Daina E Jorran

KWOJ lo ke wõn ro Dai’na ej iten lolok ir? Ej iten lolok jet ian ledrik ro rej jokwe ilo enen Ke’nean. Jemen, Jekob en kar mõnõnõ ke kin men in? Ñõn jibañ uak kajitõk in, kajeoñ kememij wãwen eo Ebream im Aisak r’ar lemnõk kin limaro ilo Ke’nean.

Ebream e ar kõnan ke bwe Aisak, leo nejin en belek juõn jiroñ in Ke’nean? Jaab, e ar jab kõnan. Aisak im Re-bek’a r’ar kõnan ke bwe leo nejiir Jekob en belek juõn jiroñ in Ke’nean? Jaab, r’ar jab kõnan. Kwo jela ke ta unin?

Kinke armij rein ilo Ke’nean r’ar kabuñ ñõn anij wan ko. R’ar jab armij ro remõn ñõn belele ibeir, im r’ar jab armij ro remõn ñõn air jeraik ir. Inem je maroñ jela bwe Jekob ejamin naj kar mõnõnõ kin an lio nejin item jeraik ledrik rein, dri Ke’nean.

Ak kin an jeroane men in, Dai’na e ar jorran. Kwoj lo ke likao in Ke’nean ne ilo pija ne im ej kalimjek Dai’na? Etan in Shi’kem. Juõn ran, ke Dai’na e ar bar iten lolok limarein jeran, Shi’kem e ar añini Dai’na im kamakokoik e bwe en babu iben. Men in e ar nana, kinke Iõmaro im limaro wõt emwij air mare re maroñ babu iben dron. Men nana in Shi’kem e ar kõmõne ñõn Dai’na ar tellok ñõn juõn jorran elaplok.

Ke lõmaro jein Dai’na r’ar roñ kin men eo e ar walok, r’ar lukkun illu. Ruo iair, Sim’i-on im Li’vai, r’ar illu ñõn joñan eo r’ar bõk jãji ko air im dreloñ iloan jikin kwelok eo im jibwe lõmaro ilo air jaje. Irro kap lõmaro jeir im jatiir r’ar mõn Shi’kem im aolep lõmaro jet. Jekob e ar kanuij illu kinke lõmaro nejin r’ar kõmõn men in enana.

Ekijkan an kar jino walok aolep jorran kein? Kinke Dai’na e ar jeraik armij ro rejjab bokake kien ko an Anij. Je jamin kõnan jeraik ro eirwõt, jen ke?