Kwalok Yokwe Im Joij Ñan Ro Rej Aikwij

“Komin bõk wõt ibben don yokwe im joij.”​—ZECHARIAH 7:​9, NW.

1, 2. (a) Etke jej aikwij kwalok yokwe im joij? (b) Ta kajitõk ko jenaj etali?

NAN eo an Jehovah Anij ej kõketak kij ñan kaorõk “yokwe im joij.” (Micah 6:8, NW) Ej bareinwõt letok un ko unin ad aikwij kõmman eindein. Juõn unin, “juõn armij in yokwe im joij ej kõmõn emõn ñõn an.” (Jabõn Kennan 11:17) Emol! Kwalok yokwe im joij, ak tiljek in yokwe ej kaokmãnãn im kõmman bwe lokjen kõtan ko ibben ro jet en to air bed. Tokjen menin, enaj wõr ro jerad retiljek​—emol juõn ãjinkij eaorõk!​—Jabõn Kennan Ko 18:24.

² Bareinwõt, Jeje ko rej jiroñ kij: “Eo ej lore wãnik yokwe im joij, enaj lo mour.” (Jabõn Kennan 21:21) Aet, lore yokwe im joij enaj kõmman menin ad yokwe Anij im letok ñan kij ien emõn ñan lañliñ kin jerammõn ko ilo ien ko rej itok, ekoba mour indio. Ak ewi wãwen ad maroñ kwalok yokwe im joij? Ñan wõn eo jej aikwij erakelok? Im yokwe im joij eoktak ke jen joij eo an armij ak jen joij eo elap jetñakin? (Nihimaia 8:​8, 12) “Im rar konono ilo buk eo, ilo kien Anij, alikar: im rar kemeleleik e, inem rar melele kake. . . . Im armij otemjej rar etetal wõt bwe ren mõña im irak, im jilkinlok mõtõn ko, im bwe ren kõmõn lõñliñ elap, bwe rar melele nan ko emwij kwalok ñõn ir.”

Joij An Armij im Yokwe im Joij

3. Yokwe im joij ewi wãwen an einjuõn jen joij an armij?

³ Joij an armij im yokwe im joij reoktak ilo elõñ wãwen ko. Ñan wanjoñok, ro rej kwalok joij an armij ekkã air kõmman eindein ilo an ejelok juõn ej bõk kunan ie ilo juõn joñan eo emũlal, ak wõr kõtan, ibben kajjojo armij ro rej kwalok joij ñan ir. Bõtab, elañe jej kwalok yokwe im joij, jej ilo yokwe kobaiklok kij make ñan armij eo. Ilo Bible, kalikar yokwe im joij ikõtan armij ro emaroñ bedbed ion kõtan eo ededelok an bed. (Jenesis 20:13; 2 Samuel 3:8; 16:17) Ak remaroñ lo ir ilo kõtan ko rej walok jen kõmman ko mokta kin yokwe im joij. (Joshua 2:​1, 12-​14; 1 Samuel 15:6; 2 Samuel 10:​1, 2) Ñan wanjoñok kin einjuõn in, jen keidi ruo wanjoñok ko ilo Bible, juõn kin joij an armij im juõn kin yokwe im joij eo rej kwalok ikõtan armij ro.

4, 5. Ewi wãwen wanjoñok ko ruo ilo Bible rej kwaloki ijin rej kalikar oktak eo ikõtan joij an armij im yokwe im joij?

⁴ Juõn wanjoñok kin joij an armij ej jitõñlok ñan juõn jar in armij ro ear rup wa eo rar iuwe ie ekoba ri jilek Paul. Rar eotõk ilo ene in Malta. (Jerbal 27:⁠37–​28:1) Meñe Ri Malta ro ear ejelok juõn air eddo ñan ro ilo wa eo ak wõr juõn air kõtan ibbeir, ri ene eo rar karuwaineneik ruwamaejet ro, im kwalok ñan ir “joij eo an armij ekanuij einjuõn.” (Jerbal 28:​2, 7) Karuwainene eo air ear joij, ak ear jirullok im walok im kar kwalok ñan ruwamaejet ro. Inem menin, kar joij an armij.

