Kwalok Nan Ikijen Telephone Emaroñ Or Tõbrõk
1 Etke emõn bwe jen lemnok kin ar kwalok nan ikijen ar kajerbal telephone? Kinke ej bar kebellok juõn wãwen jibõñ ro jet bwe ren bõk jelalokjen eo emol kin lomor. (2 Pit. 3:9) Meñe ekkã ar kwalok nan eo emõn kin Ailiñ in Anij jen im ñõn im, jej bar mõnõnõ in kajerbal ial ko jet bwe jen kõtõbar ro jejjab lo ir imoko imweir.—Matu 24:14; Luk 10:1-7; Rev. 14:6.
2 Wãwen Lolorjake: Einwõt eor karõk ko ñõn kwalok nan jen im ñõn im, ebar or juõn karõk ñõn dri kwalok ro kin kwalok nan ikijen telephone. Kin kwalok nan rõt in kwomaroñ mõke iam ak iben juõn kumi edrik kin ruo ak jilu. Jikin eo kwoj kãlete ñõn kwalok nan ie ikijen telephone en melak ñõn aikwij eo. Elõñ rej kile tokjen air jijõt ilo tebel eo iben ejja men ko rej kajerbali ilo ien air kwalok jen im ñõn im.
3 Wãwen Kwalok Nan ikijen Telephone: Ñe kwoj kwalok nan ikijen telephone, en ilo juõn wãwen kõmao emõn. Ro rej kab jino remaroñ riiti wõt nan ko emwij je ak en ilo juõn wãwen emõn. Nan in kebellok ko rej walok ilo buk eo Kamanwa, Ar Jerbal ñõn Ailiñ Eo, im tract eo Kwo Kõnan Ke Jelã Mol Eo? remaroñ jibõñ. Ilo am kapoje nan in kwalok ko am, kãlet juõn katak, juõn kajitõk, im pojõk in kwalok jet eon ko remõn ñõn uak. Enañin aolep ien kwonaj lelok ejja buk ko wõt ro jet rej lelok ilo air kwalok nan jen im ñõn im. Lemnok kin nan in kakememej kein: Kwon ainemõn im kennan ilo alikar. Kwon joij wõt, meanwõr im mõnõnõ, kinke eo kwoj kennan iben ilo telephone eo enaj kile wãwõm. En emõn am eoroñ dri mweo ñe ej kwalok lemnok ko an, im ñe emwij, kwon kwalok am kamolol kin lemnok ko an. Lale bwe kwon jab kennan kin jabawõt bwe renaj watõk unin am telephone lok ej kinke kwoj kajitõk jibõñ kin mõnni.
4 Eo kwoj kennan iben ilo telephone eo emaroñ utame ak nañinmij ak juõn eo im eboub wõt im ebin loe ilo ien kwalok nan jen im ñõn im. Eor ro im rej jokwe ilo jikin ko emwij worori ak ilo moko me armij rejjab maroñ dreloñi elañe ejelok air melim. Kin men in, ñõn kajejit jerbal eo ar ñõn kwalok nan ilo bolemen, lor kilen kwalok nan ikijen telephone ilo jime.
[Kajitõk ko ñan katak]
1. Etke kwalok nan ikijen telephone ebar aurõk iber?
2. Ewi wãwen lolorjake kwalok nan ikijen telephone?
3. Ta eo jen kememej wõt ñe jej kwalok nan ikijen telephone?
4. Kwalok nan ikijen telephone ej kamaroñ kij bwe jen it ilo jikin eo jej kwalok nan ie?