Fitaovana Lehibe Indrindra Ampiasaintsika ny Boky Ampianarina
1 Dibo-kafaliana tokoa isika rehefa nivoaka ilay boky hoe Inona Marina no Ampianarin’ny Baiboly?, tany amin’ny Fivoriamben’ny Vondrom-paritra “Mankatoava An’Andriamanitra”! Faly erỳ ny mpanatrika nahazo iray avy tamin’izy io, rehefa nifarana ny fandaharana ny asabotsy. Ahoana no hampiasantsika an’io boky vaovao io? Io no ho fitaovana lehibe indrindra hampianarantsika Baiboly. Ampirisihina ny mpitory hampiasa io boky io avy hatrany, rehefa manomboka sy mitarika fampianarana Baiboly, na dia amin’ny Martsa aza izy io vao hatolotsika isan-trano.
2 Ho an’ny olona efa mianatra: Raha efa mianatra Baiboly amin’ny bokikely Takina na Lalana ny olona iray, dia tokony hovitaina hatramin’ny farany aloha izany. Tohizo amin’ilay boky vaovao ny fianarana avy eo, ary atombohy any amin’ny voalohany.
3 Mila mandinika tsara ny mpitory rehefa hanomboka fampianarana Baiboly. Mbola azo atao ny manomboka fampianarana amin’ny bokikely Takina na Lalana, arakaraka ny toe-javatra. Azo atomboka amin’ilay boky vaovao avy hatrany koa anefa izany. Afaka mampiasa an’io boky io ny ray aman-dreny, mba hampitana amin’ny zanany ny fahalalana marina tsara ny sitrapon’Andriamanitra.—Kol. 1:9, 10.
4 Fianarana boky faharoa: Afaka mianatra amin’ny boky hafa ve ny mpianatra Baiboly iray, rehefa mahavita an’ilay boky vaovao? Eny. Azo tohizina amin’ny boky Mivavaha Amin’ilay Hany Andriamanitra Marina ny fianarana, raha toa ka mankasitraka izay ianarany izy ary hita fa mandroso tsara, na dia miadana aza. Azo antoka fa ho fitaovana mahomby mba hanaovana mpianatra ny boky Inona Marina no Ampianarin’ny Baiboly?—Matio 28:19, 20.