Ambarao Hatrany ny Asa Mahatalanjona Nataon’i Jehovah
1 Tsy misy olona afaka mifampitaha amin’i Jehovah, ilay Andriamanitsika lehibe! Nanoratra i Davida hoe: “Nohamaroinao ny fahagaganao sy ny hevitrao izay nataonao ho anay, Jehovah Andriamanitro ô—tsy misy azo ampitahaina aminao.” (Sal. 40:5) Anisan’ny asa mahatalanjona nataon’i Jehovah ny famoronana izao rehetra izao, ny Fanjakan’ny Mesia, ny famindram-pony amin’ny vahoakany, ary ny asa fitoriana maneran-tany. (Sal. 17:7, 8; 139:14; Dan. 2:44; Matio 24:14) Tia an’i Jehovah isika ary mankasitraka izay rehetra nataony, ka voatosika hanambara ny momba azy amin’ny olona. (Sal. 145:5-7) Afaka manao izany bebe kokoa isika mandritra ny volana Martsa sy Aprily ary Mey.
2 Ho mpisava lalana mpanampy: Afaka mandamina fotoana ve ianao, mba handany 50 ora eny amin’ny fanompoana, fara fahakeliny, iray volana, amin’ireo fotoana hanaovana ezaka manokana ireo? Tena hahasoa anao izay fanovana hataonao eo amin’ny fandaharam-potoananao. (Efes. 5:16) Maro no nahita fa manampy azy hanatsara ny fanompoany sy hampiasa bebe kokoa ny Baiboly, ny asan’ny mpisava lalana mpanampy. Manokana fotoana bebe kokoa hanompoana izy, ka mora kokoa aminy ny manohy manampy ny olona liana. Lasa nanana fampianarana Baiboly koa ny mpitory sasany, rehefa nanao io asa io. Mahafaly koa ny asan’ny mpisava lalana mpanampy, satria mandany hery hanampiana ny olona isika.—Asa. 20:35.
3 Aza mieritreritra avy hatrany hoe tsy afaka ny ho mpisava lalana mpanampy ianao noho ny toe-javatra misy anao. Manan-janaka roa sy miasa manontolo andro ny anti-panahy iray nanao ny asan’ny mpisava lalana mpanampy tamin’ny taon-dasa. Ahoana no nataon’io rahalahy be atao io? Miasa foana izy mandritra ny herinandro. Nandamina fotoana àry izy mba hanompoana manontolo andro isaky ny faran’ny herinandro. Natombony tamin’ny fitoriana teny an-dalana izany, isaky ny asabotsy maraina amin’ny fito ora. Maromaro no be atao toa azy teo anivon’ny fiangonany, nefa nanao ny asan’ny mpisava lalana mpanampy koa izy ireo, ary nifampahery. Tany amin’ny fiangonana hafa indray, dia nisy anabavy iray 99 taona tapa-kevitra ny hanao ny asan’ny mpisava lalana mpanampy, tamin’ny volana Mey. Nanasa azy hiaraka aminy hanao io asa io mantsy ny zanany vavy. Nanampy an’io anabavy be taona io ny hafa teo anivon’ny fiangonana, ka nanosika ny seza mikorisany, mba hahafahany hitory isan-trano sy hampianatra Baiboly. Nitory teny an-dalana sy an-taratasy koa ilay anabavy. Miaiky izy fa tsy ny heriny no nahavitany izany, fa ny fanampian’i Jehovah.—Isaia 40:29-31.
4 Manandrama manao fandaharam-potoana tena mety aminao. Mety hanampy anao ireo fandaharam-potoana, ato amin’ity Fanompoantsika Ilay Fanjakana ity. Miasa manontolo andro ianao sa mianatra? Fandaharam-potoana hanaovana fanompoana betsaka amin’ny faran’ny herinandro angamba no mety indrindra aminao. Raha tsy salama kosa ianao, ka tsy vitanao ny manompo indray andro tontolo, dia fandaharana hanompoana vetivety isan’andro angamba no tsara indrindra. Resaho amin’ny hafa fa maniry hanao ny asan’ny mpisava lalana mpanampy ianao. Angamba hanao io asa io ho tanjona koa izy ireo.
