Katak 10

Ailiñ Iñ Anij Ej Iroij

1, 2. Ewi wãwen kien ko an armij rar kalikar bwe relikjab?

BÕLEN ear wõr juõn ien ke kwar wiaik juõn kein jerbal, im lak lale ejjab jerbal. Jen ba kwar kir juõn ri jerbal bwe en kõmmane. Bõtab, mwijin wõt an “kõmmane” e bar jorrãn. E menin kaburomõjmõj elap!

² Enañin wãwen dein kien ko an armij. Jen jinoin armij rar kõnan juõn kien eo enaj kar letok ainemõn im mõnõnõ. Bõtab, air lukkun kate ñan kajimwe jorrãn ko rar walok ilo jukjuk im bed ko air ejañin lukkun tõbrak. Emwij kõmman elõñ kwon kin ainemõn​—ak rar rup. Bar juõn, kien ta eo im emwij an jolok mour in jeramel, kalijeklok, kowadoñ, nañinmij, im jorrãn ñan lal in ad? Kien eo an armij e le jen maroñ in kajimwe. Bar Solomon King in Israel eo emeletlet ear kajitõk: “Ekijkan an juõn armij maroñ in melele ial eo an?”​—Jabõn Kennan Ko 20:24.

3. (a) Kar ta unin tel in kwalok nan eo an Jesus? (b) Ewi wãwen an jet armij kamelele kin Ailiñ in Anij?

³ Jab ebwer! Juõn kien ekeie kin lal ejjab juõn menin ettõnak wõt. Eñin kar unin tel in kwalok nan eo an Jesus. Ear naetan “ailiñ in Anij,” im ear katakin ri kalor ro an bwe ren jar kake. (Luk 11:2; 21:31) Ealikar, bwe jet ien dolul in kabuñ ko rej kennan kin Ailiñ in Anij. Ilo mol, elõñ million rej jar kake ran otemjej ñe rej eliji Jar eo an Iroij (bar naetan Jememuij Ilañ ak jar eo an Jesus). Ak ekajju wãwen an armij ro uak ñe kajitõkin ir, “Ta Ailiñ in Anij?” Jet rej ba, “Ej bed i buruõm.” Ro jet rej ba bwe ebed ilañ. Bible eo ej letok juõn uak ealikar, einwõt ad naj loe.

JUÕN AILIÑ EWÕR KARÕKIN

4, 5. Etke Jehovah ear kãlet in bõkmantak juõn wãwen ekãl jen kien eo an, im ta eo enaj kõtõbrake?

⁴ Jehovah Anij kar King ien otemjej, ak Iroij Ekajur Bõtata, ijoko otemjej. Ke ilo mol ear kõmanman men otemjej inem ej tellokin an bõk jikin in eutiej. (1 Kronikel 29:11; Sam 103:19; Jerbal 4:24) Ak Ailiñ eo me Jesus ear kennan kake ej ilalin, ak kein karuo, ñe keidi ibben kien eo an Anij eo ej ion men otemjej. Ailiñ in an Messiah ewõr karõkin im ejenolok, ak ta eo?

⁵ Einwõt kar kamelele kake ilo Katak 6, armij ro ruo jinoin rar jumae maroñ eo an Anij. Kin aitwerõk ko rar walok, Jehovah ear bõkmantak juõn wãwen ekãl jen kien eo an. Anij ear kalikar karõk eo ñan kwalok juõn “ine” eo enaj kokkure Serpent eo, Satan, im jolok jerata eo armij rar jolet jen jerawiwi. “Ine” elap eo ej Jesus Christ, im “ailiñ in Anij” ej kein jerbal eo im enaj kokkure Satan ñan indio. Ikijen Ailiñ in, Jesus Christ enaj kajeblak maroñ in iroij ilal ilo etan Jehovah im jurake kien eo ejimwe ñan indio.​—Jenesis 3:15; Sam 2:2-9.

6, 7. (a) Ailiñ eo ej bed ia, im wõn King eo im iroij ro mõttan ibben? (b) Wõn ro rej ro don Ailiñ eo?

