Manehoa Fanajana ny Toerana Fanaovana Fanompoam-pivavahana Amin’i Jehovah
1 Rehefa mivahiny any an-tranon’olona iray isika, dia maneho fanajana ny fananan’io olona io, tsy manao na inona na inona hanimbana izany, ary tsy mandrava ny filaminan’ilay trano isika. Tena tokony ho marina lavitra izany rehefa vahinin’i Jehovah isika! Tokony ho fantatsika ny fomba hitondrantsika ny tenantsika ao an-tranony. (Sal. 15:1; 1 Tim. 3:15). Na atao ao amin’ny Efitrano Fanjakana ny fivoriana kristiana atrehintsika, na ao amin’ny trano manokana, na ao amin’ny tranom-bahoaka, ny ankamaroantsika dia maneho fanajana mandrakariva an’ireo toerana fanaovantsika fanompoam-pivavahana, toy ny hoe tranon’i Jehovah, izay ‘manana voninahitra ambonin’ny tany sy ny lanitra’, izy ireny. — Sal. 148:13.
2 Misy rahalahy sasany maneho tsy fahampiam-panajana any amin’ireo fivoriana, amin’ny fitabatabana na amin’ny fanaovan-javatra toy ny hoe tsy zava-dehibe ireo fanazavana atolotra any. Misy olon-dehibe sasantsasany manohy manao resaka tsy ilaina eny am-baravarana sy ao an-dalantsara ary any amin’ny trano fivoahana na any ivelan’ny Efitrano Fanjakana, nefa ny fivoriana mbola mandeha. Rehefa avela hiandry ny zandriny ny ankizy lehibe kokoa, indraindray dia manomboka miara-milalao izy ireo ka zara raha mandray soa avy amin’ny fandaharana. Misy tanora sasany hita milalao sy mitabataba loatra, na manao fihetsehana karate amin’izy samy izy, eny ivelan’ny Efitrano Fanjakana, aorian’ny fivoriana. Tamin’ny tarehin-javatra sasany, dia nanelingelina ireo mpiara-monina izy ireny, na nanakantsakana ny fifamoivoizana teny amin’ireo parking na lalana.
3 Ny fomba hanalavirana ny tsy fahaiza-manaja: Raha mahatakatra ny fahamendrehana sy ny fahamasinan’ny fanompoam-pivavahantsika isika, dia tsy isalasalana fa tsy haniry ny hanelingelina ny hafa amin’ny fibitsibitsihana, fihinanan-kanina, fitsakoana siligaoma, fanakasokasohana taratasy, fivezivezena tsy ilaina any amin’ny trano fivoahana, na fahazarana ho tonga tara any amin’ireo fivoriana. Ireo ray aman-dreny feno fanajana sy mahay mankasitraka dia tsy mamela ny zanany handoto ny moquette, na ny seza, na ireo rindrin’ny Efitrano Fanjakana na ny trano fanaovana ny fianarana ny boky. Ary tsy isalasalana fa manaiky isika rehetra hoe tsy misy toerana mihitsy ho an’izay mety ho karazana fitondran-tena mahamenatra na resaka adaladala na vazivazy maloto any amin’ireo fivoriantsika. — Efes. 5:4.
4 Raha tadidintsika foana ny zava-kendren’ireo fivoriana kristiana ataontsika, dia hanao izay hahazoana antoka isika fa maneho fanajana araka ny tokony ho izy ny fanompoam-pivavahana amin’i Jehovah, any amin’ny toerana nofidintsika ‘hitoerana’, isika. — Sal. 84:10.