Hazavain’ny Baiboly Izay Hitranga Amin’ny Fivavahana

Diso fanantenana amin’ny fivavahana ve ianao sa tsy te hiherika fivavahana intsony mihitsy? Marina hoe nahasoa fiaraha-monina sy olona sasany ihany ny fivavahana, fa betsaka koa anefa ny loza naterany. Milaza ny Encyclopedia of Religion and War hoe: “Zavatra inoana tsy mitovy no nahatonga ny sasany amin’ny ady nahatsiravina indrindra hatramin’izay.” Matetika no ampiasain’ny mpitondra fivavahana hanohanana hevitra ara-politika ny fivavahana fa tsy hanompoana an’Andriamanitra. Ny mpitondra fivavahana hafa indray manafina ny fanararaotana ara-nofo sy ny fanodinkodinam-bola ataony.

Raha diso fanantenana amin’ny fivavahana ianao dia mety ho lasa saina hoe ahoana koa ny fahitan’Andriamanitra ny fivavahana. Milaza ny Baiboly hoe tsy ankasitrahan’Andriamanitra ny ankamaroan’ny fivavahana, noho ny zavatra ataon’izy ireo. Misy faminaniana koa ao dia hita amin’ireny hoe inona no hataon’Andriamanitra amin’ny fivavahana. Mampiasa teny an’ohatra ny Baiboly mba hilazana hoe tsy ho ela Andriamanitra dia hanao zavatra amin’ny fivavahana ary mbola tsy nisy hoatr’izany mihitsy hatramin’izay.

Inona no resahin’ny Baiboly momba an’izay hitranga amin’ny fivavahana?

Faminaniana: Miresaka mpivaro-tena iray antsoina hoe Babylona Lehibe ny Baiboly ao amin’ny bokin’ny Apokalypsy. Mitaingina bibidia mena midorehitra ilay mpivaro-tena. Hivadika aminy anefa ilay bibidia avy eo dia hamono azy.​—Apokalypsy 17:3, 5, 16.

Dikany: Manondro ny fivavahan-diso rehetra, izany hoe ireo fivavahana tsy eken’Andriamanitra ilay vehivavy mpivaro-tena antsoina hoe Babylona Lehibe.a Ilay bibidia mena midorehitra indray manondro ny Firenena Mikambana (ONU).b Ilay mpivaro-tena mitaingina an’ilay bibidia mena midorehitra indray midika hoe tian’ny fivavahan-diso hofehezina na tiany hobaikoina mihitsy ny ONU. Hamono an’ilay mpivaro-tena ilay bibidia, izany hoe hivadika amin’ny fivavahan-diso rehetra maneran-tany ny ONU sy ny firenena manohana azy, dia handringana tanteraka azy rehetra. Ho vita hatreo ny amin’ny fivavahan-diso.

Ahoana no handringanana ny fivavahan-diso?

Faminaniana: “Ny tandroka folo efa hitanao, sy ilay bibidia, dia hankahala an’ilay mpivaro-tena ka handroba an’izay ananany rehetra ... ary hodorany tanteraka amin’ny afo izy. Efa nataon’Andriamanitra tao am-pon’izy ireo [tao am-pon’ny mpitondra fanjakana] mantsy ny hanatanteraka ny heviny, izany hoe ny hanatanteraka an’ilay hevitra tokana iombonan’izy ireo, dia ny hanome ny fanjakany ho an’ilay bibidia ... Ho tonga ao anatin’ny iray andro ihany ny loza hanjo azy, dia fahafatesana sy alahelo ary mosary. Dia hodorana tanteraka amin’ny afo izy, satria mahery i Jehovahc Andriamanitra, ilay nitsara azy.”​—Apokalypsy 17:16, 17; 18:8.

Dikany: Hataon’Andriamanitra izay hahatonga “ny heviny” ho ao an-tsain’ireo firenena eran-tany. Inona ilay “heviny”? Hoe homen’ireo firenena ireo an’ny ONU ny fahefan-dry zareo, izany hoe “ny fanjakany.” Rehefa mahazo an’ilay fahefana ny ONU avy eo, dia handringana tanteraka ny fivavahan-diso maneran-tany. Hoatran’ny hoe “ao anatin’ny iray andro” no hitrangan’izany, izany hoe ho haingana be sy ho tampoka amin’ny olona.​—Apokalypsy 18:21.

Fa maninona no horinganina ny fivavahan-diso?

Faminaniana: “Efa nivangongo hatrany an-danitra ny fahotany, ary efa tadidin’Andriamanitra ny tsy rariny nataony.”​—Apokalypsy 18:5.