⁶ Ekkar ñan juõn ukok in Bible kin nan ko an Jesus ñan Pharisee ro renana, ear ba: “Ailiñ in Anij ej bed ilo kom.” (Luke 17:21, King James Version) Eñin melele eo an Jesus ke bwe Ailiñ eo ear bed iburuen armij rein im renana? Jaab. Juõn ukok emõnlok ilo kajin Greek jen jinoin ej ba: “Ailiñ in Anij ej bed iolapemi.” (New World Translation) Jesus, eo ear bed iolapeir, kar kennan kin e make einwõt King eo enaj itok. Melele in bwe Ailiñ in Anij ej bed iburuen armij etolok jen mol eo bwe ej juõn kien emol, eo ej jerbal im ewõr an iroij im ro don. Ej juõn kien ilañ, im rej naetan “ailiñ in lõñ” im “ailiñ in Anij.” (Matu 13:11; Luk 8:10) Ilo juõn vision, ri kanan Daniel ear lo bwe Iroij in ailiñ in ej “juõn eo einwõt nejin armij” im kar bõkloke iman Anij Ekajur Bõtata im kar lelok ñan e “maroñ im utiej im ailiñ eo, bwe armij ro, ri ailiñ ko im bwij ko im kajin ko ren aolep jerbal ñan e.” (Daniel 7:13, 14, NW) Wõn in ej King? Eokwe, Bible eo ej naetan Jesus Christ “Nejin armij.” (Matu 12:40; Luk 17:26) Aet, Jehovah ear karõke Nejin, Jesus Christ, bwe en King.

⁷ An Jesus iroij ejjab make wõt ian. Ibben ewõr 144,000 ro kar “wiaik ir jen lõl” bwe ren king ro im priest ro ibben. (Reveles̃õn 5:9, 10; 14:1, 3; Luk 22:28-30) Ro don Ailiñ in Anij renaj juõn family in armij ro im rej kõttãik ir ñan tel eo an Christ. (Sam 72:7, 8) Bõtab, ewi wãwen ad maroñ kamol bwe Ailiñ in enaj kokwojarjar maroñ eo an Anij im kajeblaktok mour in paradise ñan lal in ad?

MOL IN AILIÑ EO AN ANIJ

8, 9. (a) Ewi wãwen jemaroñ kõkkar bedbed in ad liki kallimur ko kin Ailiñ in Anij? (b) Etke jemaroñ liki bwe Ailiñ eo emol an bed?

⁸ Ta elañe juõn kijeek ear kokkure mweo imõm. Kiõ juõn jeram eo ewõr maroñ ibben ej kallimur bwe enaj jibañ yuk ñan bar kalek mweo imõm im enaj lewõj kijen family eo am. Elañe jeram in ear mol ñan yuk aolep ien, kwojamin tõmak e ke? Jen ba ran eo juõn kwoj jeblak jen am jerbal ñan mweo im kwoj lo bwe ri jerbal ro emwij air jino karreoiki jen menoknok in kijeek eo im rar bõktok mõñã ko ñan family eo am. Ejelok bere bwe kwonaj lukkun liki bwe elikin jidik ien, men otemjej renaj jab baj emõn wõt ak renaj emõnlok jen mokta.

⁹ Jehovah, ilo ejja wãwen in wõt ej letok kein kamol ko kin Ailiñ eo an bwe emol an bed. Einwõt book in Hebrew ilo Bible ej kwalok, elõñ tibdikdikin Kien eo kar pijaiki karõk eo kin Ailiñ in. (Dri Hibru 10:1) Kanan ko kin Ailiñ in Anij rar bar alikar ilo ailiñ in Israel mokta. Kien in kar jab einwõt kien ko jet, ke iroij ro rar jijet ion “tron an Jeova.” (1 Kronikel 29:23) Bar juõn, emwij kanan bwe: “Septer e jamin ilok jen Juda, ak jokwõnõn iroij jen ikõtan neen, ñõn ien Shailo ej itok; im armij rõn re naj bokake.” (Jenesis 49:10)a Aet, kar ñan loan family in king an Judah bwe Jesus, King indio kin ailiñ eo an Anij, enaj kar lotak ie.​—Luk 1:32, 33.

