Uzye Baibo Ingamwazwa Ndi Cakuti Mwalwala Ulwale Uwipisye?

Vino Baibo yalandapo

Ee. Leza akasakamala aomvi yakwe alwale. Ukulozya uku yaomvi yakwe acisinka Baibo ikati: ‘Umu kulwala Yeova akamwazwa, nu kumuletela umutende wa mpomvu.’ (Masamu 41:3) Ndi cakuti mwalwala ulwale uusipola, ivintu vii vitatu ivyalondelelapo vingamwazwa ukuzizimizya:

1. Mwapepa kuli Leza pakuti amwazwa ukuzizimizya. Mungaya nu “mutende uno kusi umuntu nanti wenga angaumanyikisya,” uungamwazwa ukucefya masakamika nu kutwalilila ukuzizimizya asi mulandu ni ntazi.—Filipi 4:6, 7.

2. Mwaika mano pa visuma. Baibo ikati: “Umwenzo wa nsansa umulembo usuma sana. Umwenzo utitikiziwe ukaumya amafupa.” (Mapinda 17:22) Mwasekako, pano ukucita vivyo kungalenga mucefyeko ulanda nu kuzifyako umi.

3. Mwaika mano pa vintu ivilacitika uku nkoleelo. Ukuya nu upaalilo kungamwazwa ukuya ni nsansa asi mulandu nu kulwalilila. (Loma 12:12) Baibo ikalanda pa nsita ino “patalaya nanti wenga alailizyanya apakulwala.” (Ezaya 33:24) Lyene Leza alapozya indwala zino ya sayansi ya ndakai yatanga yapozye. Baibo ikalanda pali vino antu yalata ukukota, ikati: “Lekini umwili wakwe uzipe ukucila uwa mwance; akwate sana maka wakwe vino wali lino wali umwance.”—Yobo 33:25, NWT.

Manyini cii: Nanti icakuti ya Nte Yakwe Yeova yamanya ukuti Leza akayazwa, nayo kwene yakaya uku vipatala pa mulandu ni ndwala izisipola. (Mako 2:17) Nomba swemo tusinena antu ukuti imilwazizye imwi ali isuma sana; twamanya ukuti cila muntu alinzile ukuipingwila vino alinzile ukulwaziwa.