⁵ Ilo keidi, lemnak kin karuwainene eo King David ear kwalok ñan Mephibosheth, ladik eo nejin leo jeran Jonathan. David ear jiroñlok Mephibosheth: “Kwo naj mõña ekõn ilo tebel eo aõ ien otemjej.” Ke ej kameleleik unin an kar kõmmane karõk in, David ear jiroñ e: “Kwon jab mijak; bwe emol I naj kwalok yokwe im joij ñõn yuk kin Jonathan jemõm.” (2 Samuel 9:​6, 7, 13, NW) Kijenmij eo an David ilo karuwainene eo an ejimwe kar jitõñlok ñane einwõt juõn menin kalikar yokwe im joij, ejjab baj joij eo wõt an armij, kinke ear juõn menin kamol tiljek eo an ñan juõn kõtan eo emwij ejaake. (1 Samuel 18:3; 20:15, 42) Einlok wõt rainin, ro ri karejaran Anij rej kwalok yokwe eo an armij ñan armij ro. Ak, rej kalikar kijenmij ilo yokwe im joij, ak tiljek in yokwe, ñan ro rej bõk kunair ilo juõn kõtan eo emõn ibben Anij.​—Matu 5:​45; Dri Galetia 6:​10.

6. Nan in Anij ej kalikar ta kadkad ko kin yokwe im joij armij ro rej kwalok ikõtan don?

⁶ Ñan kile melelen jet kadkad ko rej kobaiktok kin yokwe im joij, jenaj ilo tukaduin lemnak kin jilu bwebwenato ko ilo Bible me rej ejaake kadkad in. Jen men kein jenaj lo bwe yokwe im joij eo an armij ej erakelok ej (1) kalikar ikijen kõmman ko rejenolok, (2) erakelok ilo mõnõnõ, im (3) kwalok ilo alikar ñan ro rej bed ilo aikwij. Bareinwõt, bwebwenato kein rej kwalok wãwen ad maroñ jerbale yokwe im joij rainin.

Juõn Jemen Ej Kwalok Yokwe im Joij

7. Ta eo leo ri karejaran Abraham ear jiroñlok Bethuel im Laban, im ta menin konono eo ri karejar eo ear leliñtak?

⁷ Jenesis 24:28-​67 ej kwalok mõttan bwebwenato eo kin leo ri karejaran Abraham, kar kwalok kake ilo katak eo lok iman. Elikin an ion Rebekah, ear kiri ñan mweo imõn jemen, Bethuel. (Eon 28-​32) Ijo ri karejar eo ear kememej wãwen an bukõt juõn belen leo nejin Abraham. (Eon 33-​47) E ar kwalok bwe ear lemnak kin tõbrak eo ear tõbare tok ñan joñan eo bwe ej einwõt juõn kakõlle jen Jehovah, “Eo e ar tel iõ ilo ial e jime, bwe in bukõt lio nejin jein im jãtin karo eo aõ ñõn leo nejin.” (Eon  48) Ejelok bere ri karejar eo ear kejatdikdik bwe eñjake eo ilo buruen ñan bar kememej men eo ear walok enaj kar menin kamol ñan Bethuel im leo nejin Laban bwe Jehovah ear kajerammõn jerbal in. Eliktata, ri karejar eo ear ba: “Im kiõ elañe kom naj kõmman yokwe im joij im mol ñan aõ karo, komin kennanik iõ: im elañe jab, kennanik iõ; bwe in jeorlok ñõn anbijmaroñ ak ñõn anmiñ.”​—Eon 49, NW.

