Kwalok Nan ñõn Armij ro ilo Kajin ko im Kabuñ ko Otemjej
1 Christian ro ilo ebeben eo kein kajuõn rar kwalok ilo kijejeto ñõn armij ro rar konono ilo elõñ kajjo kain kajin ko im rar bed ilo elõñ kain kabuñ ko. Tokjen men in, “tok ñõn yiõ eo 100 ilo enañin aolep bukwon ko tõrerein Mediterranean Sea eo kar wor juõn jukjuk im bed in ri Christian ro iloan.”—History of the Middle Ages.
2 Ilo United States, elõñ armij rej konono ilo kajin ko jet ijellokin English. Elõñ jikin kwelok ko im bukwon ko kiõ ewor jukjuk im bed ko relap in ruamaijet ro kin emmakit eo an ro rej ko jen kabijukneir. Elõñ ro rej tõmak ilo kabuñ ko rejjab Christian rar emmakit ñõn ijin, ekoba elõñ buki thousand Buddhist im Hindu ro im bareinwõt elõñ million ri Jew im Muslim ro. Kin oktak in kin kajin im kabuñ ko, ej juõn aitwerõk elap ñõn jela ewi wãwen jemaroñ bwebwenato ibben im kwalok nan ñõn armij rein ñe jej iion ir. Ilo juõn wãwen, emaroñ wor juõn territory in missionary ilo bukwon eo ad make. Ewi wãwen jemaroñ lor nan in jiroñ eo an Jesus ñõn “kwalok ñõn armij rõn” ilo ad kwalok nan ñõn armij ro ilo kajin im kabuñ ko otemjej?—Jerbal 10:42.
Kwalok Nan ñõn Armij ro Rej Konono ilo Bar Juõn Kajin
3 Juõn laplok elap in ri kwalok ro rekãl rej itok jen bwiljin armij ro rej konono kajin ko jet ilo 48 state ko ilo territory eo iumin ra eo ad. Congregation ko kar kajutaki ilo 17 kajin ruamaijet ro, im kumi ko rej jerbal ilo bar 7 kajin ko. Bõtab, elaplok men remaroñ kõtõbraki.
4 Le Jen Abañ eo kin Kajin: Ejelok bere bwe elõñ armij emõkajlok air katak im emwilõllok air melele ñe rej katakin ir ilo kajin eo air make. “Kin gospel” eo im bwe ren ‘dri bõk mõtõn eo iben ro jet,’ elõñ brother im sister ro rar katak bar juõn kajin. (1 Kor. 9:23) Meñe juõn kõra eo ej konono kajin China etto an kar bed ilo magazine route (karõk in bar jeblak ñõn lelok magazine ko rekãl) eo an juõn sister eo ej konono kajin English, kõra eo ear abwin katak Bible eo mae ien bar juõn sister, eo ear katak kajin China, ear lelok ñõn e juõn book ilo kajin eo. Kõra eo ear mõnõnõ in jino katak kin Bible eo. Men eo ear kõmmõn oktak kar jibadbad eo an sister eo kein karuo ñõn konono jejjo nan ko ilo kajin eo an kõra eo make.—Keiri Jerbal 22:2.
5 Kin un ko remõn November 1, 1992, Watchtower magazine eo ear kwalok nan kein: “Katak juõn kajin ekãl . . . ejamin kadeklok wõt maroñ in lemnak eo an jodikdik ro ak enaj bareinwõt kõmmõn bwe en laplok air keie ñõn dolul eo an Jehovah.” Elõñ ro uan family in Bethel rar bõk jerbal eo ñõn katak juõn kajin ekãl. Ilo wãwen in, brother ro rar maroñ jibañ congregation ko ijo rar aikwiji brother ro ñõn tel. Elañe kwoj jela bar juõn kajin ak kwoj mõnõnõ in katak, kwe bareinwõt kwo maroñ lelok jibañ ñõn juõn congregation ak kumi eo ej konono bar juõn kajin.—Mat. 9:37, 38.
