VINO TUNGACITA LINO IVINTU VYAKOMA IMITENGO

Mwateeka Umwenzo Kuli Vino Mukweti

Antu yano yateeka imyenzo yakalola ukuti vino yakwata vyayalinga. Nupya ndi cakuti ivintu vyasenuka umu umi wao, yakasenuka nu kulaikala ukulingana na vino yakweti.

MULANDU UNO CACINDAMILA UKUCITA VII

Ya Jessica Koehler asambilila sana pa myelenganyizizye iya yantu, yazanyile ukuti antu yano yakateeka imyenzo yasisakamala sana. Nupya yazanyile nu kuti yasiuvwila antu yauze uzuwa. Fwandi ali mulandu uno antu yano yakateeka imyenzo yakaya sana ni nsansa nupya yasisakamikwa sana. Nupya antu yano yatakwata ivintu ivingi ali yano yakaya ni nsansa ilingi. Vikwene ali vino caya nu ku yantu yano ika sana mano uku vintu ivicindamishe umu umi, wakwe insansa izikaiza pa mulundu nu kuya pamwi na ya lupwa alino ni vyuza.

“Nga tukweti ivyakulya ni vyakuzwala, twateeka imyenzo kuli vivyo kwene.”—1 Timoti 6:8.

VINO MUNGACITA

Mutailinganya kuli yauze. Ndi cakuti mukuilinganya kuli yano yakwata ivintu ivingi ivya mutengo, cingamutalila ukuteeka umwenzo nupya cingalenga muye nu uzuwa. Mungalola ukuti antu yano yakwata ivintu ivingi vya mutengo akankala sana, nomba antu yamwi akwata ivintu ivingi yakwata sana inkongole. Ya Nicole, yano yakaikala uku Senegal, yatiile: “Nsilondekwa ivintu ivingi pakuti naya ni nsansa. Ndi cakuti nkuteeka umwenzo kuli vino nkweti, ningaya ni nsansa nanti icakuti yamwi iyakwata ivingi ukuncila.”

Mungezya ukucita vii: Mutaika mano kuli vino yakaika pa intaneti ivikalangilila impiya nanti ivintu vya mutengo vino yamwi yakwata.

“Nanti cakuti umuntu wakwata ivingi, umi wakwe utaaya muli vino wakwata.”—Luka 12:15.

Mwataizya. Antu yano yakataizya cikayangukila ukuteeka umwenzo kuli vino yakweti alino nu kukanayuvwa ukuti yakalondekwa ivintu ivingi. Ya Roberton, aa ku Haiti, yatiile: “Nkakwata insita iya kwelenganya pa vintu ivisuma vino yamwi yancitila nanti ukucitila amu lupwa lwane. Lyene nkaneena antu yayo ukuti nkataizya sana pali vino yacita. Nupya nkasambilizya nu mwanane umulumendo uwa myaka 8 ukulanda ukuti nataizya lyonsi lino yamwi yamupeela cimwi.”

Mungezya ukucita vii: Cila wanda, mwalemba ivintu ivisuma vino ivimucitikila. Mungataizya pa umi usuma uno mukweti, ulupwa ululemane, vyuza vya cumi nanti ukutaizya pali vino ilanzi likaloleka lino likuwa.

“Lelo umwenzo wa luzango ukailyokezya insita zyonsi.”— Mapinda 15:15.

Insita zimwi cikatutalila ukuteeka imyenzo pali vino tukweti. Nomba ndi cakuti twezya na maka ukucita vivyo ivintu vikatuzipila! Ndi cakuti tukuteeka imyenzo kuli vino tukweti cilalenga ukuti twaya ni nsansa zino ivyuma vitanga vilenge ukuti tukwate.