Ewi Wãween bwe In Maroñ Jino Riiti Baibõl̦?

Ta ko kwõmaroñ kõm̦m̦ani me renaaj jipañ eok bwe kwõn itoklimo in riiti Baibõl̦ im bõk tokjãn jãn am̦ riiti? Ewõr 5 men ko rar jipañ elõñ armej.

Kããlõt juon jikin em̦m̦an ñan am̦ riit ie. Kajjioñ riit ilo jikin ko ejjel̦o̦k ekkeroro ie. Em̦m̦an ñe ej ejjel̦o̦k kein kõm̦ad eok bwe en em̦m̦an am̦ riit im l̦õmn̦ak kõn men ko kwõj riiti. Emaroñ bar l̦ap an jipañ ñe ej em̦m̦an joñan an meram im ñe elladikdik ijo kwõj riit ie.

En jim̦we wãween am̦ l̦õmn̦ak. Kõnke Baibõl̦ ej itok jãn Jemãd ilañ, kwõnaaj lukkuun bõk tokjãn ilo am̦ riiti el̦aññe kwõlukkuun kõn̦aan katak jãne, ãinwõt an juon ajri lukkuun kõn̦aan katak jãn jemãn im jinen. El̦aññe kwõjjab itoklimo in riiti Baibõl̦ kõnke kwõj l̦õmn̦ak bwe epen ak ejãlimo, kajjioñ kõjekdo̦o̦n l̦õmn̦ak kein am̦ im kõtl̦o̦k an Anij katakin eok.​—Sam 25:4.

Jar m̦okta jãn am̦ riit. Jej aikuj jipañ ñan mel̦el̦e kõn men ko jej riiti ilo Baibõl̦ kõnke l̦õmn̦ak ko an Anij repãd ie. Anij ear kallim̦ur bwe enaaj lel̦o̦k “Jetõb Kwõjarjar ñan ro otemjej rej kajjitõk Ippãn.” (Luk 11:13) Jetõb kwõjarjar ak kajoor eo an Anij emaroñ jipañ eok ñan mel̦el̦e l̦õmn̦ak ko an Anij. Ñe kwõnaaj wõnm̦aanl̦o̦k wõt im riiti Baibõl̦, kajoor eo an Anij enaaj kõpel̦l̦o̦k l̦õmn̦ak eo am̦ bwe kwõn mel̦el̦e kõn men ko kwõj riiti, ekoba mel̦el̦e ko rem̦wilal̦.​—1 Korint 2:10, UBS.

Riit im kajjioñ mel̦el̦e. Jab baj riit wõt im kajjioñ kõttõpar bwe en lõñ jebta ko kwõj riiti. Em̦m̦an ñe kwõj bõk iien im l̦õmn̦ak kõn men ko kwõj riiti. Kajjitõk ippam̦ make kajjitõk kein: ‘Ta ko rem̦m̦an ippa kõn armej in ij riit kake? Ewi wãween aõ maroñ l̦oore men in ilo mour e aõ?’

Kõm̦m̦an am̦ mejãnkajjik. Bwe kwõn maroñ bõk tokjãn jãn am̦ riit Baibõl̦, kõm̦m̦an am̦ mejãnkajjik ñan katak juon men enaaj jipañ eok ilo mour n̦e am̦. Ñan waanjoñak, kwõmaroñ kõm̦m̦an am̦ mejãnkajjik ñan kal̦apl̦o̦k am̦ jel̦ã kõn Anij, jel̦ã ta ko kwõn kõm̦m̦ani bwe kwõn juon armej em̦m̦an, ak bwe en em̦m̦anl̦o̦k am̦ kõm̦m̦an ñan eo pãleem̦. Innem, kwõmaroñ riiti im l̦õmn̦ak kõn eoon ko renaaj jipañ eok ñan tõpar mejãnkajjik kein am̦.a​—Lale kõmel̦el̦e eo itulal̦.

Wãween kein 5 renaaj jipañ eok bwe kwõn jino itoklimo in riiti Baibõl̦. Ak ta ko jet kwõmaroñ kõm̦m̦ani bwe en l̦apl̦o̦k wõt am̦ itoklimo in riiti Baibõl̦? Katak in tok juon enaaj kwal̦o̦k jet men ko kwõmaroñ kõm̦m̦ani.