“Jehovah Ej Aõ Ri Jibañ”

¹ Ke Jesus ear jilkinlok ri kalor ro an jinointata, ear jiroñ ir: “Lo, Ij jilkinlok kom einwõt s̃ip ko ilo bwiljin kiru wulp ko.” (Mat. 10:16) Men in ear kõmmõn ke air inebata im jenliktak? Jaab. Rar bõk lemnak eo me ri jilek Paul ear kwalok kake tokelik ke ear jiroñ ri Christian ro mõttan: “Inem jej maroñ in beran im ba, ‘Iroij ej aõ Dri jibõñ; I jamin mijõk: ta eo armij ren kõmõn ñõn iõ?’” (Hib. 13:6) Rar lõñliñ bwe emwij likit ir im tellokin air iñtan kin ãt eo etan Jesus, im rar wõnmanlok im jab mwij air katakin im keañ kin news eo emõn.​—Jerbal 5:41, 42.

² Rainin jerbal in kwalok nan eo ibelakin lõl ej bed ilo mõttan ko an eliktata. Einwõt Jesus ear kanan kake, ri ailiñ otemjelok rej kijirate kij. (Mat. 24:9) Jerbal in kwalok nan eo ad rar jumae im kajirere kake, im ilo jet jikin ko ilo lõl in rar kamo jerbal eo ad. Elañe ear ejelok ad tõmak, jemaroñ kar lelñoñ. Bõtab, ad jela bwe Jehovah ej ad ri Jibañ ej kamourur im kakajur kij ñõn kijenmij.

³ Beran ej kadkadin kajur im ejelok mijak. Ej oktan lelñoñ, imijakjak, bikõt. Ri kalor ro an Jesus ien otemjej rar aikwij beran ñõn kijenmij. Ej juõn men in aikwij elañe jekõnan bõprae ad ebwer kin lemnak im makitkit ko an lõl in ej kijirate Anij. Elap an kakajur kij ñõn ad lemnak kin wanjoñok eo emõn an Jesus, eo ear anjo ion lõl! (John 16:33) Kememej, bareinwõt, bwe ri jilek ro ke rar jelmae melejoñ ko relap rar keañ ilo beran: “Emõn jen bokake Anij elap jen armij.”​—Jerbal 5:29.

⁴ Jejjab Ian Ro Rej Jenliklik ñõn Kokkure: Jej aikwij kate ñõn ad debij juõn lemnak emõn kin jerbal eo ad. (Hib. 10:39) Ien otemjej jej aikwij kememej bwe an Jehovah jilkinlok kij ej einwõt juõn wãwen ej kalikar yokwe im tiriamokake eo an ñõn armij otemjej. Ej jab kajitõk ibben ro ri karejaran ñõn kõmmõne jabdewõt men me ejelok tokjen. Men otemjej me ear karõk ñõn ad kõmmõne enaj ñõn emõn eo an ro rej yokwe Anij.​—Rom. 8:28.

⁵ Juõn lemnak emõn enaj jibañ kij ñõn bukõt wõt ro rej einwõt sheep ilo territory eo ad. Jemaroñ watõk jab kea eo armij rej kwaloke einwõt juõn wãwen rej kwalok dikããlãl im ejelok kejatdikdik eo air. Jen kõtlok bwe yokwe eo ad en kamakit kij ñõn ad kwalok tiriamokake im meanwõd. Aolep ien jej lelok book ak magazine ko ak lo itoklimo eo an armij, mejenkajjik eo ad en ñõn kõmmõn juõn bar jeblak ilo mõkaj ñõn kalaplok an itoklimo. Jej aikwij jab bere maroñ eo ad ñõn jino juõn katak kin Bible ak an bolemen ad tel e. Jen men in, ien otemjej im ilo jar jej aikwij bukõt jibañ im tel jen Jehovah, im liki bwe enaj jibañ kij.

⁶ Tõmak eo ad ej bin bwe Jehovah enaj lolorjake jerbal in ñõn jemlokin. (Keiri Pilippai 1:6.) Liki eo ad ilo e einwõt Ri Jibañ eo ad ej kakajur kij, bwe jen “jab mõk ilo kõmõn emõn.”​—Gal. 6:9.