Aoka ny Fitondran-tenanareo ho Mendrika ny Vaovao Tsara
1 Amin’ny maha-Vavolombelon’i Jehovah antsika, dia maniry hanome voninahitra ny anaran’i Jehovah isika. Fantatsika fa ny fitondran-tenantsika, ny tenintsika sy ny fisehoantsika ankapobe ary ny fitafiantsika dia afaka ny hisy heriny eo amin’ny fomba fiheveran’ny hafa ny fanompoam-pivavahana marina. Marina indrindra izany rehefa any amin’ireo fivoriantsika isika. Tiantsika ny hahazo antoka fa ny zavatra rehetra resahina sy atao any amin’ireo fivoriana dia mendrika ny vaovao tsara ary hanome voninahitra an’i Jehovah. — Fil. 2:4.
2 Maro amin’ireo fari-pitsipik’izao tontolo izao momba ny akanjo sy ny fisehoana ankapobe no tsy azo ekena ho an’ny Kristiana. Izany dia raharaha iray izay tokony hasian’ireo minisitry ny vaovao tsara, fiheverana amim-pitandremana. Ny Tilikambo Fiambenana tamin’ny 1 Septambra 1989, pejy faha-20, dia manambara hoe: ‘Ny fitafiantsika dia tsy voatery ho lafo vidy, fa tokony ho madio sy tsy manimba maso ary maotina. Ny kirarontsika dia tokony tsy ho simba sy ho tsara koa. Tahaka izany koa, any amin’ireo fivoriana rehetra, anisan’izany ny Fianarana ny Bokin’ny Kongregasiona, dia tokony ho madio ny vatantsika, ary tokony hanao akanjo madio sy milamina isika.’
3 Ny fahatongavana ara-potoana dia mariky ny fanehoam-piheverana sy ny fiahiana feno fitiavana. Indraindray, ny tarehin-javatra tsy azo ialana dia mety hanakana antsika tsy ho tonga ara-potoana amin’ny fivoriana iray. Ny fahazarana ho tonga tara anefa dia mety haneho tsy fahampiam-panajana ny zava-kendrena masin’ireo fivoriana sy tsy fahatakarana ny andraikitsika hanalavitra ny fanelingelenana ny hafa. Ireo tonga tara matetika dia mampivily ny sain’ny hafa sy manakana azy ireo tsy handray soa feno amin’ny fandaharana. Ny fahatongavana ara-potoana dia mampiseho fanajana ny fihetseham-po sy ny tombontsoan’ny mpanatrika rehetra.
4 Ny fitiavantsika ny namantsika dia tokony hahatonga antsika hitandrina ka hanalavitra izay miteraka fanelingelenana mandritra ireo fivoriana. Ny fibitsibitsihana, ny fihinanan-javatra, ny fitsakotsakoana siligaoma, ny fampikasaohana fonon-javatra, sy ny fivezivezena tsy amin’antony any amin’ny toeram-pivoahana, dia mety hanembantsembana ny hafa tsy hifantoka ary hanaisotra ny fahamendrehana sahaza ny toerana fanaovana fanompoam-pivavahana amin’i Jehovah. Tsy mety, na ho an’iza na ho an’iza, ny mikarakara raharahan’ny kongregasiona na miresaka amin’ny hafa, raha tsy hoe misy zavatra maika izay mitaky ny hialan’ireo rahalahy eo amin’ny toerany angaha. Raha tsy izany, dia tokony hijanona eo amin’ny toerany ny rehetra ka hihaino ny fandaharana mba handraisan’ny tenany sy ny fianakaviany soa. Tsy manana ny toerany ao amin’ny Efitrano Fanjakana ny tsy fahalalam-pomba satria “ny fitiavana (...) tsy manao izay tsy mahamendrika”. — 1 Kor. 13:4, 5; Gal. 6:10.
5 Ny fitondran-tena tsara dia tsaran’ireo zanatsika any amin’ireo fivoriana koa dia manome fiderana sy voninahitra ny anaran’i Jehovah. Zava-dehibe ny fanaraha-maso akaiky ataon’ireo ray aman-dreny. Tokony hampirisihina hihaino sy handray anjara ireo ankizy. Ray aman-dreny maro manan-janaka kely no mifidy ny hipetraka eo amin’ny toerana izay ahafahany miala mora foana, ka hikarakara izay ilain’ireo zanany nefa tsy hampivily ny sain’ny hafa be loatra.
6 Nananatra toy izao i Paoly: “Aoka ny fitondrantenanareo ho mendrika [ny vaovao tsara, NW]”. (Fil. 1:27). Aoka àry isika hiezaka mafy mba hahalala fomba sy haneho fiheverana ny hafa rehefa manatrika ireo fivoriana. Ny fiaraha-miasan’ny rehetra dia hanome antoka fa hisy ‘fifanakalozana fampaherezana, ka ny tsirairay [ampaherezina] amin’ny alalan’ny finoan’ny hafa’. — Rom. 1:12, NW.