ny fahafahana rehetra fotsiny, fa ny fihazonana fitondran-tena tsara amin’ny maha-kristiana koa. Tsy azo nokianina ny fitondran-tenan’ilay Modelintsika. Amin’ny maha-mpanara-dia azy antsika, dia tsy maintsy mampiseho isika fa ny Kristianisma no fomba fiainantsika isan’andro. (Efes. 5:9; Tit. 2:7, 8, 10). Tsy maintsy manao asa tsara izay azon’ny hafa jerena isika, ka izany dia hanosika azy ireo hankalaza an’Andriamanitra. — Matio 5:16.
3 Tojo fangatahana iray hafa kely ny Vavolombelona iray tamin’ny fandehanana isan-trano. Ilay loham-pianakaviana sy ny vadiny dia samy tena narary, kanefa dia nila nametraka vola tany amin’ny banky izy ireo. Nanontany an’ilay Vavolombelona izy ireo raha ho afaka ny hanao izany izy. Nanaiky izy ary dia nomena lelavola 2 000 dolara (na 8 166 000 FMG) hoentina any amin’ny banky! Rehefa niverina izy, dia nanontany hoe: “Ahoana no nahafahanareo nitoky tamiko kanefa tsy fantatrareo akory aho?” Ny valiny: “Fantatray, ary fantatry ny hafa rehetra koa, fa ny Vavolombelon’i Jehovah ihany no azo itokiana.” Afaka ny ho velom-pankasitrahana toy inona moa isika fa ny fifikirantsika akaiky amin’ireo fotopoto-pitsipika ara-pitondran-tena ao amin’ny Baiboly dia miteraka laza manome voninahitra an’Andriamanitra toy izany!
4 Ny mpampianatra iray ao amin’ny sekoly fanabeazana fototra dia nanazava tamin’ny kilasiny ny antony tsy nandraisan’ny mpianatra Vavolombelona iray enin-taona anjara tamin’ny fandokoana sary mifandray amin’ny Halloween. Nilaza ilay mpampianatra fa nirehareha ny aminy noho ny fananany herim-po ho hafa, noho izay inoany. Raha mino mafy ny zavatra iray isika, hoy ilay mpampianatra, dia tokony hanana ny herim-po hiaro azy io. Tamin’iny alina iny, ilay mpampianatra dia namakafaka ny finoany manokana ary dia voatery niaiky fa tsy nampiseho herim-po toy izany mba hiarovana ny zavatra ninoany ny tenany. Ny ampitso izy dia nanambara fa tsy hampandray anjara ny kilasiny amin’izay fankalazana fety rehetra amin’ny ho avy, izay tsy ninoan’ny tenany akory ny sasany taminy!
5 Dodona ny hampamirapiratra ny fahazavany ny vahoakan’i Jehovah, na aiza na aiza misy azy ireo. Ny fitondran-tena fakan-tahak’ireo tanora any an-tsekoly dia namela soritra tsara teo amin’ny mpiara-mianatra sy ny mpampianatra. Ny Vavolombelona olon-dehibe izay mampiseho fitondran-tena tsara eo amin’ny manodidina dia mahatonga ny hafa hiresaka amin’ny fomba tsara ny hafatra momba ilay Fanjakana. Ny fitoriana tsy ara-potoana ao anatin’ny toe-javatra maro be dia manintona ny olona tso-po izay maniry hianatra bebe kokoa. Na dia ny fahazotoantsika sy ny fanaovantsika ny marina any am-piasana aza dia manao fanambarana. Eny, na aiza na aiza misy antsika ary na inona na inona ataontsika, dia afaka manaitra fahalianana ho amin’ny fahamarinana isika.
6 Amin’ny fibanjinantsika ny modelim-piainana tsy nisy kileman’ilay Modelintsika lehibe, dia afaka manohy mandavorary ny fahaizantsika amin’ny maha-mpianany isika. Ny fanahafana ny ohatra nomeny dia hanome antoka fa “hamirapiratra amin’ny rehetra” ny fahazavantsika. — Matio 5:15, NW; 1 Pet. 2:21.