10. (a) Ñããt eo kar likit foundation eo kin Ailiñ in Messiah an Anij? (b) Ro renaj iroij ibben Jesus renaj kar lolorjake jerbal et eo im elap tokjen ilo lal?

¹⁰ Foundation in Ailiñ in Messiah eo an Anij kar karõke ke Jesus ear kãlet ri jilek ro an. (Dri Epesõs 2:19, 20; Reveles̃õn 21:14) Rein rar moktata ian 144,000 ro im renaj iroij ilañ einwõt king ro ibben Jesus Christ. Ilo air bed ilal, rein im renaj iroij ibben rej tel ilo jerbal in kennan, im lor nan in jiroñ an Jesus: “Komin ilok . . . im kõmõn dri ailiñ ko otemjej bwe ren dri kalora, im baptais ir ilo etan Jema im Nejin im Jitõb Kwojarjar.”​—Matu 28:19.

11. Ewi wãwen jerbal in kwalok-Ailiñ eo ejejjet rainin, im ta tõbrakin?

¹¹ Kiõ nan in jiroñ eo ñan kõmman ri kalor ro emwij an jejjet ilo juõn joñan eo ejañin kar einwõt. Ri Kennan ro an Jehovah rej kwalok wõt kin news eo emõn kin Ailiñ eo iaolepen lal, ekkar ñan kanan eo an Jesus: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.” (Matu 24:14) Juõn ian mõttan wãwen jerbal in kwalok kin ailiñ eo im emwij an ijjino ej kin juõn program elap kin katakin. Ro im rej kõttãik ñan kien ko im nan in kaiñi ko an Ailiñ in Anij emwij air eñjake juõn ainemõn im burukuk eo me kien ko an armij rejjab maroñ tõbare. Men kein aolep rej kamol ilo alikar bwe Ailiñ in Anij emol an bed!

12. (a) Etke ejimwe naetan ri kwalok ro kin Ailiñ eo Ri Kennan ro an Jehovah? (b) Ekijkan an Ailiñ in Anij oktak jen kien ko an armij?

¹² Jehovah ear jiroñ Ri Israel ro: “Kom dri kennan ro Aõ, . . . im dri kõrijera I ar kãlete.” (Aiseia 43:10-12) Jesus, “Dri Kennan etiljek,” ear kijejeto im kwalok news in emõn kin Ailiñ eo. (Reveles̃õn 1:5; Matu 4:17) Inem ejimwe bwe ri kwalok ro kin Ailiñ eo rainin ren bõk ãt in jen Anij Ri Kennan ro an Jehovah. Ak etke ri Kennan rein elap air kajerbal ien im kate bwe ren kennan ibben ro jet kin Ailiñ in Anij? Rej kõmman menin kinke Ailiñ in ej kejatdikdik eo wõt ñan armij ro. Kien ko an armij rekõnan jorrãn lokin jet ien, ak Ailiñ in Anij eban jako. Aiseia 9:6, 7 ej naetan Iroij eo an, Jesus, “Iroij in Ainemõn” im ebar ba: “Enaj ejelok jemlokõn orlok in men in iroij eo An im inemõn.” Ailiñ in Anij ejjab einwõt kien ko an armij​—rebed rainin im ilju rejakolok. Ilo mol, Daniel 2:44 (NW) ej ba: “Anij in lañ enaj kajutak juõn ailiñ eo ejamin jeebeplok, ak enaj kajeebeplok aolepen ailiñ ko jet. . . . Im enaj bed ñan indio.”

13. (a) Ta jet ian abañ ko im Ailiñ in Anij enaj emõn an anjo ion? (b) Etke jemaroñ liki bwe kallimur ko an Anij renaj jejjet?

¹³ Ian king in armij ro ewi iar im emaroñ kõmman bwe en jako tarinae, kowadoñ, nañinmij, kwuli, im aikwij kin moko? Bar juõn, wõn iroij in lal im ewõr maroñ ibben ñan kajerkakbijeik ro im rar mij? Ailiñ in Anij im King eo an enaj kõtõbrak men kein. Ailiñ eo in ejamin likjap, einwõt kein jerbal ko rejorrãn im aikwij kamadmõde wõt aolep ien. Jen an eindein, Ailiñ in Anij enaj jerammõn, ke emwij an Jehovah kallimur: “Nan eo ej waloklok jen loñiõ . . . e jamin jeblaktok ñõn iba im ejelok tokjen, a e naj kõmõn men eo I kõnan, im e naj jerammõn ilo men eo Ij jilkinlok e kake.” (Aiseia 55:11) Karõk eo an Anij ejamin likjap, ak enaj ijjino ñããt kien Ailiñ eo?

