Ri Kennan ro an Jehovah—Ri Evanjel ro Remol
1 Jesus Christ ear likit eddo eo ñõn kwalok nan ion aolep ri kalor ro an, im jiroñ ir elaptata ñõn kwalok kin news eo emõn kin Ailiñ eo. (Mat. 24:14; Jerbal 10:42) Ri kalor ro an jinointata rar kõmmõn joñok eo kin men in ke rar konono kin Ailiñ eo ilo ejelok bõjrak—jab ilo jikin kabuñ ko wõt ak ilo jabdewõt jikin ko rar iion armij ro ie ilobwilij im ilo air etal jen em ñõn em. (Jerbal 5:42; 20:20) Einwõt Ri Kennan ro an Jehovah rainin, jaar kamole kij make einwõt Christian ri kwalok ro remol, im kwalok kin ennan in Ailiñ eo ilo 232 ailiñ ko im baptaisi elõñlok jen juõn million ri kalor ro rekãl ilo yiõ ko wõt jilu rej kab motlok! Etke jerbal in kwalok nan eo ad ear lap an wor tõbrak?
2 News eo Emõn Ej Kairujruj Kij: Ri evanjel ro rej ro rej kwalok nan, ak ro rej bõkto-bõktak ennan, kin news eo emõn. Ke eindein, ewor jerammõn eo ekairujruj ibbed ñõn keañ kin Ailiñ eo an Jehovah—news emõn eo wõt emol me jemaroñ lelok ñõn ro rej liejlol. Jej ellowetak kin jelalokjen eo jaar bõke kin lõñ ko rekãl me enaj iroij ilo wãnik ion juõn lõl ekãl ejaak in armij ro retiljek ilo Paradise eo ej itok. (2 Pet. 3:13, 17) Kij jej ro wõt im jaar bõk kejatdikdik in, im jej kijoror in jaketo-jaketake ibben ro jet.
3 Yokwe eo Emol Ej Kamakit Kij: Kwalok nan ej juõn jerbal in lomor. (Rom. 1:16) Eñin unin jej lo elap lõñliñ ilo ad kajededlok ennan in Ailiñ eo. Einwõt ri evanjel ro remol, jej yokwe armij, im men in ej kamakit kij ñõn jaketo-jaketak news eo emõn ibbeir—family ko ad, ro ri turid, ro mõttad, im ñõn ro jet joñan wõt jemaroñ. Ad kõmmõn jerbal in kin aolepen burued ej juõn ian wãwen ko remõntata jemaroñ kwalok yokwe ad eo emol kin ro jet.—1 Tes. 2:8.
4 Jitõbõn Anij Ej Jurake Kij: Nan in Anij ej jiroñ kij bwe ñe jej kõmmõn jerbal eo ad kin kallip im wutdikdiki inen Ailiñ eo, ej Jehovah eo ej “kadreklok.” Eñin men eo jej lo an walok ilo dolul eo ad rainin. (1 Kor. 3:5-7) Ej jitõb eo an Anij eo ej jurake kij ilo jerbal in kwalok nan eo ad im ej letok ñõn kij tõbrak ko relap.—Joel 2:28, 29.
5 Ilo lemnak kin nan in rejañ eo ilo 2 Timothy 4:5 ñõn “kõmõn jerbal an dri evanjel” im kin yokwe eo ad ñõn armij otemjej, jen bõk kakajur ñõn jaketo-jaketak news eo emõn kin Ailiñ eo ekairujruj ilo jabdewõt ien emõn tok, im liki bwe Jehovah enaj wõnmanlok im kajerammõn jerbal eo ad.