6 Juõn brother ilo Florida eo ear katak kajin Vietnam mokta jen ear deloñ ilo mol eo ej kiõ lo lõñliñ in jaketo-jaketak news eo emõn ibben armij ro rej konono kajin Vietnam. Ñõn kõmmõn bwe ren kajerbal jelalokjen eo an kin kajin in ñõn kwalok nan, e im family eo an rar emmakit ñõn juõn jikin elaplok air aikwiji jibañ ilo kajin Vietnam. Jen ien eo ear emmakit, ej lo tõbrak in katak Bible ibben elõñ armij ro jen Vietnam.
7 Juõn pioneer sister ilo California ear iion jet armij ro rejaroñroñ ilo territory eo an. Ear jar bwe Jehovah en jibañ e lo juõn armij eo emaroñ katakin e sign language (konono ikijen kajerbal pã) bwe en maroñ katakin ir mol eo. Juõn ran ke ear kaikujkuj ilo juõn mõn wia, juõn kõra e jaroñroñ ear je juõn note im kajitõk jibañ ñõn kabukõt juõn men ear aikwiji. Elikin ear jibañ e ñõn bukõte, pioneer sister eo ear je juõn note in kwalok kõnan eo an ñõn katak sign language bwe en maroñ jibañ ro rejaroñroñ ilo bukwon eo an. Inem kõra eo e jaroñroñ ear je, im kajitõk, “Etke kwo kõnan jibañ armij ro rejaroñroñ?” Sister eo ear je: “Ña ij juõn ian Ri Kennan ro an Jehovah, im I kõnan jibañ ro rejaroñroñ ñõn melele Bible eo. I naj mõnõnõ in katakin yuk Bible eo elañe kwonaj katakin iõ sign language.” Sister eo ear ba: “Kwojjab maroñ jela ewi joñan aõ mõnõnõ ke ear ba ‘Emõn.’ ” Sister eo ear etal ñõn mweo imõn kõra eo aolep jota iumin jiljino week ko. Ear katak sign language, im kõra eo e jaroñroñ ear katak mol eo im ear baptais! Men in ear walok elõñlok jen 30 yiõ ko remotlok, im pioneer sister eo ej kwalok wõt ibben ro rejaroñroñ im ej kiõ bed ilo juõn congregation ej kajerbal sign language.
8 Elañe kwoj jela bar juõn kajin im ewor kõnan eo im kwomaroñ emmakit ñõn juõn jikin elaplok air aikwiji jibañ ie, etke kwojjab konono ibben elder ro ilo congregation eo am. Elañe rej eñjake bwe kwoj tellokin kõmmõn juõn emmakit rot in, kajitõk ibben circuit overseer eo elañe ewor juõn jikin ebak kwomaroñ jerbal ie. Elañe ejelok, kwomaroñ jeje ñõn Society eo, elañe elder ro rej jilkinlok juõn letter kin lemnak ko air ikijen maroñ im kabel ko am ikijen kajin eo.—Lale August 15, 1988, Watchtower, peij 21-3.
9 Kajerbal Kein Jerbal ko Rej Letoki: Book ko ad rej walok ilo elõñ kain kajin ko. Enaj emõn ñõn bõk ibbõm tract ko—ak elañe ejelok juõn congregation ej konono bar juõn kajin ej jerbal ilo ejja territory eo wõt, Require (Jen Kõmmõne) brochure eo—ilo kajin ko rej konono ilo territory eo am. Elañe ej alikar bwe armij eo ejjab lukkun jela kajin English, kajitõk ibben kajin et eo ej konono. Men in emaroñ kalaplok jokãlet eo am ikijen book et ko kwomaroñ leloki. Ñõn wanjoñok, ejjab jeja bwe juõn ri Hindu eo ej konono kajin Punjabi ak Urdu emaroñ bareinwõt konono kajin Arabic.