KIEN AILIÑ EO​—ÑÃÃT?

14. Kar ta likjap in melele eo ibben ro ri kaloran Jesus kin Ailiñ eo, ak ta eo Jesus ear jelã kake kin ien iroij eo an?

¹⁴ “Iroij, kwoj bar karõk ailiñ in Israel ien in ke?” Kajitõk in jen ri kaloran Jesus ej kalikar bwe rejañin kar jelã karõk eo kin Ailiñ in Anij im ien eo emwij karõke bwe en jino an jerbal. Ke ear kakkõl ir bwe ren jab antone kake menin, Jesus ear ba: “E jab emõn ami jelã ien ko, ak tere ko Jema e ar likiti ilo An kajur.” Jesus ear jelã bwe ien iroij eo an ion lal kar karõke kin ien ko iman, etto jen ien an jerkakbiji im wanliñlok ñan lañ. (Jerbal 1:6-11; Luk 19:11, 12, 15) Jeje ko emwij air kar kanan kake. Ewi wãwen?

15. Ewi wãwen an Sam 110:1 kameramlok ad melele kin ien eo Jesus enaj bõk an kajur ñan iroij?

¹⁵ Ilo an kar kennan kin Jesus einwõt “Iroij,” King David ear kanan: “Jeova e ar ba ñõn aõ Iroij, Kwon jijõt i anbijmaroñiõ mae ien ij kõmõn bwe ro rej kijirãt Yuk ren eran neõm.” (Sam 110:1; keidi Jerbal 2:34-36.) Kanan in ear kalikar bwe ien iroij eo an Jesus ejamin jino elikin wõt an wanliñlok ñan lañ. Bõtab, enaj kõttar wõt i anbijmaroñin Anij. (Dri Hibru 10:12, 13) Enaj ewi toan an kõttar? Enaj ijjino ñããt ien an iroij? Bible eo ej jibañ kij ñan lo uak ko.

16. Ta ear walok ilo 607 B.C.E., im ewi wãwen an jelet Ailiñ in Anij?

¹⁶ Jikin kwelok eo wõt ilo aolepen lal ijo Jehovah ear likit etan ie kar Jerusalem. (1 Kiñ Ro 11:36) Ear bareinwõt capital eo an ailiñ eo Anij ear kowãppen ilal im emwij kõkkar kin Ailiñ eo an Anij ilañ. Kin menin, jorrãn eo an Jerusalem jen Ri Babylon ro ilo 607 B.C.E. kar obrak kin melele ko remũlal ie. Ien in kar ijjino juõn ien eaetok in bõprae an Anij iroij ion armij ro an ilal. Enañin jiljino buki yiõ ko tokelik, Jesus ear kalikar bwe ien in bõprae an Anij iroij ear wõnmanlok wõt, ke ear ba: “Im dri ailiñ ko re naj juri Jerusalem, ñõn ien ko an dri ailiñ ko rejejit.”​—Luk 21:24.

17. (a) Ta melelen “ien ko an dri ailiñ ko,” im naj ewi toan air bed? (b) Ñããt ear ijjino im jemlok “ien ko an dri ailiñ ko”?

¹⁷ Iumin “ien ko an dri ailiñ ko,” Anij ear kamelim kien ko an lal bwe ren bõprae kien eo ej emõn ibben. Ien in ear ijjino ke Jerusalem ear jeebeplok ilo 607 B.C.E., im Daniel ear kalikar bwe ien in enaj wõnmanlok wõt iumin “jiljilimjuõn alen.” (Daniel 4:23-25, NW) Ewi toan menin? Bible eo ej kwalok bwe jilu im jimettan “ien” rej einwõt 1,260 ran ko. (Reveles̃õn 12:6, 14) Korlok ien in kin ruo, ak jiljilimjuõn alen, enaj einwõt 2,520 ran ko. Ak kar ejelok jabdewõt men ear walok ilo ien in ekadu. Bõtab, ilo ad kõkkar “juõn ran kin juõn yiõ” ñan kanan eo an Daniel im bwini 2,520 yiõ ko jen 607 B.C.E., jej tõbar yiõ eo 1914 C.E.​—Bwinbwin 14:34; Ezekiel 4:6, NW.