5 Izay azon’ny tanora atao: Faly i Jehovah rehefa manambara ny asa mahatalanjona nataony ny tanora. (Sal. 71:17; Matio 21:16) Raha tanora vita batisa ianao, dia angamba afaka ny ho mpisava lalana mpanampy mandritra ny volana misy vakansy. Raha tsy afaka manao izany ianao, azonao atao tanjona ve ny hampitombo sy hanatsara ny fanompoanao mandritra ireo telo volana manokana? Raha efa miara-manompo amin’ny ray aman-dreninao ianao, nefa mbola tsy mpitory, dia izao angamba no fotoana iezahana mba hahafenoana fepetra. Aza mieritreritra hoe tsy maintsy za-draharaha amin’ny famaliana fanontaniana ara-baiboly ianao, na hoe tsy maintsy manana fahalalana mitovy amin’ny an’ny olon-dehibe efa vita batisa. Azonao ve ireo fampianarana fototra ao amin’ny Baiboly? Manaraka tsara ny fitsipi-pitondran-tena ao amin’ny Baiboly ve ianao? Tianao ve ny ahafantarana anao hoe Vavolombelon’i Jehovah? Resaho amin’ny ray aman-dreninao àry izany. Afaka mandamina fotoana izy ireo mba hiresahanareo amin’ny anti-panahy, hahitana raha mahafeno fepetra ianao na tsia.—Jereo ny boky Ny Fanompoantsika, pejy 98, 99.
6 Ampio ny hafa hitory: Mety hahafeno fepetra hiara-mitory amintsika ny mpianatra Baiboly efa mandroso, mandritra ireo telo volana manokana. Mangataha fanampiana amin’ny mpiandraikitra fianarana boky misy anao na ny mpiandraikitra ny fanompoana, raha manana mpianatra mandroso tsara ianao. Afaka miaraka aminao mampianatra an’ilay olona ny iray amin’izy ireo, mba hijery ny fandrosoany. Raha mahafeno fepetra ilay mpianatra ary te ho mpitory, dia afaka manendry anti-panahy roa hiara-midinika aminareo ny mpiandraikitra mpitantan-draharaha. Ampiofano eny amin’ny fanompoana avy hatrany ilay mpianatra, raha ekena ho mahafeno fepetra.
7 Tokony hikarakara manokana an’ireo tsy mitory intsony na ireo mpitory tapatapaka ao amin’ny fianarana bokiny, ny mpiandraikitra ny fianarana boky. Asao hiara-manompo aminao izy ireo. Raha efa ela izy no tsy nitory intsony, dia tsara kokoa raha misy anti-panahy roa miresaka aminy aloha, mba hijerena raha mahafeno fepetra izy na tsia. (Jereo ny Valin’ny Fanontanianareo, ao amin’ny Fanompoantsika Ilay Fanjakana Novambra 2000.) Mety hampirisika azy handray anjara tsy tapaka indray amin’ny fanompoana ny zotom-pon’ny fiangonana mandritra ireo volana ireo.
8 Miomàna dieny izao mba hanompo bebe kokoa: Ry anti-panahy, ataovy izay hahatonga ny fiangonana hafana fo amin’ny asan’ny mpisava lalana mpanampy dieny izao. Mety tena hahita vokatra tsara ianareo, raha milaza teny mampahery sy manome modely tsara. (1 Pet. 5:3) Firy ny tampon’isa farany tamin’ny mpisava lalana mpanampy teo anivon’ny fiangonana? Azo ampitomboina ve izany amin’ity taona ity? Ny mpiandraikitra ny fianarana boky sy ny mpanampy azy, dia tokony hitady fomba hampirisihana ny rehetra ao amin’ny fianarana bokiny mba hanompo bebe kokoa. Mety handamina fivoriana alohan’ny fanompoana fanampiny ny mpiandraikitra ny fanompoana. Lazao mialoha amin’ny fiangonana izay fandaharana natao. Ataovy azo antoka fa manomboka sy mifarana ara-potoana ireny fivoriana ireny, ary mpitory mahay no mitarika azy. (Jereo ny Valin’ny Fanontanianareo, ao amin’ny Fanompoantsika Ilay Fanjakana Septambra 2001.) Tokony hataon’ny mpiandraikitra ny fanompoana azo antoka koa fa ampy ny faritany sy ny gazety ary ny boky.
9 Izao no nataon’ny anti-panahy teo anivon’ny fiangonana iray tamin’ny taon-dasa: Mialoha be izy ireo dia efa nafana fo erỳ nanentana ny mpitory hanao ny asan’ny mpisava lalana mpanampy. Nameno fangatahana koa ny sasany taminy. Nandamina fivoriana alohan’ny fanompoana fanampiny koa izy ireo. Tamin’ny dimy ora sy sasany maraina ny voalohany, ka fitoriana teny an-dalana no natao. Tamin’ny telo ora tolakandro ny faharoa, ka ny mpianatra nirava no nitoriana, ary tamin’ny enina ora hariva ny farany, ho an’ny olona avy miasa. Nisy fivoriana alohan’ny fanompoana telo koa nalamina isaky ny asabotsy. Namaly ny antso ny fiangonana, ka 66 no nisoratra anarana ho mpisava lalana mpanampy tamin’ny Aprily!