10 Meñe kwojjab konono kajin eo an armij eo kwoj iioni ilo jerbal in kwalok nan eo am, kwomaroñ kwalok wõt kin news eo emõn ñõn e. Ewi wãwen? Ikijen am kajerbal booklet eo etan Good News for All Nations. Ewor juõn ennan ekadu emwij je ilo 59 kajin ko. Einwõt nan in kamelele ko ilo peij 2 ilo booklet eo ej kamelele kake, elikin kwoj jela kajin eo an ri mweo, kõtlok an read ennan eo ilo peij eo ekkar ilo booklet eo. Elikin ej readi, kwalok juõn book ilo kajin eo an make. Elañe ejelok juõn, kwalok ñõn e book eo ilo kajin English. Ba bwe kwonaj kajeoñ in rol kin juõn copy ilo kajin eo an. Kajitõk kin etan, im jei turin address eo an. Bõlen kwomaron lelok kõjela in ñõn congregation ak kumi eo ebaktata ilo kajin eo, im kajerbal Foreign Language Follow-Up slip (S-70a). Kin kamelele ko jet kin ewi wãwen kwomaroñ lelok melele rot kein ñõn brother ro rekkar, lale peij 7 ilo October 1993 Ad Jerbal Ñõn Ailiñ Eo. Elañe ejelok juõn eo ej konono kajin eo emaroñ bar jeblak ibben, kwomaroñ bõk aitwerõk eo, meñe katak ibben armij eo ilo am kajerbal book eo ilo kajin English.—1 Kor. 9:19-23.
Kwalok Nan ñõn Armij ro ilo Kabuñ ko Rejjab Christian
11 Jela jidik kin kabuñ eo an juõn armij enaj jibañ kij ñõn kwalok nan ilo bolemen kin Ailiñ in Anij. Book eo Mankind’s Search for God ej letok ñõn kij lolokjen kin kabuñ ko relap ilo lõl in bwe en bwe ad melele kin tõmak ko an armij bwe jen maroñ jibañ ir bõk jelalokjen kin mol eo.
12 Ilo box eo ilo peij 6 ilo insert (peij eo iloa) eo ej letok juõn lãjrak in book ko me dolul eo an Jehovah ej letok ñõn ad kajerbali ñõn kwalok nan ñõn armij ro rejjab Christian. Ilo ad konono book kein, jenaj melele kin ewi wãwen jemaroñ kebak armij kin news eo emõn. Jejjab kõnan meloklok bwe juõn kein jerbal elap an jibañ ej book in Reasoning. Peij 21-4 ilo book eo ej letok nan in rejañ ko rekeie kin ewi wãwen jemaroñ uak ro rej Buddhist, Hindu, Jew, im Muslim.
13 Kejbarok Ta Eo Kwoj Ba: Jej aikwij kejbarok bwe jen jab ekajete armij ro ilo juõn kabuñ ilo ad bebe bwe tõmak ko air make rej ejja einwõt aolep armij ro ilo kabuñ eo. Jen men in, kajeoñ in melele ewi wãwen kajjojo armij rej lemnak. (Jerbal 10:24-35) Einwõt juõn Muslim, Salimoon ear rittolok im tõmak bwe Koran eo kar Nan eo an Anij. Ak ear jab maroñ lukkun bõk katak eo an Muslim bwe juõn Anij in tiriamokake enaj kar kaiñtan armij ilo juõn hell ekakijeekek. Juõn ran Ri Kennan ro an Jehovah rar kir e ñõn juõn kwelok. Ilo ien eo wõt ear kile mol eo, kiõ ej jerbal ilo mõnõnõ einwõt juõn elder ilo congregation eo an Christian.