Dikany: Nanao zava-dratsy be dia be ny fivavahan-diso nandritra ny an-jatony taona, dia izany no mahatonga an’Andriamanitra hanameloka azy. Jereo ange ireto fahotany ireto e:

Miditra amin’ny politika. Nampianatra ny mpanara-dia azy i Jesosy Kristy hoe tsy tokony hanao politika ry zareo fa hatoky ny Fanjakan’Andriamanitra. Any an-danitra io Fanjakana io ary hisolo ny fitondran’olombelona.d (Daniela 2:44; Matio 6:9, 10; Jaona 6:15; 18:36) Ny fivavahan-diso anefa mampirisika ny olona hatoky ny fanjakan’olombelona. Mamadika an’Andriamanitra ry zareo dia miditra lalina amin’ny politika. Izay no mahatonga an’ilay faminaniana ao amin’ny Apokalypsy hilaza hoe meloka ho “nijangajanga” i Babylona Lehibe, ary mety tsara ny iantsoana azy hoe “mpivaro-tena lehibe.”​—Apokalypsy 17:1, 2; Jakoba 4:4.



Mahery setra. Ny fivavahan-diso no voalaza fa tompon’andraikitra amin’ny fahafatesan’izay “rehetra naripaka teny ambonin’ny tany.” (Apokalypsy 18:24) Be dia be ny fivavahana tsy mampianatra ny mpiangona ao aminy ho tia fihavanana. Manohana ny ady ry zareo na mampirisika ny mpiangona ao aminy hiady sy hanao asa fampihorohoroana mihitsy aza.



Tsy mety afa-po. Manara-po amin’ny “zavatra lafo vidy maro be” ny fivavahan-diso ary ‘efa tsy mahamenatra azy intsony’ izany. (Apokalypsy 17:4; 18:7) Manana fahefana sy mahafantatra olona ny fivavahana maro dia hararaotiny izany mba hanangonana harena be dia be. Tena tsy tian’Andriamanitra izany.​—Titosy 1:7.



Mandainga. Mampianatra ny olona hino sy hanao zavatra mifanohitra amin’izay lazain’ny Baiboly ny fivavahan-diso.e Be dia be àry ny olona voafitaka sady afa-baraka ny anaran’Andriamanitra. Izay no mahatonga an’ilay faminaniana hiantso ny fivavahan-diso hoe “renin’ny ... zava-maharikoriko eto an-tany.”​—Apokalypsy 17:5; 18:23.

Ny fivavahana rehetra ve no ho ringana?

Tsia. Miresaka momba ny olona avy amin’ny firenena samihafa ny bokin’ny Apokalypsy ary antsoiny hoe “vahoaka be” ry zareo. (Apokalypsy 7:9) “Manao akanjo fotsy lava” ry zareo, izany hoe manaraka ny fitsipik’Andriamanitra rehefa manompo azy sady tsy mivadika aminy. Ho tafavoaka velona amin’ilay fotoana antsoin’ny Baiboly hoe “fahoriana lehibe” ry zareo. Io fotoana io ilay handringanan’Andriamanitra ny fivavahan-diso sy ny fahavalon’Andriamanitra rehetra. (Apokalypsy 7:13, 14; 19:11, 19-21) Ao amin’ny fivavahana marina io vahoaka be manao akanjo fotsy lava io, ary tsy ho ringana mandrakizay ny fivavahany.f

Rehefa fantatrao hoe haringana ny fivavahan-diso, dia inona no vokatr’izany aminao?

Mampahery anao ny mahafantatra hoe tsy ankasitrahan’Andriamanitra ny zavatra mahatsiravina ataon’ny fivavahana. Hahafinaritra anao koa ny mieritreritra hoe kely sisa dia tsy hisy intsony ny fivavahana manala baraka an’Andriamanitra sy mahatonga ny olona hijaly.

Ankoatra izay, dia afaka matoky ianao hoe azo atao ny manompo an’Andriamanitra amin’ny fomba ankasitrahany. Milaza ny Baiboly hoe: “Ny tena mpivavaka hivavaka amin’ny Ray araka ny fanahy sy ny fahamarinana. Fa olona hoatr’izany mihitsy no tadiavin’ny Ray mba hivavaka aminy.” (Jaona 4:23) Izao no lazain’Andriamanitra amin’ny olona hoatr’izany: “Mivoaha avy ao aminy [avy ao amin’ny Babylona Lehibe], ianareo vahoakako, raha tsy tianareo ny hiray tsikombakomba aminy amin’izay fahotana nataony, ary raha tsy tianareo hahazo anareo ny loza hanjo azy.” (Apokalypsy 18:4, 5) Manasa ny olona izany Andriamanitra mba hanompo azy mifanaraka amin’ny fahamarinana ao amin’ny Baiboly. (1 Timoty 2:3, 4) Mampanantena izy fa hiaina mandrakizay izay manaiky ny fanasany.​—1 Jaona 2:17.