10 Nahoana raha manokana fotoana mandritra ny fianaram-pianakaviana manaraka, handinihana izay tanjona azo tratrarina amin’ireo volana ireo? Mety ho afaka hanao ny asan’ny mpisava lalana mpanampy ny sasany na ny rehetra ao amin’ny fianakaviana, raha mifanampy sy manao fandaharana tsara mialoha. Raha tsy afaka manao izany ianareo, dia ataovy ho tanjona ny handany fotoana betsaka kokoa eny amin’ny saha, ho fampitomboana ny fanompoana. Aoka ianareo mianakavy hivavaka momba izany. Matokia fa hitahy ny ezaka hataonareo i Jehovah.—1 Jaona 3:22.
11 Ny asa mahatalanjona indrindra nataon’Andriamanitra: Ny fanehoam-pitiavana lehibe indrindra avy amin’i Jehovah, dia ny nanomezany ny Zanany ho vidim-panavotana ho antsika. (1 Jaona 4:9, 10) Ny sorona ho vidim-panavotana ihany no fomba ara-dalàna ahafahana manavotra ny olombelona amin’ny ota sy ny fahafatesana. (Rom. 3:23, 24) Nanjary nanan-kery ny fanekena vaovao noho ny ra nalatsak’i Jesosy, ka lasa nisy olombelona tsy lavorary afaka natsangan’Andriamanitra ho zanany sy hanjaka any amin’ny Fanjakana any an-danitra. (Jer. 31:31-34; Marka 14:24) Ambonin’ny zava-drehetra, dia nanamasina ny anaran’i Jehovah ny fankatoavana tanteraka nasehon’i Jesosy. (Deot. 32:4; Ohab. 27:11) Hankalazaina maneran-tany ny Fahatsiarovana ny nahafatesan’i Kristy, amin’ny alahady 4 Aprily aorian’ny filentehan’ny masoandro.
12 Manandratra ny asa mahatalanjona nataon’i Jehovah ny fankalazana ny Sakafo Harivan’ny Tompo. Ilay lahateny hatao amin’io fotoana io, dia hahatonga antsika hahatakatra sy hankasitraka kokoa izay nataon’i Jehovah rehefa nanome ny vidim-panavotana izy. Ho hitan’ny olona liana hanatrika azy io ny firaisan-tsaina sy ny fitiavana lalina nasain’i Jehovah asehon’ny vahoakany. (Efes. 4:16, 22-24; Jak. 3:17, 18) Mety tena hisy heriny eo amin’ny olona iray ny fanatrehana io fotoan-dehibe io, ka tiantsika ho maro araka izay azo atao no ho tonga.—2 Kor. 5:14, 15.
13 Asao ny hafa: Miomàna dieny izao, ka ataovy lisitra ireo tokony hasaina. Tokony ho tafiditra amin’izany ny mpianakavy tsy Vavolombelona, mpifanila trano, mpiara-miasa sy mpiara-mianatra, olona efa nianatra Baiboly na mbola mianatra, ary ny olona rehetra tsidihinao. Tokony hataon’ny mpiandraikitra ny fianarana boky ao anaty lisitra ny olona tsy mitory intsony.
14 Ampiasao ny fanasana amin’ny Fahatsiarovana, ary soraty amin’ny milina, na soraty madio tsara amin’ny tanana eo amin’izy io, ny ora sy ny toerana hanaovana ny Fahatsiarovana. Mety ho azonao ampiasaina koa ilay fanasana eo amin’ny pejy faha-32 amin’ny Tilikambo Fiambenana 15 Martsa 2004. Ampahatsiahivo ireo olona nasainao, rehefa manakaiky ny 4 Aprily.
15 Amin’ny Fahatsiarovana: Miezaha ho tonga aloha. Asehoy fa tia mandray vahiny ianao, ka arahabao amin-kafaliana ireo vaovao. (Rom. 12:13) Ianao no tompon’andraikitra voalohany amin’ny vahiny asainao. Raiso tsara izy, ary ampifankahalalao amin’ny olon-kafa eo anivon’ny fiangonana. Angamba azonao itadiavana toerana eny akaikinao izy ireo. Miaraha mijery Baiboly na fihirana aminy raha tsy manana izy ireo, na mangataha olon-kafa hanao izany. Aoka ianao ho vonona hamaly ny fanontaniana mety hapetrany, rehefa vita ilay fankalazana. Raha vao voalohany ny olona sasany no nanatrika ny Fahatsiarovana, dia anontanio izy ireo raha te hianatra bebe kokoa momba ny Tenin’Andriamanitra sy ny fikasany. Lazao aminy fa afaka mampianatra Baiboly azy any an-tranony ianao.
