Buñten Ne ko Jiljilimjuõn ñõn Jibõñ Yuk Bõk Tokjen jen Am Riiti Baibel Eo

“Baibel eo ejjab baj buk eo wõt im elap an armij ro wiaiki ien otemjej, ak ej juõn buk im elaplok an armij ro wiaiki kajjojo yiõ jen buk ko jet.”​—TIME MAGAZINE.

“Jet ien ij riiti Baibel eo, bõtab ejjab kaitoklimoik iõ.”​—KEITH, JUÕN DRI KAJÕÑJÕÑ EBUÑBUÑ JEN ENGLAND.

MEÑE elõñ armij ro eor air Baibel, ak rejjab bõk elap tokjen ko jen air riiti. Bõtab, eor jet armij rej kaurõki men ko rej riiti jen Baibel eo. Ñõn wanjoñok, juõn kõra etan Nancy ear ba: “Jen ke iar jino riiti Baibel eo im kalomõnlokjen kake aolep jiboñ, ilukkun pojõk in kamarmire jabrewõt abañ inaj iione ilo ran eo. Ian aolep men ko iar kajeoñ kõmõni iomin 35 yiõ ko ñõn jibõñ iõ ilo ien aõ buromõj, iar bõk elaplok jibõñ jen aõ kar riiti Baibel eo im kalomõnlokjen kake.”

Meñe kwojañin kar riiti Baibel eo, ejjab ke kaitoklimoik yuk kin wãwen an ro jet kar bõk jibõñ jen air riiti? Elañe kwoj juõn eo ej riit Baibel, kwokõnan ke bõk elaplok tokjen ko jen am riiti? Elañe kwokõnan, kwon kajeoñ lori buñten ne kein jiljilimjuõn ilo katak in.

KEIN KAJUÕN​—En Jime Unin am Riiti Baibel Eo

◼ Bwelen kwoj riiti Baibel eo kinke ej juõn buk emõn ak kinke ej menin aikwij, ak bwelen kwoj riit ñõn am bõk jibõñ ilo am mour ilo lõl in enana. Bõtab, wãwen eo elaptata kwomaroñ bõk tokjen, ej elañe unin am riit ej ñõn am jela mol eo kin Anij. Bareinwõt, kwonaj jerammõn elañe kwokõnan jela ewi wãwen ennan ko ilo Baibel eo remaroñ jelet mour eo am.

Jeje ko rej kwalok kin aurõkin ar aikwij riit kin jet un ko rejime ilo air keiri Baibel eo ñõn juõn kapjur ak kilaj: “Bwe elañe jabrewõt armij ej dri roñjake nan, im jab dri kõmõne, ej einwõt armij eo ej lo mejen ilo kapjur: Bwe ej mõke lale e, im ej ilok im emõkõj an meloklok ie ein. A eo ej ber im liñõre kien in anemkwoj eo e wãppen, im jab dri roñjake eo ej meloklok, a e dri kõmõn ej jerbale, armij eo e naj mõnõnõ ilo an kõmõn.”​—Jemes 1:​23-​25.

Armij eo ilo wanjoñok in ej kalimjeke mejen ilo kilaj eo, bõtab ear likjõp in jolok men ko ej loi iben. Bwelen emõkõj an kar kalimjeke e mõke, ak bwelen ear jab kõnan kõmõn oktõk ko. Ilo wãwen in lok wõt, jeban bõk tokjen elañe jejjab bõk ien ñõn lukkun riiti Baibel eo, ak elañe jej likjõp in jerbali men ko jej riiti. Ijo turãjet, jemaroñ lo elap lõñliñ elañe jej riiti Baibel eo im kõnan jerbale men ko jej riiti ak kõtlok bwe ren tel mour ko ar.

KEIN KARUO​—Kãlet juõn ukok in Baibel emõn

◼ Bwelen elõñlok jen juõn ukok in Baibel eo ilo kajin eo am. Meñe kwomaroñ bõk tokjen ko jen jabrewõt ukok in Baibel eo, bõtab eor jet ukok ko im rej kajerbale nan in etto ko im ebin melele kaki. (Jerbal 4:​13) Jet ukok in Baibel ko rej kajeoñ in ukot ennan eo ilo Baibel ilo air lor mõnit ko an armij. Ñõn wanjoñok, einwõt am kar riiti ilo katak ko ilo jinoin buk in, jet ukok ko rar jolok ãt eo etan Anij, Jeova, im kajerbale title ko einwõt “Anij” ak “Iroij.” Elañe kwoj kãlet juõn ukok in Baibel, kwon kabukot juõn ukok eo ejime im ealikar im emaroñ kaitoklimoik yuk ñõn am wõnmanlok wõt im riiti wõt Baibel eo.