8. Ta kar emmakit eo an Bethuel ñan wãwen ko rar jelet Rebekah?

⁸ Jehovah ear dedelok an kwalok yokwe im joij ñan Abraham. (Jenesis 24:12, 14, 27) Bethuel en kar mõnõnõ ke in kõmman ejja wãwen in wõt ilo an kõtlok Rebekah bwe en ilok ibben leo ri karejaran Abraham? Yokwe im joij eo armij ej kwalok en maroñ ke kobalok ñan yokwe im joij eo Anij ej kwalok bwe en maroñ tõbrak kitien karõk eo?” Ak ial aetoktok eo an ri karejar eo en kar likjap ke? Ear aikwij lukkun menin kainemõn ñan leo ri karejaran Abraham in roñ an Laban im Bethuel ba: “Men in ej waloktok jen Jeova.” (Eon 50) Rar kile pein Jehovah ilo wãwen ko im mõkaj im bõk bebe eo an. Jeltokin, Bethuel ear kwalok yokwe im joij eo an ilo an kobaiktok: “Lo, Rebeka ej iman mejõm, kwon ãñin e im etal, bwe en belen leo nejin karo eo am, einwõt Jeova e ar ba.” (Eon 51) Rebekah ear mõnõnõ im ilok ibben leo ri karejaran Abraham, im ejjabto ear oktak im jitenburu eo belen Isaac.​—Eon 49, 52-​58, 67.

Yokwe im Joij Juõn Nejin Maan ear Kwalok

9, 10. (a) Ta eo Jacob ear kajitõk ibben leo nejin Joseph bwe en kõmmane ñane? (b) Ewi wãwen an Joseph kar kwalok yokwe im joij ñan jemen?

⁹ Jacob leo jibũn Abraham ear bareinwõt bõk yokwe im joij. Einwõt an walok ilo Jenesis chapter 47, Jacob ear jokwe ilo Egypt ilo ien eo, im “ran in mij ko an rar ebaktok.” (Eon 27-​29, NW) E ar wõr men eo ear lemnak kake kinke ear bojak in mij ilikin ene eo Anij ear kallimur kake ñan Abraham. (Jenesis 15:18; 35:10, 12; 49:29-​32) Bõtab, Jacob ear jab kõnan bwe ren kalbwini ilo Egypt, inem ear kõmman karõk bwe enbwin eo an ñe emij ren bõklok ñan enen Canaan. Wõn eo enaj kar tellokin lale bwe ren lor kõnan eo an im jab kõnan eo an leo nejin, Joseph?

¹⁰ Bwebwenato eo ej ba: “Im [Jacob] e ar kirtok Josep, nejin, im ba ñõn e: ‘Elañe kiõ I ar lo joij iman mejõm, . . . kwoj aikwij jerbale yokwe im joij im liki ñan iõ. (Kwon jab kalbwin iõ i Egypt.) Im Ij aikwij babu ibben ro jema, im kwoj aikwij bõklok iõ jen Egypt, im kalbwin iõ ilo wuliej eo air.’ ” (Jenesis 47:29, 30, NW) Joseph ear kallimur ñan an jerbale kajitõk in, im ejjabto tokelik Jacob ear mij. Joseph im lõmaro jet nejin Jacob rar bõklok enbwin eo an “ñõn enen Kenean, im rar kalibwin e ilo roñ in bukwon Makpila, eo Ebream e ar wiaik kab bukwon eo.” (Jenesis 50:​5-8, 12-​14) Kin menin Joseph ear jerbale yokwe im joij ñan jemen.

Yokwe im Joij Jen Juõn Nejin Kõrã

11, 12. (a) Ewi wãwen an Rut kar kwalok yokwe im joij ñan Naomi? (b) Ilo wãwen et eo “men eo eliktata” in yokwe im joij eo an Rut ear emõnlok jen “men eo mokta”?

¹¹ Book in Rut ej kwalok wãwen eo Naomi eo ejako belen ear bõk yokwe im joij jen kõrã in Moab eo nejin Ruth nejin leo kar ibben na ibben bar juõn kõrã, im Ruth bar juõn eo ejako belen. Ke Naomi ear bebe in jeblaklok ñan Bethlehem ilo Judah, Ruth ear kwalok yokwe im joij im bebe eo an, im ba: “Ijo kwoj ilok ielok, I naj ilok ielok; im ijo kwoj jiboñõn, I naj jiboñõn; dri ailiñ ro am, re naj aõ dri ailiñ, im am Anij aõ Anij.” (Rut 1:​16) Tokelik Ruth ear kalikar yokwe im joij eo an ke ear kwalok kõnan eo an ñan mareiki Boaz leo eritto nukin Naomi.a (Duteronomi 25:​5, 6; Rut 3:​6-9) E ar jiroñ Ruth: “Kwar kwalok yokwe im joij elaplok ilo jemlokõn jen ilo jinoin, bwe kwar jab lor likao rõn, dri jeramel ak dri mweie.”​—Rut 3:​10.

