Mandraisa Soa Feno avy Amin’ny Fivoriana Alohan’ny Fanompoana
1. Inona no soa azontsika avy amin’ny fivoriana alohan’ny fanompoana?
1 Mahazo fampaherezana sy toromarika azo ampiharina isika alohan’ny hankanesana eny amin’ny faritany, rehefa manatrika fivoriana alohan’ny fanompoana. Afaka miara-manompo amin’ny mpitory hafa isika noho io fandaharana io, ka afaka mifanampy sy mifampizara traikefa. (Ohab. 27:17; Mpit. 4:9, 10) Inona no azontsika atao mba handraisana soa feno avy amin’io fivoriana io?
2. Inona avy no azon’ny mpitarika resahina?
2 Ny mpitarika: Tsy voalaza mialoha ny zavatra hodinihina mandritra ny fivoriana alohan’ny fanompoana. Mila miomana tsara àry ianao, raha ianao no hitarika ilay izy. Aza ny teny hodinihina isan’andro foana no resahina, na dia azo atao aza izany rehefa mifandray mivantana amin’ny fanompoana ilay izy. Mieritrereta kosa hevitra azo ampiharina, mba hanampiana ireo mpitory. Afaka miresaka fomba fitory iray, ohatra, ianao, na azonao atao fampisehoana izany. Azonao atao koa ny maka hevitra avy ao anatin’ny boky Fanjohian-kevitra, na ny boky Sekolin’ny Fanompoana, na avy amin’ny anjara iray tamin’ny Fivoriana Momba ny Fanompoana. Azo dinihina ny fomba hiatrehana ny olana mety ho hita eny amin’ny faritany. Mety koa ny miresaka izay azo atao mba hahatonga ny olona ho liana foana, sy ny fomba hanombohana fampianarana Baiboly, indrindra raha maro ny mpitory hanao fiverenana mitsidika. Aoka ianao hafana fo sy hampahery foana, na inona na inona resahinao.
3. Firy minitra no tokony ho faharetan’ilay fivoriana, ary inona no tokony hovitaina mandritra izany?
3 Atombohy ara-potoana ilay fivoriana, na dia fantatrao aza fa ho tara ny sasany. Manehoa fahendrena rehefa mandamina ireo mpitory, ary omeo faritany ireo mila izany. Tokony ho 10 ka hatramin’ny 15 minitra ny faharetan’ilay fivoriana, fa tsy hihoatra an’izay. Tokony ho fohy noho izany aza ilay izy, raha toa ka atao aorian’ny fivorian’ny fiangonana. Efa tokony hahafantatra ny namany sy ny faritany ny rehetra, alohan’ny hamarananao ny fivoriana alohan’ny fanompoana. Tokony hofaranana amin’ny vavaka ilay fivoriana.
4. Inona no azon’ny rehetra atao mba handraisan-tsoa feno avy amin’ny fivoriana alohan’ny fanompoana?
4 Afaka manampy ianao: Manaja an’i Jehovah sy miahy ny hafa isika raha tonga ara-potoana, tahaka ny amin’ny fivorian’ny fiangonana ihany. Mandraisa anjara amin’ny fiaraha-midinika. Afaka miandry an’ilay mpitarika hanendry izay ho namanao ianao. Raha mifidy mialoha izay ho namanao anefa ianao, dia miezaha ‘hanalalaka ny fonao’, ka miaraha amin’ny mpitory hafa, fa tsy ireo namanao akaiky foana. (2 Kor. 6:11-13) Aza ovana intsony izay fandaharana efa nataon’ilay mpitarika rehefa mifarana ilay fivoriana, ary mandehana avy hatrany eny amin’ny faritany.
5. Inona no tanjon’ny fivoriana alohan’ny fanompoana?
5 Mitovy amin’ny tanjon’ny fivoriana hafa eo anivon’ny fiangonana ihany, ny tanjon’ny fivoriana alohan’ny fanompoana. Natao mba hahafahantsika “hifampihevitra mba handrisika ho amin’ny fitiavana sy ny asa tsara” izy ireny. (Heb. 10:24, 25) Hahazo fanampiana isika ka hahatontosa ny fanompoantsika, raha miezaka handray soa avy amin’ny fivoriana alohan’ny fanompoana. “Asa tsara” tokoa ny fanompoantsika!