Million armij ro im rej riiti Baibel eo rej lo bwe ukok in Baibel eo etan Ukok in Lõl eo Ekãl kin Jeje ko Rekwojarjar, elap an jejit im ebiruru melele kake, im ej kaitoklimoik ir ñõn riiti Baibel eo.a Jen etale wanjoñok eo an juõn lõlap ilo ailiñ in Bulgaria. Ear ber ilo juõn kwelok an Dri Kennan ro an Jeova im kar lelok an juõn ukok in Baibel in. Tokelik ear ba, “Iar riiti Baibel eo iomin elõñ yiõ ko, ak ijañin kar riiti juõn ukok in Baibel im elap an biruru aõ melele kake im elap an jelet iõ.”

KEIN KAJILU​—Jar

◼ Kwomaroñ kalaplok melele eo am kin Baibel eo ilo am kajitõk jibõñ jen Jeova, einwõt kar dri jeje sam ke ear ba: “Kwon kebellok meja, bwe in lo men in bwilõñ ko ilo kiõm.” (Sam 119:18) Kwon jar ñõn Anij aolep ien kwoj riiti Baibel eo, im kajitõk iben bwe en jibõñ yuk ñõn melele kin Nan eo an. Kwomaroñ bareinwõt kwalok am kamolol kin Baibel eo, kinke elañe en kar jab Baibel eo, jeban kar jela kajen Anij.​—Sam 119:62.

Anij ej ke roñjake jar ko an ro rej kajitõk jibõñ? Jen lale men eo ear walok ñõn ruo ledrik rej jimjãn jimjãtin ilo Uruguay, juõn ailiñ ilo South America. Rar jab melele kin eon eo ilo Daniel 2:​44 im rar kajitõk bwe Anij en jilkintok juõn bwe en jibõñ irro melele kin eon in. Ilo ien eo Baibel eo airro ej bellok wõt, ruo Dri Kennan ro an Jeova rar itok ñõn kejem in mweo, im rar riiti eon in me ledrik rein rar jar kake, im kemeleleik irro bwe Ailiñ eo an Anij enaj bõk jikin aolep kien ko an armij.b Ledrik rein ruo rar kiõ kile bwe Anij ear uake jar eo airro.

KEIN KEMEN​—Riit Baibel kajjojo ran

◼ Elõñ armij rej riiti Nan in Anij ilo ien eo wõt im ej walok jorran. Ñõn wanjoñok, juõn dri wiakake buk ej kwalok bwe “elukkun kar laplok an armij ro wia air Baibel” elikin wõt an kar dri nana ro kokkure Amerika ilo kar Jeptõmba 11, 2001. Bõtab, Baibel eo ej rejañ kij bwe jen riiti kajjojo ran, ilo an ba: “Buk in, buk in kien, en jab joko jen loñõm, a kwon kalomõnlokjen kin e, ran im boñ, bwe kwon lali im kõmõn men ko otemjej emwij jeji iloan: Inem kwo naj kõmõn bwe en emõn ial eo am, im kwo naj jerammõn.”​—Joshua 1:8.

Aurõkin ar aikwij riiti Baibel eo ej alikar ilo wanjoñok eo kin juõn eman eo ear metõk ubõn, im ej bebe bwe en mõña wõt ekan ko reuõne. Enaj ke bõk jibõñ elañe ej lore wãwen in ilo ien eo wõt im ej metõktok ubõn? Eban. Ej aikwij mõña ekan ko reuõne aolep ien bwe en maroñ emõnlok an mour. Eindreinlok wõt, elañe kwonaj riiti Baibel eo kajjojo ran, enaj “kõmõn bwe en emõn ial eo am.”

KEIN KALAILIM​—Kajerbal elõñ wãwen ko ilo am riit

◼ Ej juõn men emõn elañe kwoj riiti Baibel eo jen Jenesis ñõn Reveles̃õn, bõtab eor bar jet wãwen ko im emaroñ laplok air jibõñ yuk. Eñin ej jet wãwen ko kwomaroñ kõmõni.