¹² “Men eo jinoin” ilo yokwe im joij eo an Ruth ear jitõñlok ñan ien ke ear ilok jen armij ro an im bed wõt ibben Naomi. (Rut 1:​14; 2:​11) Meñe wãwen in ear jab emõn in wõt “men eo eliktata” in yokwe im joij​—Kin kõnan eo an Ruth ñan mareiki Boaz. Kiõ Ruth ear maroñ keotak juõn ri jolet ñan Naomi, ke ear ellãlok jen joñan an ritto ñan an keotak nejin ajiri. Mare eo ear kõmman, im ke tokelik Ruth ear keotak, kõrã in Bethlehem ro rar lamõj: “Juõn nejin man e ar lotak ñõn Naomi.” (Rut 4:​14, 17) Emol Ruth kar “juõn kõra emõn,” eo Jehovah ear nawõnãn kin jerammõn eo emõn ñan an erom juõn bwijin Jesus Christ.​—Rut 2:​12; 3:​11; 4:​18-​22; Matu 1:​1, 5, 6.

Kalikar Ikijen Kõmman ko

13. Ewi wãwen an Bethuel, Joseph, im Rut kar jerbale yokwe im joij eo air?

¹³ Kwar lo ke wãwen an kar Bethuel, Joseph, im Ruth kalikar yokwe im joij eo air? Rar kõmman eindein ejjab kin wõt nan ak kin kõmman ko ralikar. Bethuel ear jab baj ba wõt, “Eñin Rebekah” ak ear lukkun “jilkinlok Rebekah.” (Jenesis 24:51, 59) Joseph ear jab baj ba wõt, “I naj kõmõn einwõt kwar ba” ak e im lõmaro jein im jatin rar kõmman ñan Jacob “einwõt e ar jiroñ ir.” (Jenesis 47:30; 50:12, 13) Ruth ear jab baj ba wõt, “ijo kwoj ilok ielok, I naj ilok ielok” ak ear ilok jen armij ro an im ilok ibben Naomi, inem “ein drein airro etal inem rar itok ñõn Betleem.” (Rut 1:​16, 19) Ilo Judah, Ruth ear bar “kõmõn ekar ñõn men otemjej jinen e ar jiroñ e.” (Rut 3:6) Aet, yokwe im joij eo an Ruth, einwõt eo an ro jet, ear kalikare ikijen kõmman ko.

14. (a) Ro ri karejaran Anij rainin ewi wãwen air kwalok yokwe im joij ikijen kõmman ko air? (b) Ta kõmman ko kin yokwe im joij ewõr am jelã kaki ibwiljin Christian ro ilo melan eo am?

¹⁴ Ej menin kõmãnãn buru in lo wãwen an ro ri karejaran Anij rainin etal wõt im kalikar kõmman ko kin yokwe im joij. Ñan wanjoñok, lemnak kin ro rej lelok ilo kijenmij eñjake in jurake eo ñan ri tõmak ro mõttair rej mõjno ilo enbwin, eñtan ak buromõj. (Jabõn Kennan Ko 12:25) Ak lemnak kin elõñ Ri Kennan ro an Jehovah ro rej tiljek ilo air ektake ro reritto ñan Kingdom Hall ko ñan air bed ilo kwelok ko an congregation ilo week otemjej. Anna, 82 yiõ dettan ear nañinmij in kũrro, ear kwalok ejja eñjake eo an elõñ ro jet ke ej ba: “Air ektakelok iõ ñan aolep kwelok ko ej juõn jerammõn jen Jehovah. Ij kamolol e jen tumũlalin buruõ kin an letok ñan iõ kain jimjãn jimjatin maan im kõrã rein rej kwalok yokwe.” Kwoj bõk ke kunam ilo kain kõmman rot in ilo congregation eo am? (1 Jon 3:​17, 18) Elañe kwoj, kwon liki bwe yokwe im joij eo am elap kamolol kake.