14 Ñe jej kwalok nan ñõn ro rejjab tõmak ilo Christian, jej aikwij kejbarok bwe wãwen ad kebak ir ejjab kõmmõn bwe jen luji ien eo emõn ñõn bwebwenato ibbeir kin news eo emõn. (Jerbal 24:16) Ro rej bed ilo jet kabuñ ko emõkaj air lõkatip ñe jabdewõt armij rej kajeoñ in ukõt ir jen tõmak eo air. Inem kwon bukõt point ko me komirro jimor komij errã kaki bwe kwon maroñ karel ir ñõn mol eo ilo Nan in Anij. Ro rej einwõt sheep renaj emmakit ilo emõn ñe kwoj kebak ir ilo joij im ñe kwoj kwalok mol eo ilo juõn wãwen alikar.
15 Nan ko jej kãleti ej bareinwõt aorõk, elañe jejjab kõnan kakolõkabwid armij jen ennan eo ad. Ñõn wanjoñok, elañe emõkaj am ba bwe kwoj juõn Christian, armij eo ej roñjake emaroñ kobaik yuk ibben kabuñ ko an Christendom, eo emaroñ kajutak juõn abañ. Emaroñ bareinwõt wor tokjen in jitõñlok ñõn Bible eo einwõt “Jeje ko” ak “jeje ko rekwojarjar.”—Mat. 21:42; 2 Tim. 3:15.
16 Elañe kwoj iion juõn armij ejjab bed ilo juõn kabuñ in Christian im kwojjab bojak in kwalok nan ñõn e, kajerbal ien eo ñõn jela kajjen, door juõn tract, im kwalok etamirro. Inem jeblak elikin juõn ak ruo ran ko, elikin am kabojak ñõn kwalok juõn ennan.—1 Tim. 4:16; 2 Tim. 3:17.
17 Kwalok Nan ñõn Buddhist ro: (Lale katak 6 ilo Mankind’s Search for God.) Tõmak ko an Buddhist ro elap air oktak jen don. Jen air rejtak tõmak eo kin juõn Anij Dri Kõmõnmõn, kabuñ in Buddhism ej watõk emaan in India eo Gautama (Buddha), ilo ebeben eo kein kajiljino B.C.E., einwõt juõn joñok emõn ilo kabuñ. Ke ear lo juõn emaan enañinmij, juõn lõllap, im juõn emaan emij, Gautama ear iñtan in lemnak kin melelen mour. ‘Armij rar lotak ñõn baj iñtan, rittolok, im mij ke?’ ear lemnak. Emol, jemaroñ uak kajitõk kein an Buddhist ro me emol air kõnan jela uak ko.
18 Ñe jej konono ibben ri Buddhist ro, kajerbal wõt ennan eo emõn im mol ko realikar jemaroñ loe ilo book eo elaptata ian book ko rekwojarjar, Bible eo. Einwõt jarlepju in armij ro, ro rej Buddhist elap air itoklimo kin ainemõn, kien mour emõn, im mour in family, im ekkã air mõnõnõ in bwebwenato kin katak kein. Men in emaroñ tellok yuk ñõn am kalikar Ailiñ eo einwõt mejelan eo wõt emol ñõn abañ ko an armij.
19 Ilo jet jikin kwelok ko ilo ailiñ in, elõñ ri China ro rar emmakit tok rej tõmak ilo kabuñ in Buddha im katak in Oriental ko jet. Elõñ rej ri school ro rej school ilo university ko ilo United States. Ke juõn sister ilo Montana ear lo juõn emaan in ri China ilo juõn mõn wia, ear lelok ñõn e juõn tract ilo kajin eo an im tilmaake juõn katak kin Bible. Ear ba: “Kwoj ba Bible eo Ekwojarjar ke? Iar bukõte men in ilo aolepen mour eo aõ!” Ear jino katak ilo week eo im jino bed ilo aolep kwelok ko.
