Nnawuupuwela?

Nyuuva nhosoma ratta irevista Ukhalenla co nantano? Vano, mmananihe waakhula ala makohwaala:

Ifayitani cinhaleehu uphwanya neevahaka ukati wiira nimuulumane Yehova, ninviriyane ni nuupuwele citthu cawe?

Ninaahala ulakela upanka citthu comaana, ucuwela wiitthuciha ratta ni ukhalana waamini woolipa ni ninaahala utepa unfenta Yehova. —w22.01, ipaag. 30-31.

Ifayitani cinhaleehu uphwanya neetthucaka unkhuluvela Yehova ni waakhuluvela alopwana yaavahacenryaawe waahoolela apoovwaawe?

Ula phuukati wookhuluvela mananna Yehova cimpankaawe citthu cawe, utthara malakihero ni citthu cinlakelaaya mahumu. Napankaka commo, khunhala unirika weettela malakihero yanceraka masakha moolupale, hataa nihoonaka isariyaaya ayo malakiherwaayo.—w22.02, ipaag. 4-6.

Isiyani nlayikha naapheelaaya uhimya ukati woolumalyaaya ‘nkhoyi wo wookolela inupa’ waahala ukhala ‘mmatatani wa Zorobabel [nhooleli aayuuta]’? (Zakar. 4:8-10)

Nlayikha naapheela uhimya wiira hataa itempulu ihikhalaka yuulupale cinene, iyo yaanaahala umalihiya utekiya khampa Yehova caapheelaawe.—w22.03, ipaag. 16-17.

Isiyani inlamuliyeehu upanka wiira nikhale ‘atthu ooreera utakihiya nhina wo moolumelweehu’? (1 Tim. 4:12)

Nihaana niwuulumanaka akhwiihu ratta ni niihima wuulalyaani, ukomentari umikutthaanoni ni wiipa ninrimeehu wotheene. Ciicammo, nihaana nihimyaka ikhweeli awula uhootha ni uhaatarawaca akhwiihu, masi ulipihana nimayamunneehu.—w22.04, ipaag. 6-9.

Kontha isiyani nsene no Apokalipise 13:1, 2 ninaalattanaca nimasene macese (ikuvernu cese) anoolumiya nhina ikapiitulu 7 ya Daniele?

Nsene ninoolumiya nhina Apokalipise ikapiitulu 13 khaninaacaka ikuvernu imoca, toko Roma. Masi ninaaca ikuvernu cotheene ca apinaatamu ukhuma nenne nokhalayi mpaka nna co.—w22.05, ipaag. 9.

Manannani ninthoonyereehu wiira ninaakhuluvela isariya ya Nluku?

Ntthu anitthekelaka khaninlamuliya uncukula awula urusiya nuuyo. Nihaana nihiyaka uyo mwahooyo mmatatani wa Yehova. Uyo naahala umalamaliha citthu cooniriipiha nrima cotheene cinkhumelela nlattu wo matampi.—w22.06, ipaag. 10-11.

Munna nolattuliya ulompa wankutthaanoni isiyani inlamuliyaawe wuupuwela?

Ayo mavekelwaayo khanlamuliya upankiya wiira avahiye ikano mayamunna o wanlokoni awula wiira avahiye mahimyo. Munna nolattuliya ulompa khanlamuliya wuuluma “moolumo menci,” venci-venci wakhalaka wiipaceroni mikutthaano. (Mt 6:7)—w22.07, ipaag. 24-25.

Weeriyaka wiira ale “apankale citthu cootakhala” anaahala “wunwelelihiya wiira ahukhumwiye” maanaaya isiyani? (Joau 5:29)

Ayo khanhala uhukhumwiya wiira attarusiye nlattu wo citthu cipankilyaaya ahinaaya ukhwa. Masi uhukhumwiya unaaciya ukhanle uweheehiya wiira yooniye wakhala wiira anaahala weettela awula mena citthu cinhalaaya wiitthucihiya upeephoni.—w22.09, ipaag. 18.

Moolumoni oolipiha amunna Rutherford yoolumalyaaya wakonkereesuni yo Setembro, mwaakha wo 1922?

Wakonkereesuni yaapankiye u Cedar Point, Ohio, EUA., amunna Rutherford yaheera: “Mwene hancera ulamulela! Ni nyuuva nkhanle atthwaawe anlamuliya unlalya. Phimaana, munlalye, munlalye, munlalye Mwene ni nlalye Umwennyaawe!”—w22.10, ipaag. 3-5.

Manannani mararu Yehova cinnikaviheraawe uvilela masakha anoolumiya nhina ikapiitulu 30 ya Isaiya?

Iyo ikapiitulwiiyo inawoonihera wiira Yehova (1) naaviriyana ulompa wihu ni nawaakhula, (2) naanivaha malakihero ni (3) naanicaaliha nnava ni naahala unicaaliha wahoolo.—w22.11, ipaag. 9.

Nlattuni nineereehu wiira moolumo o Isaalimu 37:10, 11, 29 aheerannya khalayi ni anaahala wiirannya wahoolo?

Moolumo a Davidi yaherannya khalayi ilapo yo Isarayeli, ukati waalamulelaawe mwene Salomau. Masi Yesu ahoopela mwaha iveerusu 11 ni aheera wiira iyo itthwiiyo inaahala wiirannya wahoolo. (Mt 5:5; Luk 23:43)—w22.12, ipaag. 8-10, 14.