Jerbal ilo Mõnõnõ

15. Ta kadkadin yokwe im joij eo elaplok kwalok kake ikijen bwebwenato ko jilu ilo Bible emwij ad etali?

¹⁵ Bwebwenato ko ilo Bible im emwij ad lemnak kaki rej bareinwõt kwalok bwe yokwe im joij ej erakelok jen kõnan im mõnõnõ, ilo ejelok ijjibed. Bethuel ilo mõnõnõ ear burukuk ibben ri karejar eo an Abraham, im kar bar eindein Rebekah. (Jenesis 24:51, 58) Joseph ear kwalok yokwe im joij eo an im kar ejelok juõn ear kõmmakit e bwe en kwaloke. (Jenesis 50:​4, 5) Ruth ear “bin buruen in ilok ibenlok [Naomi].” (Rut 1:​18) Ke Naomi ear kwalok an lemnak bwe Ruth en kebak Boaz, yokwe im joij ear kamakit Ri Moab eo ñan an keañ: “I naj kõmõn men otemjej kwoj jiroñ iõ.”​—Rut 3:​1-5.

16, 17. Ta eo ej kõmman bwe yokwe im joij eo an Bethuel, Joseph, im Rut en eo elaptata melelen, im ta eo ear kamakit ir ñan air kalikar kadkad in?

¹⁶ Yokwe im joij eo Bethuel, Joseph, im Ruth rar kwalok elaptata tokjen kinke Abraham, Jacob, im Naomi rar jab bõk jabdewõt kareelel ko rar jibed ir kaki ñan air kõmmani. Eokwe ke, Bethuel ear jab bed iumin kien ñan an ilok ibben lio nejin. E maroñ kar bidodo an jiroñlok leo ri karejaran Abraham: ‘Jab, I jab kõnan jilkinlok lio nejiõ eniknik ñan ijo ettolok.’ (Jenesis 24:18-​20) Eindein, Joseph ear anemkwoj ñan an beek elañe ear kõnan jerbale kajitõk eo an jemen ak jab, bwe Jacob enaj kar mij im jab maroñ kibel e ñan an kejbãrok nan eo an. Naomi make ear kalikar bwe Rut ear anemkwoj ñan an bed wõt ilo Moab. (Rut 1:8) Rut ear bareinwõt anemkwoj ñan mareiki juõn ian “likao ro redik” im jab leo eritto Boaz.

¹⁷ Bethuel, Joseph, im Rut rar kwalok yokwe im joij ilo mõnõnõ; rar emmakit ñan air kõmman eindein jen burueir. Rar eñjake eddo eo ñan juõn mour erreo ñan kalikar kadkad in ñan ro ear wõr juõn air kõtan ibbeir, einwõt King David tokelik ear eñjake eddo eo ñan kalikare ñan Mephibosheth.

18. (a) Kin ta lemnak eo Christian elder ro rej “s̃eperd bwij eo”? (b) Ewi wãwen an juõn elder kar kwalok eñjake ko an kin jibañ ri tõmak ro mõttan?

¹⁸ Yokwe im joij ej juõn kakõlle wõt in armij ro an Anij, ekoba emaan ro rej shepherd e bwij eo an Anij. (Sam 110:3; 1 Dri Tessalonika 5:​12) Elder rein, ak overseer ro, rej eñjake juõn eddo in mour ñan liki eo emwij likit ioir ikijen ijjitõñ eo air. (Jerbal 20:28) Meñe eindein, jerbal in shepherd eo air im kõmman ko jet kin yokwe im joij ilo etan congregation eo rej kõmmani, “jab ilo makoko, ak kin kõnan.” (1 Piter 5:2) Elder ro rej shepherd e bwij eo kinke ebed men kein jimor ibbeir juõn eddo im juõn kõnan ñan kõmman eindein. Rej kalikar yokwe im joij ñan sheep ro an Christ kinke rej aikwij im kõnan kõmmane menin. (Jon 21:15-​17) “Ij lukkun lo mõnõnõ ilo ien lolok ko aõ ilo moko imõn ro jeiõ im jatiõ ak kir ir ilo telephone im kwalok ñan ir bwe I ar lemnak kin ir,” juõn Christian elder ej ba. “Jibañ brother ro ej juõn unjen lañliñ elap im juburu ñan ña!” Elder ro rej kea ijoko jabdewõt rej errã kin aolepen burueir.