20 Iumin elõñlok jen joñoul yiõ ko, juõn pioneer sister ilo Nevada ear katakin mol eo ñõn ri school in ri China ro. Ke ear kwalok nan ilo juõn em ewor rualitõk apartment ko ijo ri school rein rar jokwe ie, ear jar ñõn Jehovah ñõn jibañ e jino juõn Bible study ilo kajjojo apartment. Iloan wõt ruo week ko ear katak ilo diktata ibben juõn ri school ilo kajjojo apartment. Juõn wãwen kebak armij eo ear emõn an kajerbale ej ñõn ba bwe ear lo juõn men ekkã an ri school ro inebata kake—ir aolep rar kõnan lo ainemõn im mõnõnõ. Inem ear kajitõk elañe rar itoklimo kake men in bareinwõt. Enañin aolep rar errã. Ej kareilok ir ñõn brochure eo Lasting Peace and Happiness—How to Find Them, eo kar eiki ñõn armij ro ilo China. Elikin lalim wõt ien katak, juõn ri school ear ba ñõn e bwe ear etto an bukõte mol eo im kiõ emwij an loe.
21 Kwalok Nan ñõn Ri Hindu ro: (Lale katak 5 ilo Mankind’s Search for God.) Kabuñ in Hindu ej tõmak ilo elõñ kain lemnak ko. Katak ko an elap an kabwokbwok. Ri Hindu ro ewor juõn tõmak in trinity (jilu anij ilo juõn) ikijen anij laplap eo air Brahman (Brahma ri Kõmõnmõn eo, Vishnu ri Lomor eo, im Siva ri Kokkure eo). Tõmak bwe aan eban mij eaorõk ñõn tõmak eo air kin reincarnation (tõmak bwe elikin mij aan ej lotak ilo bar juõn enbwin), eo ekkã an lelok ñõn ri Hindu ro juõn lemnak in fatalistic (tõmak bwe men in walok ko emwij kar karõke lok iman im ejelok juõn men armij remaroñ kõmmõne ñõn ukõte) kin mour. (Lale book in Reasoning (Kammanwa), peij 317-21, im Imõniaroñroñ, November 1, 1997, peij 3-8.) Hinduism ej katakin kin kijenmij, bwe aolep kabuñ ko rej tellok ñõn ejja mol eo wõt.
22 Juõn wãwen kwalok nan ñõn juõn ri Hindu ej ñõn kamelele kin kejatdikdik eo ad eo ej wawa ion Bible eo kin mour ñõn indio ilo mour wãppen ion lõl im bareinwõt uak ko rekaju buru me Bible eo ej letoki ñõn kajitõk ko reaorõk me armij otemjej rej jelmaeki.
23 Kwalok Nan ñõn Ri Jew ro: (Lale katak 9 ilo Mankind’s Search for God.) Oktak jen aolep kabuñ ko jet rejjab Christian, kabuñ in Ri Jew ro ewor okran ilo bwebwenato in armij, jab inoñ bajjõk. Jeje ko ilo kajin Hebrew emwij kakormol in Anij, ear letok juõn ial ñõn an armij bukõt Anij eo emol. Ak, ilo jumae Nan in Anij, juõn irinekatak an Judaism ilo ran kein ej tõmak eo bwe aan armij eban mij. Kwomaroñ kajutak juõn bedbed me komirro jimor komij errã kake ilo am kamol bwe jej kabuñ ñõn Anij eo an Abraham im ilo am kamol bwe kij aolep jej jelmaek ejja abañ ko wõt ilo lõl in rainin.
24 Elañe kwoj iion juõn ri Jew eo ejjab tõmak ilo Anij, am kajitõk ibben elañe kar eindein jen jinoin emaroñ jibañ yuk ñõn jela ta naj wãwen eo emõntata ñõn konono ibben. Ñõn wanjoñok, emaroñ kar jab roñ juõn kamelele ekaju buru kin ta unin Anij ej kõtlok iñtan ko. Jemaroñ rejañ ri Jew ro emol burueir ñõn bar etale kadkadin Jesus einwõt Messiah eo, jab ilo wãwen an Christendom kalõkabwidbwid e, ak ilo wãwen eo ri Jew ro rar je Jeje ko ilo kajin Greek rar kwalok e.
