Ãliji Mel̦el̦e ko Raorõk

Ewõr ke iien epen am̦ keememej men ko kwaar katak? Jãn iien ñan iien men in ej wal̦o̦k ñan kõj aolep. Ta eo kwõmaroñ kõm̦m̦ane? Ãliji mel̦el̦e ko raorõk.

Ilo iien eo kwõj katak, kajjioñ bõjrak jidik im kõl̦mãnl̦o̦kjen̦ kõn men ko ej kab m̦õj am̦ etali. Eñin men eo rijjilõk Paul ear rõjañ ro jein im jatin ñan kõm̦m̦ane ke rar etale lõta eo an. Ear ba: “Innem eñin men eo eaorõk.” (Hib. 8:1) Ilo wãween in ear jipañ er ñan mel̦el̦e ta eo ear ba im wãween an mel̦el̦e ko ekkejell̦o̦k ñan doon.

Kwõmaroñ kõjerbal joñoul minit ãlikin am̦ katak ñan kõl̦mãnl̦o̦kjen̦ kõn boin ko raorõk me kwaar katak kaki. El̦aññe kwõjjab keememeji boin ko, bar lale unin tõl ko reddik ak riiti naan ko jinoin kajjojo pãrokõrããp ñan jipañ eok ñan keememej boin ko. El̦aññe kwõj katak kõn juon men ekããl, kajjioñ kõmel̦el̦eiki ilo naan ko am̦ make. Ñe kwõj bar l̦õmn̦ak kõn men ko kwaar katak kaki, enaaj pidodol̦o̦k am̦ keememej boin ko. Kwõnaaj bareinwõt kal̦apl̦o̦k am̦ mel̦el̦e kõn wãween am̦ maroñ jerbali katak ko ilo mour eo am̦.