KATAK 14

Lukkuun Kaalikkar Boin ko Raorõk

Hibru 8:1

ILO TUKADU: Jipañ ri-kweilo̦k ro bwe en pidodo aer mel̦el̦e kõn boin ko ilo aolepen katak eo, im en lukkuun alikkar wãween an kajjojo iaan boin ko raorõk ekkejell̦o̦k ñan kõttõpar eo am̦ im tarlep in katak eo.

KILEN AM̦ KÕM̦M̦ANE:

En wõr juon am̦ kõttõpar. L̦õmn̦ak kõn ta kõttõpar eo am̦ ilo katak eo, ej ke ñan karoñ ri-kweilo̦k ro, jipañ er ñan tõmak juon katak, ak ñan lujur bũrueer ñan jerbale katak eo? Innem, keememej kõttõpar eo am̦ ñe kwõj jino kõpooje katak eo am̦. Aolep boin ko raorõk kwõnaaj kwal̦o̦ki ilo katak eo rej aikuj jipañ eok ñan kajejjet kõttõpar eo am̦.

Kajjitõk ippam̦ make: ‘Ta kajjitõk ko ak mel̦el̦e ko armej rejjab errã kaki kõn katak in? Ewi wõt iaaer renaaj kar kwal̦o̦ki m̦okta im ko renaaj kar kwal̦o̦ki tokãlik?’ Ãlikin kwõmaroñ kõllaajraki boin ko ilo katak eo am̦ ekkar ñan laajrakin kajjitõk kein aer. Men in enaaj kõm̦m̦an bwe en pidodo an ri-kweilo̦k ro naaj roñjake, mel̦el̦e, im tõmak.
Kõmeejl̦o̦k tarlep in katak eo. Ilo iien eo kwõj kwal̦o̦ke katak eo, em̦m̦an ñe jãn iien ñan iien kwõj ãliji naan ko raorõk me rej kaalikkar tarlep in katak eo.
Boin ko raorõk ren lukkuun alikkar im pidodo ñan mel̦el̦e. Kããlõte boin ko wõt me rej ekkejel ippãn tarlep in katak eo am̦ im enaaj em̦m̦an am̦ kõmel̦el̦eiki ekkar ñan joñan minit ko kar liwaj. Jab kallõñlõñ boin, lukkuun kaalikkar boin ko kajjojo kwõnaaj kõjerbali, bõjrak jidik m̦okta jãn am̦ wõnm̦aanl̦o̦k ñan bar juon boin, im kõm̦m̦an bwe en em̦m̦an an juon boin ettõr ippãn boin eo tok juon.

Kwõmaroñ kwal̦o̦k boin ko raorõk ilo naanin ijjino ko am̦ bwe en pidodo ñan an ri-kweilo̦k ro kile boin ko ilo aolepen katak eo am̦, ak kwõmaroñ bar ãliji ilo naanin kõjjem̦l̦o̦k ko am̦ ñan kakeememej er kaki.