Riit kin juõn armij ej walok ilo Baibel eo. Kwon riiti aolep japter ko ak buk ko im rej kwalok kin juõn dri korijeran Anij ilo Baibel eo, einwõt an walok ilõl:

• Josep: Jenesis 37-​50.

• Rut: Rut 1-3.

• Jisõs: Matu 1-28; Mark 1:1–​16; Luk 1:1–​24; Jon 1:1–​21.c

Etale juõn katak. Riiti eon ko im rej ekkejellok ñõn katak eo. Ñõn wanjoñok, kwon kõmõn etale ko kin katak eo kin jar. Inem kwon lale wanjoñok ko kin jar ilo Baibel eo im bareinwõt nan in kakabilek ko jen Baibel kin men in.d

Riit ilo juõn ainiken elaj. Kwomaroñ bõk elap tokjen elañe kwoj riit ilo juõn ainiken elaj. (Reveles̃õn 1:3) Kwomaroñ kõmõne men in iben baamle eo am ilo am lelok bwe kajjojo ro uan baamle eo ren bõk kwonair ñõn riiti pãrokõrããp ko ak nan ko an armij ro ilo Baibel eo. Jet rej mõnõnõ in roñjake cd ko me emwij kanne ainiken an armij ro riit jen Baibel eo. Juõn jiroñ ear ba: “Ekar bin aõ jinoe riiti Baibel eo, kin men in iar jinoe aõ roñjake cd ko emwij kanne ainiken an armij ro riit jen Baibel eo. Kiõ elaplok an Baibel eo emõn iba jen jabrewõt buk.”

KEIN KAJILJINO​—Kalomõnlokjen

◼ Kin an lap boub im menin kamad ko ilo lõl in ranin, ej kõmõn bwe en ejelok ien ar kalomõnlokjen. Einwõt ar aikwij mei mõña ko bwe jen maroñ ejmour, jej aikwij kalomõnlokjen kin men ko jej riiti jen Baibel bwe jen maroñ bõk tokjen ko. Jej kõmõne men in ilo ar etale men ko jej riiti im bareinwõt ilo ar kajitõkin kij mõke: ‘Ta eo ej kab mwij aõ katak kin Jeova Anij? Ewi wãwen an men in jelet iõ? Ewi wãwen imaroñ kajerbale katak kein ñõn jibõñ ro jet?’

Ilo ar kalomõnlokjen jej kõtlok bwe ennan ko ilo Baibel eo ren tõbar buruer, im men in ej bareinwõt kalaplok lõñliñ eo ar ilo ar riiti Nan in Anij. Sam 119:97 ej ba: “O e nañin lap aõ yokwe kiõm! I kalomõnlokjen kake iomin aolepen ran.” Dri jeje sam in ear lap an kaurõke nan eo an Anij ilo an kalomõnlokjen kake aolep ran. Ilo an kar kõmõne men in, ear maroñ kadrek juõn yokwe emulõl kin men ko ej katak kaki.

KEIN KAJILJILIMJUÕN​—Bõk jibõñ ñõn melele kin Baibel eo

◼ Jeova ejjab kõtõmene bwe jen mõke lukkun melele kin Nan eo an. Baibel eo ej mõke ba bwe eor katak ko ie im ‘rebin melele kaki.’ (2 Piter 3:​16) Buk in Jerbal ej kwalok kin juõn dri utiej in Itiopia im ear jab melele kin men ko ear riiti ilo Baibel eo. Anij ear jilkinlok juõn ian dri korijer ro An bwe en jibõñ e, im kin men in dri Itiopia in ear maroñ “lõñliñ im ilok ilo ial eo an.”​—Jerbal 8:​26-​39.

Kwomaroñ bareinwõt bõk elap tokjen ko jen am riiti Baibel eo ilo am bõk jibõñ ñõn melele kin men ko kwoj riiti. Kwomaroñ kebake Dri Kennan ro an Jeova ilo bukwon eo am, ak jejelok ñõn jikin kein im rej walok ilo peij 4 ilo magazine in ñõn am katak Baibel eo ilo ejelok wõnan.

[Kamelele ko itulal]