Fampahatsiahivana Momba ny Fahatsiarovana

Amin’ny alakamisy 1 Aprily ny fankalazana ny Fahatsiarovana amin’ity taona ity. Tokony hanisy fiheverana an’ireto raharaha manaraka ireto ireo loholona:

◼ Rehefa manapaka ny amin’ny fotoan’ilay fivoriana, dia ataovy azo antoka fa tsy hampandalovina ireo marika raha tsy aorian’ny filentehan’ny masoandro.

◼ Ny rehetra, anisan’izany ny mpandahateny, dia tokony hampahafantarina ny amin’ny ora sy ny toerana marina hanaovana ilay fankalazana.

◼ Tokony hokarakaraina sy hatao vonona ilay karaza-mofo sy divay ilaina. — Jereo Ny Tilikambo Fiambenana 15 May 1985, pejy 17.

◼ Tokony hoentina mialoha any amin’ilay toeram-pivoriana, ary hapetraka eo amin’ny toerany avy, ireo lovia sy vera ary ny latabatra sy ny lamban-databatra mety.

◼ Tokony hodiovina tanteraka mialoha ny Efitrano Fanjakana na izay toerana hafa hanaovana ilay fivoriana.

◼ Tokony hofantenana sy homena toromarika mialoha, momba ny andraikiny avy sy ny fizotran-javatra araka ny tokony ho izy, ireo mpikarakara ny mpanatrika sy ny mpanolotra marika.

◼ Rehefa fankalazana mihoatra ny iray no alamina hatao ao amin’ny Efitrano Fanjakana iray ihany, dia tokony hisy firindran-javatra tsara eo amin’ireo kôngregasiôna, mba tsy hitangoronan’ny olona tsy amin’ny antony eo am-baravarana, eo amin’ny lalantsara na ny fidirana, ny sisin-dalana na sisin’arabe ary ny parking.