25 Kwalok Nan ñõn Muslim ro: (Lale katak 12 ilo Mankind’s Search for God.) Muslim ro (ak, Moslem ro) rej ri tõmak ro an Islam (ak, Muhammadanism), eo ej kobaik tõmak ilo Allah einwõt anij eo wõt air im ilo Muhammad (570-632 C.E.) einwõt ri kanan eo an eliktata im aorõktata. Kinke rejjab tõmak bwe kar wor juõn nejin Anij, ri Muslim ro rej kile Jesus Christ einwõt juõn ri kanan edik wõt an Anij, im jab elaplok jen men in. Koran eo, eo ej bed ediklok jen 1,400 yiõ ko, ej elij nan ko jen Jeje ko ilo kajin Hebrew im Greek jimor. Einlok wõt juõn ko rekajur rej bed ikõtan kabuñ ko an Islam im Catholic. Kabuñ kein ruo jimor rej katakin kin aan armij bwe eban mij, purgatory (jikin eo rej karreoik ak kaiñtan aan ko), im an bed juõn hell ekakijeekek.
26 Juõn men jej errã kake ej tõmak eo ad bwe ewor juõn wõt Anij emol im Bible eo ej kakormol in Anij. Juõn armij eo ej kejbarok wãwen an read Koran eo emwij an lo ijitõñ ko ñõn Torah eo, Psalm ko, im Gospel ko einwõt rej Nan in Anij im emwij air read bwe ej aikwij eindein air kile im bokake. Kin men in, kwomaroñ tilmaake juõn katak kin Bible ibben armij eo.
27 Ennan in emaroñ jerbal ñe juõn armij ej kwalok e make einwõt juõn Muslim: “Ejjab lõñ ri Muslim ro iar konono ibbeir, ak iar konono jidik kin jet katak ko an kabuñ eo am ilo book in. [Eliklok ñõn peij 23 ilo book in Reasoning.] Ej ba bwe kwoj tõmak bwe Jesus kar juõn ri kanan ak bwe Muhammad kar ri kanan eo eliktata im aorõktata. Kwoj tõmak ke bwe Moses kar juõn ri kanan emol? [Kõtlok an uak.] I maroñ ke kwalok ñõn yuk ta eo Moses ear katak jen Anij ikijen ãt eo etan make?” Inem konono Exodus 6:2, 3. Ñe kwoj bar jeblak, kwomaroñ bwebwenato kin unin tel eo edik “Juõn wõt Anij, Juõn wõt Kabuñ,” ilo peij 13 ilo booklet eo The Time for True Submission to God.
28 Rainin, elõñ rej jerbal ekkar ñõn nan ko an Isaiah 55:6, eo ej konono: “Komin bukot Jeova ke kwo maroñ in lo E; komin kir ñõn e ke Ej ebak.” Men in ej jerbal ñõn aolep armij ro emol burueir, jekdon ta kajin eo rej konono ak ta kabuñ eo air. Jemaroñ liki bwe Jehovah enaj kajerammõn jibadbad ko ad ñõn illok im “kõmõn dri ailiñ ko otemjej bwe ren dri kalora.”—Mat. 28:19.
[Box eo ilo peij 6]
Book ko Kar Eiki ñõn Armij ro Rejjab Christian
Ri Buddha ro
“Look! I Am Making All Things New” (Brochure)
In Search of a Father (Booklet)
Ri China ro
Lasting Peace and Happiness—How to Find Them (Brochure)
Ri Hindu ro
From Kurukshetra to Armageddon—And Your Survival (Booklet)
Our Problems—Who Will Help Us Solve Them? (Brochure)
The Path of Divine Truth Leading to Liberation (Booklet)
Victory Over Death—Is It Possible for You? (Booklet)
Why Should We Worship God in Love and Truth? (Brochure)
Ri Jew ro
A Peaceful New World—Will It Come? (Tract No. 17)
Jehovah’s Witnesses—What Do They Believe? (Tract No. 18)
Will There Ever Be a World Without War? (Brochure)
Ri Muslim ro
How to Find the Road to Paradise (Tract)
The Time for True Submission to God (Booklet)