Kwalok Yokwe im Joij ñan Ro Rej Aikwij

19. Ta mol eo kin yokwe im joij ej walok ilo bwebwenato ko ilo Bible im kar konono kaki ilo katak in?

¹⁹ Bwebwenato ko ilo Bible emwij ad konono kaki rej bareinwõt kalikar mol eo bwe yokwe im joij ej aikwij kwalok ñan ro ewõr juõn air aikwij bwe ir make rejjab maroñ kõtõbrake. Ñan an wõnmanlok wõt lain in family eo an, Abraham ear aikwij burukuk eo an Bethuel. Ñan air bõklok enbwin eo an ñan Canaan, Jacob ear aikwij jibañ eo an Joseph. Im ñan kwalok juõn ri jolet, Naomi ear aikwij jibañ eo an Rut. Abraham, Jacob, ak Naomi rar jab maroñ kõtõbrak aikwij ko elañe ear ejelok jibañ. Einlok wõt rainin, yokwe im joij ej aikwij laptata kwalok ñan ro rej aikwij. (Jabõn Kennan Ko 19:17) Jej aikwij kajeoñe ri patriarch eo Job, eo ear lale im “lomoren dri jeramel eo e ar kir, bareinwõt eo e joko jemen, eo ejelok dri jibõñ e” bareinwõt ñan “eo e nañin joko.” Job bareinwõt ear ‘kõmõn bwe buruen lio e joko belen en kãki kin lõñliñ’ im erom ‘mejen ñõn eo dri bilo im neen ñõn eo dri kirro.’​—Job 29:12-​15.

20, 21. Wõn ro rej aikwiji ad kalikar yokwe im joij eo ad, im ta eo kajjojo iad ej aikwij beek ñan an kõmmane?

²⁰ Ilo mol, ewõr ‘ro rej bed ilo eñtan rej lamõj ñan jibañ’ ilo congregation ko otemjej an Christian. Menin emaroñ walok kin wãwen mol ko einwõt make ian, ebwer, eñjake an ejelok tokjen, lõkatip ibben ro jet, elap nañinmij, ak mij an juõn jitenburu. Jekdon ta menin eñtan ko, jitenburu rein otemjej ewõr air aikwij ko me remaroñ im rej aikwij tõbrak ikijen kõnan eo ad im kõmman ko ewõr kijenmij ie kin yokwe im joij.​—1 Dri Tessalonika 5:​14.

²¹ Inem, eindein, jen etal wõt im kajeoñe Jehovah Anij, eo “elap an yokwe im joij.” (Exodus 34:​6, NW; Dri Epesõs 5:1) Jemaroñ kõmman eindein ilo ad kõnan kõmman emmakit, elaptata ilo etan ro rej aikwij. Im emol jenaj wijtake Jehovah im lo elap lañliñ ke jej “bõk ibben don yokwe im joij.”​—Zechariah 7:​9, NW.

[Kamelele ko itulal]

Ewi Wãwen Am Naj Kar Uak?

• Ewi wãwen an yokwe im joij einjuõn jen joij an armij?

• Ilo wãwen et ko yokwe im joij Bethuel, Joseph, im Rut rar jerbale?

• Kin lemnak et eo jej aikwij kwalok yokwe im joij?

• Wõn ro rej aikwiji ad kwalok yokwe im joij?

[Pija eo ilo peij 26]

Ewi wãwen an Bethuel kar kwalok yokwe im joij?

[Pija eo ilo peij 29]

Tiljek in yokwe eo an Rut kar juõn jerammõn ñan Naomi

[Pija ko ilo peij 30]

Kõnan eo an armij in erakelok yokwe im joij, ej walok ikijen kõmman eo ej walok, im ej alikar ñan ro rej aikwij