Kalaplok Ad Lale Bible eo!

1. Ilo jinoin, kar kõmmane magazine in Imõniaroñroñ ñan wõn ro, im ñan wõn The Golden Age?

¹ Ilo October 1, 1919, kar kõmmane copy eo moktata kin magazine in The Golden Age. Emol an kar juõn kein jerbal elap an aorõk ilo jerbal in kwalok nan. Etke? Kinke kar eiki elaptata ñan leloke ñan aolep armij. Ear jab eindein ibben Imõniaroñroñ, eo iumin elõñ yiõ ko kar watõke einwõt juõn magazine elaptata ñan “bwij erik.” (Luk 12:32) Elap an kar ri kwalok ro kin Ailiñ eo emmakit ilo kijejeto kin magazine in ekãl bwe iumin elõñ yiõ ko ear laplok air lelok The Golden Age jen Imõniaroñroñ eo.

2. Ta ãt eo etan The Golden Age rainin, im ta kar karõk eo an jen jinoin?

² Kar kõmmane magazine in The Golden Age ñan kwalok ñan armij bwe mejelan eo emol kin abañ ko an armij ej Iroij eo an Christ iumin Juõn Thousand Yiõ, eo enaj bõktok juõn ien eaibujuij ñan armij. Ilo yiõ ko tokelik elõñ oktak ko kar kõmmani ñan The Golden Age bwe en jejjet ñan aikwij ko reoktak kin ien ko. Ilo 1937 kar ukõt etan ñan Consolation. Ilo 1946 ear oktak im Awake!, ãt eo jej jelã kake rainin.

3. Awake! ear juõn kein jerbal ekajur ñan kajejjet kitien kanan et eo?

³ Jen jinoin, magazine in ear lap an jibañ ilo kwalok eo elap ear walok jen 1919. (Mat. 24:14) Bõtab, ilo lemnak kin aorõkin ien kein ad, ej juõn men in meletlet ñan kõmman oktak ko jet ñan Awake!

4. (a) Ta eo juõn armij ej aikwij kõmmane elañe ekõnan bwe en tilekek ilo “ran in kwi eo an Jehovah”? (b) Ekkar ñan Reveles̃õn 14:6, 7, ta eo juõn “enjel ej kãki i mejatoto” ej kir kij ñan ad kõmmane?

⁴ Elõñ million armij rej mõnõnõ in readi magazine in Awake! kinke ej etale elõñ kain katak ko an jukjuk im bed in ilo juõn wãwen emejaja. Ejelok bere bwe elõñ ian ro rej bed ilo ien Kwojkwoj in Kememej eo kajjojo yiõ rej keini air read Awake! Ak, elañe jabdewõt armij ekõnan bwe en tilekek ilo “ran in kwi eo an Jehovah,” enaj aikwij jibañ bwe en kõmman elaplok jen an baj keini wõt an read book im magazine ko ad.​—Zeph. 2:3, New World Translation; Rev. 14:6, 7.

5. (a) Jino ibben magazine in Awake! ilo January 2006, ta eo enaj laplok an kwalok kake? (b) Ta eo elõñ remaroñ emmakit in kõmmane, im ilo jejjet in kitien kanan et eo?

⁵ Kin men in, jen January 2006, Awake! enaj kalaplok an kwalok kin Ailiñ in Anij. Enaj kajju im rejañ ro rej readi magazine in ñan reilok ñan Bible eo ñan lo mejelan abañ ko air im enaj kwalok ilo alikar kamelele ko ilo Bible kin men ko rej walok ilo ran kein. Ilo wãwen in, ro rej read renaj bõk juõn melele emõnlok kin men ko rej walok im bõlen men kein renaj kamakit ir ñan kalaplok air katak kin Jehovah.​—Zech. 8:23, NW.

6, 7. (a) Ewi wãwen naj kõmmane Awake! bwe en jibañ elõñ ñan air jerbale 1 Tessalonika 2:13? (b) Ewi emakijkij in air naj kõmmane magazine in Awake!, im oktak in enaj jelet jete kajin ko?

⁶ Awake! enaj wõnmanlok im kwalok kin katak ko me renaj kaitoklimoen aolep armij. Bõtab, enaj laplok an kwalok kin Bible eo. (1 Tess. 2:13) Kinke ewõr katak ko remũlal kin Bible eo ilo magazine in Imõniaroñroñ im Awake! enaj kalaplok an kwalok kin katak ko rej bedbed ion Bible, ejjab juõn men in aikwij ñan wõnmanlok im kõmmane Awake! magazine eo ruo alen ilo juõn alliñ. Kin men in, jino kin January 2006 magazine eo, Awake! naj kõmmane juõn wõt alen ilo juõn alliñ. Men in enaj kabidodolok jerbal in keboj, ukõte, im jilkinlok book ko ad.

⁷ Oktak in enaj jelet enañin 40 percent in kajin ko ijo rej kõmmane magazine in Awake! Ilo elõñ kajin ko, ededelok air kõmman Awake! juõn alen ilo juõn alliñ ak emen alen ilo juõn yiõ (quarterly). Enaj ejelok oktak ilo kõmmane magazine in Imõniaroñroñ.

8. Ewi wãwen ri kwalok ro remaroñ kajerbal Awake! ibben Imõniaroñroñ eo?

⁸ Ri kwalok ro remaroñ lelok magazine in Awake! eo an kajjojo alliñ ibben juõn ian magazine in Imõniaroñroñ ko ilo alliñ eo. Ro rej kwalok katak ko ilo Awake! renaj maroñ kajerbal ejja magazine eo wõt ilo aolepen alliñ eo ilo an jab aikwij ukõt ennan eo air ilo tu-iolapin alliñ eo, einwõt rej kõmmane kiõ.

9. Jerbal et eo Awake! enaj wõnmanlok im kõmmane?

⁹ Jen copy eo moktata ilo 1919, magazine eo jaar jelã kake einwõt The Golden Age, Consolation, im kiõ Awake! ear lap an wõr kunan ilo jerbal in kwalok nan. Kimij jar bwe Jehovah enaj wõnmanlok im kajerammõn leto-letak in magazine in ilo wãwen oktak in im bwe enaj jibañ elõñlok armij jen “ailiñ otemjej, im ian bwij otemjej, im driloabjen otemjej im konono otemjej” ñan reilok ñan Ailiñ in Anij einwõt kejatdikdik eo wõt air.​—Rev. 7:9.

[Kajjitõk ko]