18. Ta men ko Jesus ear kõmmani mwijin wõt an bõk kajur an Ailiñ eo, im ewi wãwen an jelet lal?

¹⁸ Jesus ear ijjino an iroij ilo lañ jen ien in ke? Uak jen Jeje ko kin ad ba men in enaj walok ilo katak eo tok iman. Emol, ñe ijjino an Jesus iroij, ejamin mõkaj in bõktok ainemõn ñan lal. Reveles̃õn 12:7-12 ej kwalok bwe mwijin wõt an bõk kajur kin Ailiñ eo, Jesus enaj jolallok Satan im demon enjel ro jen lañ. Men in enaj melelen wo ñan lal, ak e menin kakajur ñan konono bwe “jirik wõt ien” ibben Devil eo. Mõttan jidik, jenaj maroñ lañliñ jab kin wõt an naj jino jerbal Ailiñ in Anij ak bar kinke enaj bõktok jerammõn ko ñan lal im armij ro rekiblie. (Sam 72:7, 8) Ewi wãwen ad jelã bwe ebak ien an naj walok men in?

[Kõmel̦el̦e eo itulal̦]

ETALE JELÃLOKJEN EO AM

Ta in Ailiñ in Anij, im ej iroij jen ia?

Wõn eo ej iroij ilo Ailiñ eo, im wõn ro rej ro don?

Ewi wãwen an Jehovah kamol bwe Ailiñ eo an emol an bed?

Ñããt ear ijjino im naj jemlok “ien ko an ri ailiñ ko”?

[Bo̦o̦k eo ilo peij 94]

JET IAN IEN KO REAORÕK IM REJ EKKEJEL IBBEN AILIÑ IN ANIJ

• Jehovah ej kejelã kin karõk eo an ñan kwalok juõn “ine” eo enaj kokkure bõran Serpent eo, Satan Devil eo.​—Jenesis 3:15.

• Ilo 1943 B.C.E., Jehovah ear kalikar bwe “ine” in enaj itok jen bwijin Abraham.​—Jenesis 12:1-3, 7; 22:18.

• Bujen Kien eo im kar lelok ñan Israel ilo 1513 B.C.E. kar einwõt “juõn annañin men ko remõn renaj itok.”​—Exodus 24:6-8; Hebrews 10:1, NW.

• Ailiñ in Israel ilal ear ijjino ilo 1117 B.C.E., im ear wõnmanlok wõt tokelik ilo family eo an David.​—1 Samuel 11:15; 2 Samuel 7:8, 16.

• Jerusalem ear jeebeplok ilo 607 B.C.E., im “ien ko an dri ailiñ ko” ear ijjino.​—2 Kiñ Ro 25:8-10, 25, 26; Luk 21:24.

• Ilo 29 C.E., kar kabit Jesus einwõt King-Emwij Jitõñe im ear ijjino an jerbal ilal.​—Matu 3:16, 17; 4:17; 21:9-11.

• Ilo 33 C.E., Jesus ear wanliñlok ñan lañ, bwe en kõttar ianbijmaroñin Anij mae ien enaj jino an iroij.​—Jerbal 5:30, 31; Dri Hibru 10:12, 13.

• Kar kairoij Jesus ilo Ailiñ in lañ ilo 1914 C.E. ke ear jemlok “ien ko an dri ailiñ ko.”​—Reveles̃õn 11:15.

• Kar jolok Satan im demon ro an ñan lal im rar kalaplok wo ñan armij ro​—Reveles̃õn 12:9-12.

• Jesus ej lolorjake jerbal in kwalok news eo emõn kin Ailiñ eo an Anij.​—Matu 24:14; 28:19, 20.