16 Tohizo ny fanampiana ireo nanatrika: Mety hila fanampiana bebe kokoa ireo nanatrika ny Fahatsiarovana, amin’ireo herinandro manaraka. Anisan’izany ireo nivory tsy tapaka taloha, nefa tsy mifanerasera firy amin’ny fiangonana intsony. Ho vonona ny anti-panahy hijery sao misy hadino ireny olona ireny, ka hamantatra ny antony tsy nampandroso azy ireo intsony. Ataovy izay hampieritreretana azy tsara hoe efa akaiky ny farany. (1 Pet. 4:7) Ampio ny rehetra hahita fa mahasoa ny mankatò ny fampirisihan’ny Soratra Masina mba hivory tsy tapaka miaraka amin’ny vahoakan’Andriamanitra.—Heb. 10:24, 25.
17 Mahatalanjona loatra ny asa nataon’i Jehovah, ka tsy ho takatsika tsara daholo, na dia hiaina mandrakizay aza isika. (Joba 42:2, 3; Mpit. 3:11) Tsy ho tapitra mihitsy àry ny zavatra azontsika iderana an’i Jehovah. Azontsika aseho fa mankasitraka ny asa mahatalanjona nataon’i Jehovah isika amin’ny vanim-potoanan’ny Fahatsiarovana amin’ity taona ity, ka hiezaka handray anjara bebe kokoa amin’ny fanompoana isika.
[Fanontaniana]
1. Iza amin’ireo asa mahatalanjona nataon’i Jehovah no tena ankasitrahanao?
2. Inona no soa azontsika tsirairay rehefa manao ny asan’ny mpisava lalana mpanampy?
3. Ahoana no nahavitan’ny sasany ny asan’ny mpisava lalana mpanampy, na dia sarotra aza ny toe-javatra nisy azy?
4. Inona avy no azo dinihina, rehefa manao fandaharam-potoana hanaovana ny asan’ny mpisava lalana mpanampy?
5. Inona avy no tanjona azon’ny tanora tratrarina amin’ny Martsa sy Aprily ary Mey?
6. Ahoana no anampiantsika ny mpianatra Baiboly ho mpitory ny vaovao tsara?
7. Ahoana no azo anampiana ny mpitory tapatapaka na tsy mitory intsony?
8, 9. Inona no azon’ny anti-panahy atao mba hahatonga ny mpitory hafana fo mandritra ireo telo volana manokana?
10. Ahoana no iomanan’ny fianakaviana hampitombo ny fanompoany?
11. a) Inona avy no zavatra tena lehibe notanterahin’ny soron’i Kristy? b) Aiza ary amin’ny firy no hankalazana ny Fahatsiarovana eto anivon’ny fiangonantsika?
12. Inona no soa ho azon’ny olona liana, raha manatrika ny fankalazana ny Sakafo Harivan’ny Tompo izy?
13, 14. Iza no tokony hasaintsika amin’ny Fahatsiarovana, ary ahoana no hanaovantsika izany?
15. Ahoana no ampisehoantsika fa tia mandray vahiny isika, amin’ny Fahatsiarovana?
16. Ahoana no azo anampiana ireo nanatrika ny Fahatsiarovana mba handroso ara-panahy?
17. Nahoana isika no tokony hanambara hatrany ny asa mahatalanjona nataon’i Jehovah?
[Tabilao, pejy 5]
Afaka Hanaraka ny Iray Amin’ireto Fandaharam-potoana ho An’ny Mpisava Lalana Mpanampy Ireto ve Ianao?
Martsa A* T* A* A Z A A Volana Tontaliny
Isan’andro 1 1 1 1 1 5 2 51
Roa Andro 5 0 5 0 0 0 0 50
Faran’ny Herinandro
Fotsiny 0 0 0 0 0 8 5 52
Faran’ny Herinandro
sy Roa Andro 0 0 2 0 2 6 2 50
Aprily A T A A* Z* A A Volana Tontaliny
Isan’andro 1 1 1 1 1 5 2 50
Roa Andro 0 0 0 5 5 0 0 50
Faran’ny Herinandro
Fotsiny 0 0 0 0 0 8 5 52
Faran’ny Herinandro
sy Roa Andro 0 0 2 0 2 6 2 50
Mey A* T A A Z A* A* Volana Tontaliny
Isan’andro 1 1 1 1 1 4 2 51
Roa Andro 5 0 0 0 0 5 0 50
Faran’ny Herinandro
Fotsiny 0 0 0 0 0 7 3 50
Faran’ny Herinandro
sy Roa Andro 0 0 2 0 2 5 2 51
* Misy dimy ao anatin’ny volana